2 Aju xjal in jaw tniman tib cbel tchꞌixwi; pero cyucꞌil ke xjal mans, atzun taꞌ nabl.

3 Ke xjal in che ankꞌin tuj tumel in che ẍaklunjtz tuꞌn cybinchben tzꞌaklxix; atzun ke xjal sbul, tuꞌnxju cysbubl in che naj.

4 Tuj tkꞌijlalil jwisi mlay che clet xjal tuꞌn cykꞌinumabl, atzunte xjal tzꞌaklxix oc cletel tuꞌn miꞌn tcyim.

5 Aju xjal in bet tuj tumelxix in xi jikumaꞌn tiꞌj tbe tuꞌnju tzꞌaklxix, atzunte xjal binchal mya baꞌn, ax in cub tzꞌak tuj tbinchben mya baꞌn.

6 Aju xjal tzꞌaklxix in clet tuꞌnju mintiꞌ til, atzun ke xjal binchal mya baꞌn in che tzyet tuꞌnju in pon cycꞌuꞌj tiꞌj nimcu.

7 Oc tcyim xjal mya baꞌn, ax icx cnajel aju in ayontok tiꞌj, tucꞌix aju toc tcꞌuꞌj tiꞌj.

8 Aju xjal tzꞌaklxix in clet tuj yajbil te, ex aju binchal mya baꞌn in yajlanjtz te t-xel.

9 Aju xjal binchal mya baꞌn in che naj ke tucꞌil tuꞌn tyol, atzunju xjal tzꞌaklxix in clet tuꞌn tojtzkibl.

10 Ka baꞌn taꞌ ju xjal tzꞌaklxix cycyakil xjal tuj tnam in che tzalaj; ex oc cycyim keju binchal mya baꞌn che jawil tzalaj xjal.

11 Tuꞌnju cyꞌiwbil in cycꞌmoꞌn ke xjal tzꞌaklxix in chꞌiy tnam, pero in cub xitj tuꞌn cyyol ke binchal mya baꞌn.

12 Aju xjal mintiꞌ tnabl in yolin mya baꞌn tiꞌj tucꞌil; atzunte xjal at tnabl mintiꞌ in kꞌajt.

13 Aju xjal ẍtakꞌil yol, tcyakil in baj tyolin; atzunte xjal baꞌn t-ximbetz, mintiꞌ in baj tyolin aju baꞌn tuꞌn.

14 Ka mya tuj tumel in che cawin ke cawil tuj tnam, cbel xitj tnam; pero ka at nimcu xjal at cynabl, jacu clet tnam.

15 Mya baꞌn nneꞌla te xjal in cyaj weꞌ tiꞌj tcꞌas juntl xjal mintiꞌ ojtzkiꞌn tuꞌn; atzunju xjal mintiꞌ in cyaj weꞌ tiꞌj tcꞌas juntl, in ankꞌin tuj txubtxaj.

16 Aju xuꞌj baꞌn tmod in tcꞌmoꞌn nimbil te, aju xinak at tipun tuꞌn takꞌnan in cnet kꞌinumabl tuꞌn.

17 Aju xjal baꞌn kꞌakꞌan tcꞌuꞌj tiꞌj juntl in tzaj tiꞌn baꞌn tibajx, atzunju xjal in tzalaj tuꞌn tyajlanjtz juntl tuꞌn, tibajx in tzaj tiꞌn mya baꞌn.

18 Jurat cbel naj aju cambabl in tcꞌmoꞌn xjal binchal mya baꞌn; atzunte xjal in tbinchaꞌn aju tzꞌaklxix oc tcambaꞌ twi tcꞌuꞌj mlay baj.

19 Aju xjal in tbinchaꞌn aju tzꞌaklxix, tzul kꞌoꞌn tchwinklal, atzunte xjal in tbinchaꞌn mya baꞌn, cpol tuj camic.

20 Icꞌun tuꞌn Kman ke xjal in che ximan tiꞌj tuꞌn cybinchante mya baꞌn, pero in tzalaj cyiꞌj keju mintiꞌ cypaltil.

21 Axix toc mlayx tzicꞌx tiꞌj tuꞌn miꞌn tcub tcastiw aju xjal binchal mya baꞌn, atzun ke xjal tzꞌaklxix che cletel.

22 Aju xuꞌj mejor queꞌyin ex mintiꞌ tnabl, junx taꞌ ic tzaꞌn jun xmulkꞌabaj kꞌan pwak ttxꞌotxꞌil tcub twi ttxaꞌn jun boch.

23 Aju cyajbil xjal tzꞌaklxix, tcyakil maj baꞌn nneꞌla; atzunju cychquinibil keju binchal mya baꞌn nok kꞌoj in tzaj tuꞌn.

24 At xjal baꞌn kꞌon oyaj ex in tcꞌmoꞌn mas twitzju in xi tkꞌoꞌn, ex aju xjal xcꞌa cucx ctel tuj mebayil.

25 Aju xjal baꞌn kꞌon oyaj, nok cyjaꞌ t-xiꞌ jawni; ex aju in onin tiꞌj tucꞌil, icx te oc ctzajel onin.

26 Aju xjal in cub t-xcꞌayin triw, in tzaj cykanin xjal mya baꞌn tibaj; atzunte xjal in xi tcꞌayin triw cye, in tzaj cykanin xjal cyꞌiwbil tibaj.

27 Aju xjal nnoꞌc tilil tuꞌn tuꞌn tbinchante baꞌn, in cnet xtalbil tuꞌn; atzunte xjal in jyon tiꞌj mya baꞌn, ax mya baꞌn tzul tibaj.

28 Aju xjal nnoꞌc keꞌ tcꞌuꞌj tiꞌj tkꞌinumabl, cbel tzꞌak ic tzaꞌn t-xak tzeꞌ tzkij, ex atzun ke xjal tzꞌaklxix, che oquel ic tzaꞌn tkꞌab tzeꞌ chaꞌx.

29 Aju xjal mintiꞌ in che oc tcwentin keju ateꞌ tuj tja, mintiꞌ chꞌintl cyjel ten te; aju xjal mintiꞌ tnabl, cucx ctel te tmajen ju xjal at tnabl.

30 Aju xjal tzꞌaklxix ic tten ic tzaꞌn jun tzeꞌ in tkꞌoꞌn chwinklal, atzunte xjal at tnabl, in cub tiꞌj cynabl xjal tuꞌn, tuꞌn cybet tuj be baꞌn.

31 Ka ma cub tcastiw ju xjal tzꞌaklxix tzalu twitz txꞌotxꞌ, pyortzunlo te xjal binchal mya baꞌn ex aj il, cbel tcastiw tuꞌnju otok tbincha mya baꞌn.