Japunx tuꞌna aju in xi ttziyana
5
Oc t-xiꞌya tuj tja Dios, ten tcwenta tiꞌja, tuꞌntzun tbinteya tyol; a jlu mas maꞌ toclen twitzju chojbil in xi cykꞌoꞌn xjal mintiꞌ cynabl, porque mintiꞌ nneꞌl cynicꞌ tiꞌj ka in cybinchaꞌn mya baꞌn.2 Miꞌn jaw tlajon tiba, mi tuꞌn ttziꞌya ex mi cyuꞌn ke t-ximbetza, tuꞌn t-xi ttziyana jun yol te Dios; ate Dios at tuj cyaꞌj ex atzun teya twitz txꞌotxꞌ taꞌya. Cyjaꞌtzun miꞌn yolina tiꞌj nim yol, 3 porque tuꞌnju nim in che ximan xjal in che cub xkꞌumsaꞌn, ex tuꞌnju nim yol in che yolin tiꞌj jacu cyma yol mintiꞌ tajben.
4 Oc t-xi ttziyana jun yol te Dios japunx naj tuꞌna, porque ate Dios mintiꞌ in tzalaj cyiꞌj ke xjal mintiꞌ cynabl. Japunx tuꞌna aju in xi ttziyana; 5 mas baꞌn tuꞌn miꞌn t-xi ttziyana twitzju tuꞌn t-xi ttziyana ex miꞌn japun tuꞌna.
6 Miꞌn takꞌa ambil tuꞌn tbinchanteya il tuꞌn ttziꞌya, ex miꞌn txi tmaꞌna teju xjal samaꞌn tuꞌn Dios ka nok xtzpeta tiꞌj. ¿Tikuꞌn taja tuꞌn ttzaj tkꞌoj Dios tiꞌj ju in tmaꞌna, ex te tibajxi tuꞌn tcub xitun takꞌunbena tuꞌn? 7 Cyjaꞌtzun, ka nim in witzcyꞌan xjal ex ka nim in yolin, mintiꞌ tajben jlu, atzun teya xoba twitz Dios.
Nokx gan ju cykꞌinumabl xjal
8 Miꞌn jaw labina tiꞌj ka ma tila tuj jun tnam in che yajlanjtz ke xjal meba ex mintiꞌ in xi binchaꞌn cyiꞌj tuj tumelxix, porque jun xjal maꞌ toclen in cyaj tjakꞌ tcawbil juntl xjal mas maꞌ toclen twitz, ex cycabil ke jlu in che cyaj tjakꞌ tcawbil juntl mas maꞌ toclen cywitz. 9 Masque icju, aju in tzaj tuj cojbil jacu tzꞌajben cye cycyakil ka ma takꞌ tib jun rey tuꞌn tonin.
10 Aju xjal toc tcꞌuꞌj tiꞌj pwak cucx taj mastl; aju xjal toc tcꞌuꞌj tiꞌj kꞌinumabl, tuj twitz ka nim at tucꞌil. Ax icx nokx gan te jlu, 11 porque ka nim at tucꞌil xjal, ax icx nim in baj tnajsaꞌn. ¿Ex ti tganar tiꞌj tuꞌn tten nim tkꞌinumabl? Oꞌcx chꞌin tganar tiꞌj tuꞌn toc tqueꞌyin. 12 Aju xjal in akꞌnan, ka nim twa in baj ex ka miꞌn, pero txubtxaj in tan; atzunju xjal kꞌinun, tuꞌn tkꞌinumabl mintiꞌ nnoꞌcx watl tuj twitz.
13 At jun mya baꞌn bisbajilxix wen ma wile twitz txꞌotxꞌ; aju tkꞌinumabl xjal in baj tchmoꞌn nnoꞌc te jun mya baꞌn te te, 14 porque ka at jun trat mya baꞌn ma tzꞌel, jacu bant txi baj tcyakil tkꞌinumabl tiꞌj; ex ka at jun tcyꞌajal, ya te tibajxi misicyer chꞌin cyjel tkꞌoꞌn te. 15 Ex ic tzaꞌnx tej tul itzꞌj tzalu twitz txꞌotxꞌ, ax icxtzun cꞌajel juntl maj: skiꞌt tiꞌj tej tul itzꞌj, ex oc tcyim misicyer chꞌin cxel tiꞌn tiꞌj takꞌunben. 16 Ax toc bisbajilxix te jlu: Ic tzaꞌnx tej tul itzꞌj te xjal twitz txꞌotxꞌ, ax icxtzun cꞌajel juntl maj. ¿Titzun ma tcamba tuꞌnju ma tzꞌakꞌnan wen ex nokx gan takꞌunben? 17 Mya oꞌcx jlu, ax icx, nok jteꞌ kꞌij oc ctel tzalu twitz txꞌotxꞌ ctel tuj bis ex tuj yajbil, tucꞌil cꞌixcꞌoj ex kꞌoj.
18 Ma tzꞌel nnicꞌe tiꞌj: Aju mas baꞌn tuꞌn tbinchante xjal, baꞌn tuꞌn twaꞌn ex tuꞌn tcꞌan, ex tuꞌn tachin tiꞌj takꞌunben, aju nim otok tzaj tkꞌoꞌn Dios, atzunte jlu aju at toclen xjal tiꞌj. 19 Ax icxtzun ke xjal in tzaj tkꞌoꞌn Dios cykꞌinumabl, ax icx in xi tkꞌoꞌn cyoclen tuꞌn cywaꞌn tiꞌj, ex tuꞌn t-xi cycꞌmoꞌn aju at cyoclen tiꞌj, porque aju tuꞌn cytzalaj tiꞌj cyakꞌunben, a jlu jun oyaj tuꞌn Dios. 20 Ate Dios cnojsalte tanmi xjal tuꞌn tzalajbil, cyjaꞌtzun mlay tzaj baj tcꞌuꞌj tiꞌj tchwinklal oc tten tzalu twitz txꞌotxꞌ.