3 Cub nximane tuꞌn t-xi ncꞌane nim vin tuꞌntzun ntzalaje, pero mya tuꞌn tel tpaꞌn tib wanmiye tiꞌj ju nabl, ax icx o bant wuꞌne aju achbil mintiꞌx tajben, tuꞌntzun tel nnicꞌe tiꞌj ka a jlu tuꞌn tbant tuꞌn jun xjal acux itzꞌ tzalu twitz txꞌotxꞌ nok te cab kꞌij.

4 Ax icx o nbinchaye ke nmak akꞌuntl; o che jaw nbinchaꞌne ke ja tuꞌn cyajben te weye; cuꞌx wawaꞌne nim tkan uva te weye; 5 baj nbinchaꞌne ke tkambil wawale ex ke tkambil bech, ex cyujtzun ke jlu cuꞌx wawaꞌne tcyakil txcaj tzeꞌ baꞌn tlonjtz cywitz; 6 jaw nbinchaꞌne matij pil tuꞌn tchmet aꞌ tuj, tuꞌntzun tajben te aꞌlbil cye ke tzeꞌ otok che cuꞌx wawaꞌne; 7 e tzaj nlakoꞌne ke nmajene xinak ex ke nmajene xuꞌj, ex at ke nmajene xinak e ten, akeju ax e itzꞌj tuj njaye; ax icx o ten mas nim nwacẍe ex nẍneꞌle cywitz cycyakil xjal e ten nej nwitze tuj Jerusalén. 8 Baj nchmoꞌne nim kꞌan pwak ex sak pwak, akeju chojenj tzaj cykꞌoꞌn ke rey ex ke xjal cyuj mastl nasyon. Ax icx e ten wucꞌile ke xinak ex ke xuꞌj baꞌn che bitzan, ax icx e ten nim nxuꞌjile te jun tzalajbil te weye.

9 In oque te maꞌ woclene, ex mas nim nkꞌinumable o ten cywitz cycyakil xjal e ten nej nwitze tuj Jerusalén. Ex cucx o ten nnable. 10 Mi jun maj o cub nxcꞌayin wibe tiꞌj ju at nganiye tiꞌj, ex mi cyiꞌj ke achbil. O tzalaj wanmiye tiꞌj tcyakil wakꞌunbene, ex atzun tzalajbil ncꞌame tiꞌj wakꞌunbene.

11 In cub tene ximal tiꞌj tcyakilju wakꞌunbene otok bant ex nimxix otok chin sicte cyiꞌj, ex el nnicꞌe tiꞌj ka tcyakil jlu nokx gan ke, ic tten jlu ic tzaꞌn jun xjal taj tuꞌn ttzaj ttzyuꞌn cykꞌikꞌ tuꞌn tkꞌab, ex mintiꞌ jun atwit tajben tzalu twitz txꞌotxꞌ.

12 Te tibajxi in cub tene ximal tiꞌj ju xjal at tnabl ex tiꞌj ju xjal mintiꞌ tnabl: ¿Alcye mastl cbantel tuꞌn ju xinak cꞌoquel te rey oc ncyime? Mintiꞌ, porque tcyakil biꞌx ma cyaj bant wuꞌne. 13 Ex el nnicꞌe tiꞌj, mas nim tajben teju xjal tuꞌn tten tnabl twitzju tuꞌn tten mintiꞌ tnabl; ic tten jlu ic tzaꞌn spicꞌun, mas at tajben twitz klolj.

14 Aju xjal at tnabl, in che ajben ke tbakꞌ twitz tuꞌn tqueꞌyinte jatum tuꞌn tbet, atzunju xjal mintiꞌ tnabl, in bet tuj klolj. Masque icju, pero el nnicꞌe tiꞌj, aju cbajel tiꞌj jun, axtzunju cbajel tiꞌj juntl. 15 Cubtzun nximane: Aju cbajel tiꞌj ju xjal mintiꞌ tnabl, axtzunju cbajel wiꞌje, cyjaꞌtzun mintiꞌ tajben weye aju nim nabl, ax icx jlu nokx gan te. 16 Porque mi aꞌl jun ctzajel naꞌnte teju xjal at tnabl ex mi ju xjal mintiꞌ tnabl; tuꞌnju in bet tel kꞌij tcyakil nnicꞌ tnaꞌnjtz; aju xjal at tnabl ex aju xjal mintiꞌ tnabl che najel cycabil.

17 Cyjaꞌtzun el wicꞌune nchwinklale, porque tcyakilju in binchanjtz tzalu twitz txꞌotxꞌ mya baꞌn in che el te weye. Ax toc tcyakil jlu nokx gan, ic tten jlu ic tzaꞌn jun xjal taj tuꞌn ttzaj ttzyuꞌn cykꞌikꞌ tuꞌn tkꞌab. 18 Ax icx el wicꞌune tcyakil akꞌuntl otok baj nbinchaꞌne tzalu twitz txꞌotxꞌ, porque tcyakil jlu cyjel nkꞌoꞌne teju xjal cyjel ten te nxele. 19 Mintiꞌ ttxolil tiꞌj ka at tnabl ex ka mintiꞌ tnabl, pero segur taꞌ jlu: Aju cꞌoquel te nxele, atzunju cꞌoquel te tajwil tcyakil aju ma cnet wuꞌne tzalu twitz txꞌotxꞌ tucꞌil nim akꞌuntl ex tucꞌil nim nabl. Ax icx jlu nokx gan.

20 Tej twile tcyakil aju otok nbinchaye tzalu twitz txꞌotxꞌ, tzaj taꞌw tuj wanmiye tuꞌnju nimxix otok chin akꞌnane. 21 At junjun xjal ma che akꞌnan tucꞌil nabl ex ojtzkibl tiꞌj cyakꞌun, pero te tibajxi il tiꞌj cyjel cykꞌoꞌn tcyakil tuꞌn toc te juntl xjal mintiꞌ ma tzꞌakꞌnan tiꞌj tuꞌn tcnet tuꞌn. Ax icx nokx gan te jlu ex jun mya baꞌn maꞌxix.

22 Cyjaꞌtzun: ¿Ti in tcambaꞌn xjal tuꞌnju in akꞌnan wen ex oꞌcx in ximan tiꞌj takꞌun tzalu twitz txꞌotxꞌ? 23 Tuj tcyakil tankꞌibl in tzaj yajbil tiꞌj, jun iktz al jlu, porque mi te konicꞌan mintiꞌ in ojlan t-ximbetz. Ax icx nokx gan te jlu.

24 Aju mas baꞌn tuꞌn tbinchante xjal, oꞌcx tuꞌn twaꞌn, tuꞌn tcꞌan ex tuꞌn ttzalaj tiꞌj takꞌunben. Porque ma tzꞌel nnicꞌe tiꞌj, ate jlu tuꞌn Dios in tzaj kꞌoꞌn. 25 Porque, ¿alcye jun jacu waꞌn ex ka jacu tzalaj ka mya tuꞌn Dios? 26 Porque tuꞌn Dios in tzaj tkꞌoꞌn nabl, ojtzkibl ex tzalajbil teju xjal in tzalaj Dios tiꞌj; atzun teju xjal aj il, in cub tkꞌoꞌn Dios akꞌuntl tibaj tuꞌn tbaj tchmoꞌn kꞌinumabl, tuꞌntzun t-xi kꞌoꞌn teju xjal in tzalaj Dios tiꞌj. Ax icx nokx gan jlu. Ic tten jlu ic tzaꞌn jun xjal taj tuꞌn ttzaj ttzyuꞌn cykꞌikꞌ tuꞌn tkꞌab.