2 cub tbyoꞌn txkan alumaj tuꞌn tbant jun nintz waꞌn tuꞌn, ex baj tbinchaꞌn taꞌl twitz uva te cꞌabj tbanil wen, ex cub tkꞌoꞌn tcyakil twi mes,

3 ex e jeꞌxtzun t-samaꞌn ke tmajen xuꞌj kꞌmalte tkanil cyuj ke lugar maꞌ cyjaw tibaj tnam, che chi cyjaꞌ:

4 Cytzaje, akeye cuꞌxun naꞌnx toc cynable. Ax icx xi tmaꞌn cye ke xjal mintiꞌ cynabl:

5 Cytzaje waꞌl tiꞌj wabj ma bant wuꞌne ex che cꞌane tiꞌj taꞌl twitz uva ma baj nbinchaꞌne.

6 Miꞌn cucx che oque mintiꞌ cynable, ex che ankꞌiltzune; che bete ic tzaꞌn jun xjal at tnabl, chi xjal at tnabl.

7 Ka ma txi tcawina ju xjal jawni twitz ex binchal mya baꞌn, cꞌoquel tzokpaj tiꞌja tucꞌil tyol mya baꞌn ex cꞌelel icꞌuna tuꞌn.

8 Miꞌn tzꞌoc tmayoꞌna ju xjal jawni twitz, tuꞌntzun miꞌn tel icꞌuna tuꞌn; cawinxa ju xjal at tnabl ex mas ctel tcꞌujlalil tiꞌja.

9 Kꞌonxa xnakꞌtzbil teju xjal at tnabl ex cꞌoquel mas tnabl; kꞌonxa xnakꞌtzbil teju xjal tzꞌaklxix ex ctel mastl tojtzkibl.

10 Ka ma ko niman te Kman, atzun in xeꞌt tuꞌn tten knabl, ex ka ma tzꞌel knicꞌ tiꞌj ju Dios Xjanxix, atzun in cnet ojtzkibl kuꞌn.

11 Tuꞌn nabl cxel lakꞌeꞌ tuj tkꞌija, ex nim kꞌij cꞌankꞌila.

12 Ka at tnabla, texa cꞌajbel jlu; ka jawni twitza, tuꞌnxa ctzajel tiꞌna mya baꞌn tibaja.

13 Aju xuꞌj mintiꞌ tnabl in che jaw tilj xjal tuꞌn tyol, mya tuj ttxolil in yolin ex mintiꞌ chꞌin baꞌn tuꞌn.

14 In cub keꞌ tuj jun siy ttzi tja, tuj jun lugar mas maꞌ tjaw tibaj tnam,

15 ex in che tzaj ttxcoꞌn ke xjal in che bet tuj cybe ex in xi tmaꞌn cye:

16 Cytzaje akeye cuꞌxun naꞌnx toc cynable. Ax icx in xi tmaꞌn cye xjal mintiꞌ cynabl:

17 Aju aꞌ elkꞌaꞌn in tzaj mas chiꞌ tcꞌanjtz; ex aju pan in xi waꞌt tuj ewaj cꞌocꞌj wabl te, chi xuꞌj.

18 Ex mintiꞌ baꞌn cyuꞌn xjal ka atzun taꞌ camic tuj tja xuꞌj lu, ex keju in che txconjtz tuꞌn, max cycuꞌx ke t-xeꞌpun cynajbil cyimni.