Aju cꞌwaꞌlbaj at tnabl, jun tzalajbil jlu te tman; atzunju cꞌwaꞌlbaj mintiꞌ tnabl, jun bis jlu te ttxuꞌ.

2 Aju kꞌinumabl mya tuj tumel in cnet, mlayx tzꞌajben te xjal, atzunju xjal in bet tuj tumelxix, in clet twitz camic.

3 Aju xjal tzꞌaklxix, mlay cyaj tcolin Kman tuꞌn miꞌn twaꞌn, atzunju xjal binchal mya baꞌn, nnoꞌc tmayoꞌn Kman tiꞌj ju in pon tcꞌuꞌj tiꞌj.

4 Aju xjal tcꞌiꞌ tzꞌakꞌnan, tal meba xjal cꞌoquel; atzunju in akꞌnanxix wen, ctel tkꞌinumabl.

5 Aju xjal at tnabl, in jaw tchmoꞌn tawal oc tul tkꞌij, pero aju nok in tan oc tul tkꞌij twitz tawal, ctzajel tchꞌixwi.

6 Aju xjal tzꞌaklxix, cyꞌiwlaꞌn tuꞌn Kman Dios, atzunju xjal binchal mya baꞌn, txolin tiꞌj tuꞌn mya baꞌn.

7 Aju xjal tzꞌaklxix, cucx ctzajel naꞌn tbinchben baꞌn; atzunju binchal mya baꞌn, jurat cꞌicꞌel tnaꞌl cyuꞌn xjal.

8 Aju xjal at tnabl, in xi tniman aju xnakꞌtzbil in tzaj kꞌoꞌn te, pero aju in yolin tiꞌj yol mintiꞌ tnabl, cnajel.

9 Segurxix taꞌ aju in bet tuj tumelxix; atzunju xjal nneꞌl txalpuj tiꞌj be baꞌn, che elel ke tbinchben mya baꞌn tuj kꞌanchaꞌl.

10 Aju xjal in cub t-xmutzꞌiꞌn jun tbakꞌ twitz tuꞌn tyecꞌunte ka mya ax toc aju in tmaꞌn, in tzaj tiꞌn mya baꞌn tibaj; ex aju xjal in yolin tiꞌj yol mintiꞌ ttxolil, cbel tcastiw.

11 Ke tyol ju xjal tzꞌaklxix in cykꞌoꞌn chwinklal, atzunju xjal binchal mya baꞌn, txolin tiꞌj tuꞌn mya baꞌn.

12 Aju xjal nneꞌl ticꞌun tucꞌil, nok kꞌoj in tzaj tiꞌn, atzunju xjal at tcꞌujlalil, in cub tnajsaꞌn tcyakil mya baꞌn in bant cyuꞌn xjal.

13 Aju tyol xjal at tnabl, ojtzkibl in tkꞌoꞌn, atzun teju mintiꞌ tnabl, cxel jatoꞌn jun tzeꞌ ttzal tiꞌj.

14 Ke xjal at cynabl in xi cycꞌuꞌn cyojtzkibl, atzunju cyyol ke xjal mintiꞌ cynabl in tzaj xitbil tuꞌn.

15 Aju tkꞌinumabl ju xjal kꞌinun, atzun colil tiꞌj, atzunju xjal meba, ax tmebyil in tzaj kꞌinte mya baꞌn tiꞌj.

16 Aju tcambabl jun xjal tzꞌaklxix, atzun chwinklal, atzunju xjal mya baꞌn, il in tcambaꞌn.

17 Aju xjal in tbiꞌn xnakꞌtzbil, in bet tuj be te chwinklal; atzunju xjal mintiꞌ in xi tbiꞌn, cyjaꞌ in xiꞌ tuj be in pon tuj najen.

18 Aju xjal in kꞌojl tiꞌj tucꞌil ex in cub tewan, nicꞌal yol te; ex aju xjal siꞌmil yol mintiꞌ tnabl.

19 Aju xjal in yolin tiꞌj nim yol, jacu tzpet tiꞌj; atzunju xjal in jacꞌunte ttziꞌ at tnabl.

20 Aju tyol xjal tzꞌaklxix ic tten ic tzaꞌn sak pwak tbanilxix; atzunju t-ximbetz xjal binchal mya baꞌn mintiꞌx tajben.

21 Ke tyol xjal tzꞌaklxix in ajben te jun xnakꞌtzbil cye nimcu, atzunte xjal mintiꞌ tnabl, in naj tuꞌnju mintiꞌ tojtzkibl.

22 Aju cyꞌiwbil tuꞌn Kman, atzun in kꞌonte kꞌinumabl ex mintiꞌ in tzaj tiꞌn jun bis junx tucꞌil.

23 Aju xjal mintiꞌ tnabl in tzalaj tiꞌj oc tbinchante mya baꞌn; atzunte xjal at tnabl in tzalaj tiꞌj ju tnabl at.

24 Aju mas in xob xjal binchal mya baꞌn tiꞌj, axtzunju in tzaj tiꞌj, atzunte xjal tzꞌaklxix in tcꞌmoꞌn aju tajbil.

25 Ic tzaꞌn xcyakinpaẍ in tzaj ex jurat nnicꞌ naj, ictzun in cub naj aju binchal mya baꞌn, atzunju xjal tzꞌaklxix cyjel ten te jumajx.

26 Ic tzaꞌn vinagr nnoꞌcx t-xe keꞌ bix in tzaj chyoꞌn tuꞌn, ex ic tzaꞌn in xiꞌ sib tuj kwitz, ictzun nneꞌla ju xjal cyꞌaj teju samalte te.

27 Aju xjal in niman te Kman cxel lakꞌeꞌ tuj tkꞌij, atzun cye ke binchal mya baꞌn, cꞌoquel lakꞌeꞌ tuj cykꞌij.

28 Aju in ayon ju xjal tzꞌaklxix tiꞌj, atzun tzul kꞌonte tzalajbil te, ex aju in ayon ju binchal mya baꞌn tiꞌj, mlay tcꞌam.

29 In colin Kman cyiꞌj keju in cybinchaꞌn baꞌn, pero keju binchal mya baꞌn in che naj tuꞌn.

30 Aju xjal tzꞌaklxix mlay tzicꞌ yucun tuj tlugar, atzunju xjal binchal mya baꞌn, mlayx ten twitz txꞌotxꞌ.

31 Aju xjal tzꞌaklxix in yolin tiꞌj yol at tnabl. Atzunju xjal jumajx tkꞌon tib tuj mya baꞌn, biꞌx cmayetel tuꞌn tyolin.

32 Aju xjal tzꞌaklxix in yolin tiꞌj yol txubtxaj tbinx; atzunte xjal binchal mya baꞌn oꞌcx in yolin tiꞌj yol mya tuj tumel.