Baꞌn tuꞌn t-xi kkꞌoꞌn kwiꞌ tiꞌj ju mas baꞌn
7
Mas baꞌn ka ma che yolin xjal baꞌn kiꞌj twitz ju perjum tbanilxix. Mas baꞌn ju kꞌij oc kcyim twitz ju kꞌij tej kul itzꞌj.2 Mas baꞌn tuꞌn kxiꞌ jatum in che okꞌ xjal tiꞌj jun cyimni, twitzju tuꞌn kxiꞌ tuj jun ninkꞌij tja jun xjal, porque aju camic atzun bajsbil cye cycyakil xjal, ex akeju itzꞌxke baꞌn tuꞌn cyximan tiꞌj.
3 Mas baꞌn tuꞌn kjaw okꞌ twitzju tuꞌn ktzeꞌn, masque miyalnix nnoꞌc kwitz tuꞌn okꞌel, pero baꞌn jlu te kanmi.
4 Aju xjal at tnabl in ximan tiꞌj ju camic, atzunju xjal mintiꞌ tnabl oꞌcx in ximan tiꞌj tuꞌn t-xiꞌ achil.
5 Mas baꞌn tuꞌn t-xi kbiꞌn cawbil ke cyuꞌn ke xjal at cynabl, twitzju tuꞌn t-xi kbiꞌn cybitz ke xjal mintiꞌ cynabl.
6 Oc cyjaw tzeꞌn ke xjal mintiꞌ cynabl, ic che kꞌajt ic tzaꞌn chꞌiꞌx tocx tuj kꞌakꞌ in pokꞌokꞌon wen; ax icx nokx gan te jlu.
7 In tzpet tnabl xjal at tnabl tuꞌnju in che cub yajlaꞌn ke xjal, ax icx in tzpet tnabl tuꞌnju nneꞌl tiꞌn pwak cye xjal tuꞌn miꞌn tcub cysentens tuꞌn.
8 Mas baꞌn ju bajsbil te jun tiꞌxti twitz ju ttzyetlen. Mas baꞌn tuꞌn tten kpasens twitzju tuꞌn koc jawni kwitz.
9 Miꞌn takꞌa ambil tuꞌn ttzaj naj tkꞌoja, porque aju kꞌoj atzun in cybinchan xjal mintiꞌ cynabl.
10 Miꞌn tmaya: ¿Tikuꞌn mas baꞌn ke tyemp o che baj twitzju te jaꞌlo? Porque jun xjal at tnabl mlay tma icju.
11 Aju tuꞌn tten knabl, junx taꞌ ic tzaꞌn jun ketzbil, ex at tajben cye ke xjal najlke twitz txꞌotxꞌ. 12 Porque aju nabl in colin tiꞌj xjal, ax icx ju pwak in colin tiꞌj; pero mas baꞌn ka at tnabl xjal, porque aju nabl in tkꞌoꞌn chwinklal.
13 Kꞌonc tcwenta tiꞌj aju o tbincha Dios: ¿Alcye jun jacu txi tjikumaꞌn tiꞌj aju jaw t-ẍocpiꞌn Dios tiꞌj? 14 Ka baꞌn taꞌya, tzalajxa tuꞌn jlu; katzun mya baꞌn taꞌya, tencuya ximal tiꞌj, tzaꞌnx ju tzalajbil icx ju bis tuꞌn Dios in che tzaj, ex mlayx tzꞌel tnicꞌ xjal tiꞌj aju ctzajel tiꞌj te tibajxi.
15 Nimcu o wile tuj nchwinklale nokx gan: At xjal baꞌn cymod pero in che cyim naj masque baꞌn cymod, ex at xjal mya baꞌn cymod in che ankꞌin nim abkꞌi masque mya baꞌn cybinchben.
16 Miꞌn tzꞌoc tkꞌon tiba te tzꞌaklxix wen ex miꞌn tzꞌoc tkꞌon tiba at-xix tnabla. ¿Tikuꞌn taja tuꞌn tcyim naja?
17 Miꞌn tzꞌoc tkꞌon tiba te jumajx mya baꞌn, ex miꞌn tzꞌoca mintiꞌ tnabla. ¿Tikuꞌn taja tuꞌn tcyima naꞌnxtok tpon kꞌij tuꞌn tnaja?
18 Aju mas baꞌn, tzyumxixa ke jlu wen, ex miꞌn cheꞌx ttzokpiꞌna. Aju xjal in niman te Dios tcyakil baꞌn cꞌelel te te.
19 Aju xjal at tnabl, nnoꞌc mas tipumal cywitz laj xjal in che cawin tuj jun tnam.
20 Ax toc mi aꞌl jun xjal at twitz txꞌotxꞌ tzꞌaklxix wen in tbinchaꞌn aju baꞌn ex bajx binchan il.
21 Miꞌn tzꞌoc tena bilte tcyakil yol in che yolin xjal tiꞌj, tuꞌntzun miꞌn tbinteya oc toc ten tmajena yolil mya baꞌn tiꞌja. 22 Porque baꞌn jlu tuꞌna, ax icx teya nimcu maj ma yolina mya baꞌn cyiꞌj mastl.
O jyon Salomón tiꞌj tuꞌn toc tnabl
23 Tcyakil jlu o baj nximane tiꞌj tucꞌil nabl, ex o wajbeye tuꞌn woque at nnable; pero mintiꞌx in oque at nnable. 24 Cyuw tuꞌn tel nnicꞌe tiꞌj tcyakilju at. Puro cyuw wen ex mi jun jacu tzꞌel tnicꞌ tiꞌj.
25 Xi nkꞌon wibe tuꞌn tcnet ojtzkibl wuꞌne, tuꞌn nxnakꞌtzane tiꞌj ex tuꞌn njyone alcyexix t-xilen tcyakil. Ex el nnicꞌe tiꞌj ka mya baꞌn tuꞌn koc mintiꞌ knabl.
26 At juntl ma tzꞌel nnicꞌe tiꞌj mas bis twitz camic: Aju xuꞌj aj pajil ic tten t-ximbetz ic tzaꞌn jun cꞌobil ex ke tkꞌab ic tzaꞌn jun caden tuꞌn ttzyet xjal tuꞌn. Pero aju xjal in tzalaj Dios tiꞌj oc cletel tuꞌn twitz ju xuꞌj lu, atzunju xjal aj il cbel tzꞌak tuj tcꞌobil xuꞌj lu.
27 Aju nximbetze tuꞌn tel nnicꞌe tiꞌj t-xilen junjun tiꞌxti, akine pacbal, ex atzun jlu o wile: 28 Naꞌnx tel nnicꞌe tiꞌj aju wajbile tuꞌn tel nnicꞌe tiꞌj. Cyxol jun mil xinak oꞌcx junx tzꞌaklxix cnet wuꞌne, atzun cyxol jun mil xuꞌj mi jun tzꞌaklxix o cnet wuꞌne. 29 Oꞌcxtzun jlu ma tzꞌel nnicꞌe tiꞌj: Tzꞌaklxix te xjal baj tbinchaꞌn Dios nej, pero tuꞌnxtzun te xjal xi tjyoꞌn nimcu mya baꞌn.