4
Ax icx o wile ke xjal in che baj yajlaꞌn tzalu twitz txꞌotxꞌ, ex o wile ke xjal lu in che okꞌ tuꞌnju in che yajlanjtz ex mi aꞌl jun baꞌn tkꞌukbante cycꞌuꞌj; in che baj cꞌixbisaꞌn cyuꞌn ke yajlal cye ex mi aꞌl jun baꞌn tkꞌukbante cycꞌuꞌj. 2 Cyjaꞌtzun o nmaye: Mas at tzalajbil cye xjal o che cyim cywitz keju itzꞌx ke; 3 ex mas baꞌn ateꞌ keju naꞌnx cyitzꞌj cywitz keju o che cyim ex cywitz keju itzꞌx, porque akeju naꞌnx cyitzꞌj naꞌnx tcyil aju mya baꞌn in binchanjtz tzalu twitz txꞌotxꞌ.4 Ax icx o wile at junjun xjal in che akꞌnan wen ex baꞌn nneꞌla cyakꞌunben tuꞌn miꞌn cyoc te chꞌin cywitz ke cyucꞌil. Ax icx nokx gan jlu, ic tten jlu ic tzaꞌn jun xjal taj tuꞌn ttzaj ttzyuꞌn cykꞌikꞌ tuꞌn tkꞌab.
5 Aju xjal mintiꞌ tnabl, nok tzꞌulin ke tkꞌab ex tuꞌnx tib in naj. 6 Mas baꞌn ka nok chꞌin at ke ex in ko ankꞌin tuj txubtxaj, twitzju tuꞌn tten nim at ke ex mintiꞌ in ko ankꞌin tuj txubtxaj; ic tten jlu ic tzaꞌn jun xjal taj tzaj ttzyuꞌn cykꞌikꞌ tuꞌn tkꞌab.
7 Ax icx o wile juntl cybinchben xjal nokx gan tzalu twitz txꞌotxꞌ: 8 O wile jun xinak tjunal at, mintiꞌ jun tamiw, mi jun tcꞌwaꞌl ex mi jun terman; mintiꞌxix chꞌin in cub ten ojlal ex mintiꞌ in baj tgan tuꞌn tchmonte tkꞌinumabl, ex mintiꞌ in ximan tiꞌj jlu: ¿Al etzun cꞌajbel ju kꞌinumabl in chin akꞌnane tiꞌj ex mintiꞌ chꞌin in chin ojlane? Chiwt. Ax icx nokx gan te jlu ex jun iktz alxix te te.
Aju mojbabl tib in tkꞌoꞌn ipumalj
9 Mas baꞌn cabe xjal twitzju nok junx xjal, porque cyjaꞌtzun baꞌn cꞌelel aju akꞌuntl in bant cyuꞌn. 10 Porque ka ma cub tzꞌak jun, jacu jaw waban tuꞌn juntl. Pero becꞌbil twitz ju xjal in cub tzꞌak ex tjunalxte at, pwes mi aꞌl jun baꞌn tjaw wabante te. 11 Ax icx ka ma che cub tan cabe xjal junx, in baj cymekꞌsan cyib cycabil; katzun tjunalxte jun, ¿tzaꞌn tten tuꞌn tmekꞌt? 12 Jun xjal tjunalxte at, jacu cub tiꞌj, katzun at cabe cybet, jacu cyclonte cyib. Ax icx jun nokꞌ te ox twitz, mlay cub tzakj naj.
Aju tnabl xjal mya tiꞌj tabkꞌiyil taꞌ
13 Mas baꞌn jun cuꞌxun meba ex at tnabl, twitz jun rey tij xjal ex mintiꞌ tnabl, porque ate rey mlay tzꞌocx jun consej tuj twiꞌ. 14-15 Masque tuj pres tzꞌetz jun cuꞌxun tuꞌn tcawin, ex masque meba te tej titzꞌj, tuj ju tcawbil ma wile ke xjal ateꞌ twitz txꞌotxꞌ in che oc ten cyuwsalte tej toc te rey. 16 Ex masque mlay bant cyajlanjtz ke tnam akeju in cawin cyibaj, pero ke xjal mlay che tzalaj tiꞌj, icx ke cyiyjil ke xjal lu, akeju che ul itzꞌj te tibajxi, mlay che tzalaj tiꞌj. Ax icx nokx gan jlu ex ic tten jlu ic tzaꞌn jun xjal taj tuꞌn ttzaj ttzyuꞌn cykꞌikꞌ tuꞌn tkꞌab.