Tcyakil banimaj tkꞌijlalil
3
Tcyakil banimaj tkꞌijlalil tzalu twitz txꞌotxꞌ, teyle junjun tiꞌxti at tkꞌijlalil tuꞌn tbinchet:2 At tkꞌijlalil tuꞌn kul itzꞌj, ex at tkꞌijlalil tuꞌn kcyim. At tkꞌijlalil tuꞌn tcuꞌx awat awal, ex at tkꞌijlalil tuꞌn tjaw baket aju otok cuꞌx awat.
3 At tkꞌijlalil tuꞌn cycub byet xjal, ex at tkꞌijlalil tuꞌn cyoc kꞌanit. At tkꞌijlalil tuꞌn tbaj xitet jun ja, ex at tkꞌijlalil tuꞌn tjaw binchet.
4 At tkꞌijlalil tuꞌn kjaw okꞌ, ex at tkꞌijlalil tuꞌn ktzeꞌn. At tkꞌijlalil tuꞌn cybisun xjal tiꞌj jun cyimni, ex at tkꞌijlalil tuꞌn cyninkꞌijin xjal.
5 At tkꞌijlalil tuꞌn tbaj cysputun xjal abj, ex at tkꞌijlalil tuꞌn toc cychmoꞌn. At tkꞌijlalil tuꞌn ttzaj cychleꞌn cyib xjal, ex at tkꞌijlalil tuꞌn miꞌn ttzaj cychleꞌn cyib.
6 At tkꞌijlalil tuꞌn tjyet jun tiꞌxti, ex at tkꞌijlalil tuꞌn t-xi naj. At tkꞌijlalil tuꞌn t-xi cꞌuꞌt jun tiꞌxti, ex at tkꞌijlalil tuꞌn tex xoꞌt.
7 At tkꞌijlalil tuꞌn tcub sbitꞌun jun xbalun, ex at tkꞌijlalil tuꞌn tbaj xbukit. At tkꞌijlalil tuꞌn mi cyyolin xjal, ex at tkꞌijlalil tuꞌn cyyolin.
8 At tkꞌijlalil tuꞌn cycꞌujlante cyib xjal, ex at tkꞌijlalil tuꞌn tel cyicꞌun cyib. At tkꞌijlalil tuꞌn toc kꞌoj, ex at tkꞌijlalil tuꞌn tweꞌ kꞌoj.
9 ¿Ti in tcambaꞌn xjal tuꞌnju nimxix in akꞌnan? 10 Ma wile akꞌuntl ma cub tkꞌoꞌn Dios cyibaj xjal tuꞌn cyakꞌnan tiꞌj. 11 Tcyakilju o tbincha Dios puro baꞌn; ex o tbincha teylex te junjun tuj tkꞌijlalil; ax icx xi tkꞌoꞌn Dios cynabl xjal tuꞌn tel cynicꞌ tiꞌj ju at te jumajx; masque icju, pero mlay tzꞌel baj cynicꞌ xjal tiꞌj tcyakilju o tbincha Dios ex tiꞌj ju cbantel tuꞌn te tibajxi.
12 Ma tzꞌel nnicꞌe tiꞌj aju mas baꞌn tuꞌn tbant cyuꞌn xjal, atzun tuꞌn cytzalaj ex tuꞌn cybinchante baꞌn tuj tcyakil cyankꞌibl, 13 porque ka in ko waꞌn, ex ka in ko cꞌan ex ka in ko tzalaj tiꞌj ju ma kcꞌam tiꞌj kakꞌunben, in kbinchaꞌn jlu porque ax Dios ma tzaj kꞌonte ke. 14 Ax icx ma tzꞌel nnicꞌe tiꞌj, tcyakilju o tbincha Dios cyjel ten te jumajx. Mintiꞌ chꞌin atx taj tuꞌn toc tzꞌakset tiꞌj ex mintiꞌ tuꞌn tel kꞌit tiꞌj. Ma tbincha Dios icju tuꞌntzun kxob twitz. 15 Tcyakilju at jaꞌlo, attok t-xe tnejel, ex tcyakilju tzul, ya at jaꞌlo. Banin tiꞌj tuꞌn Dios tuꞌn tbant juntl maj aju o bant ojtxi.
In cybinchaꞌn xjal mya baꞌn cyiꞌj cyucꞌil
16 Ax at juntl ma wile tzalu twitz txꞌotxꞌ; mintiꞌ chꞌin baꞌn in bant cyuꞌn xjal, nok oꞌcx ju mya baꞌn in bant cyuꞌn te t-xelju tuꞌn tbant ju tzꞌaklxix cyuꞌn ex tuꞌn cyten tuj tumelxix. 17 Cyjaꞌtzun o cub nximane: Ke xjal tzꞌaklxix ex keju binchal mya baꞌn che oquel tuj xjel tuꞌn Dios tiꞌj cybinchben, porque teylex junjun tiꞌxti at tkꞌijlalil tuꞌn tbinchet.
18 Ax icx o cub nximane tiꞌj cymod xjal; niban cyoc tkꞌoꞌn Dios ke xjal tuj malbil tuꞌntzun tel cynicꞌ tiꞌj ka ic cyten ic tzaꞌn ke txcup. 19 Ax toc, ke xjal ex ke txcup junx taꞌ ju bajsbil te cyankꞌibl: Ic tzaꞌnx ke txcup in che cyim, ax icx ke xjal, ex cycyakil ke junx taꞌ cyxew. Mya mas nim t-xilen jun xjal twitz jun txcup; porque tcyakil jlu nokx gan. 20 Cycyakil in che pon baj tuj junx lugar; tiꞌj tkukil txꞌotxꞌ e jaw binchaꞌn cycyakil ex ax tkukil txꞌotxꞌ che oquel. 21 ¿Alcye jun baꞌn tuꞌn ka aju t-xew xjal in jax max tuj cyaꞌj, atzun t-xew txcup in xiꞌ max tjakꞌ txꞌotxꞌ? 22 Ma tzꞌel nnicꞌe tiꞌj, mintiꞌ juntl mas baꞌn twitzju tuꞌn ttzalaj xjal tiꞌj takꞌunben, porque atzun ma tcꞌam tuꞌn Dios, ex mi jun jacu tzaj kꞌinte te tuꞌn tlonte ti cbajel te tibajxi otokxi cyim.