6
At juntl mya baꞌn ma wile twitz txꞌotxꞌ in baj cyiꞌj nimcu xjal: 2 At junjun xjal in tzaj tkꞌoꞌn Dios cykꞌinumabl ex nimbil cye, ex mintiꞌ jun atx taj cye tiꞌj tcyakilju in pon cycꞌuꞌj tiꞌj; pero mintiꞌ in xi tkꞌoꞌn Dios ambil cye tuꞌn tajben tcyakil jlu cye, oꞌcx in ajben cyuꞌn junxitl xjal. Axix toc, ax icx nokx gan te jlu ex bisbajilxix. 3 Jun xinak jacu ten jun syent tcꞌwaꞌl ex jacu tzꞌankꞌin nim abkꞌi; masque nim abkꞌi tzꞌankꞌin, pero ka mintiꞌ ma tzꞌajbenxix tuꞌn tcyakilju at te, ex ka mintiꞌ ma cuꞌx makuꞌn tujxix tumel, tuj nwitze mas baꞌn jun cꞌwaꞌl cyimni oc tul itzꞌj twitzju xjal lu. 4 Porque aju cꞌwaꞌl lu nokx gan ma tzul itzꞌj, mintiꞌ ma til spicꞌun ex mi jun xjal ctzajel naꞌnte te, 5 ex masque mintiꞌ ma til kꞌij ex mintiꞌ chꞌin baꞌn tuꞌn, pero mas tuj ojlabl otok ten twitzju xjal lu, 6 ex masque ma tzꞌankꞌin xjal lu cab mil abkꞌi, pero ka mintiꞌ ma tzꞌajben tuꞌn tcyakilju at te, ¿ti tajben jlu te? Porque cycabil che xeꞌl tuj junx lugar.7 Cucx in akꞌnan xjal tuꞌntzun twaꞌn, pero mintiꞌ in noj tcꞌuꞌj. 8 ¿Alcye mas baꞌn teju xjal at tnabl twitz ju xjal mintiꞌ tnabl? ¿Alcye mas at te jun xjal meba tuꞌnju baꞌn tuꞌn tzaꞌn tten tuꞌn tankꞌin cyxol xjal?
9 Mas baꞌn aju nnoꞌc kqueꞌyin twitzju nok in pon kcꞌuꞌj tiꞌj. Pero ax icx nokx gan te jlu, ex ic tten jlu ic tzaꞌn jun xjal taj tuꞌn ttzaj ttzyuꞌn cykꞌikꞌ tuꞌn tkꞌab. 10 Aju at jaꞌlo, ojtxi ocni kꞌoꞌn tbi, ex baꞌn kuꞌn tzaꞌn tten jun xjal. Ex mlay bant toc tzokpaj jun xjal tiꞌj ju mas nim tipumal twitz. 11 Lu jun yol axix toc, ka at jun xjal nim in yolin, jacu tma nim yol mintiꞌ tajben. ¿Titzun tajben jlu te xjal? 12 Porque ¿alcye jun jacu tzꞌel tnicꞌ tiꞌj alcye mas baꞌn te xjal tuj cab ox kꞌij te tankꞌibl tuj ju nokx gan, porque aju tankꞌibl ic tten ic tzaꞌn jun xlecun jurat in cub naj. ¿Ex alcye jun jacu txi kꞌmante te xjal aju cbajel tzalu twitz txꞌotxꞌ tcyimlenxi xjal?