2 Japunx ke tley rey tuꞌna ic tzaꞌnx o txi ttziyana twitz Dios. 3 Miꞌn tzꞌetz ojkelina twitz. Miꞌn tzꞌoc tkꞌon tiba tiꞌj jun tiꞌxti mya baꞌn, porque jacu tbincha rey tiꞌja nok alcye tajbil tuꞌn tbant. 4 Maꞌxix toclen tyol rey ex alcye jun jacu kꞌmante te: ¿Ti in bant tuꞌna, chiwt?

5 Aju xjal in japun ley tuꞌn, mlay tzaj jun mya baꞌn tiꞌj, ex aju xjal at tnabl, nneꞌl tnicꞌ tiꞌj jtoj tuꞌn tbant aju in tmaꞌn rey ex tzaꞌn tten tuꞌn tjapun tuꞌn. 6 Ax toc at jun kꞌij ex jun tmodiyil tuꞌn tbinchet tcyakil aju in binchanjtz, pero aju mas cyuw teju xjal atzun jlu: 7 Mintiꞌx baꞌn tuꞌn aju ctzajel te tibajxi, ex mi aꞌl jun jacu tzaj kꞌmante te jtoj tuꞌn ttzaj.

8 Mi aꞌl jun jacu ten tipumal tiꞌj tchwinklal tuꞌn miꞌn tcyim, ax icx mi aꞌl jun jacu kꞌmante alcye kꞌij tuꞌn tcyim. Mi aꞌl jun jacu tzokpaj tuꞌn miꞌn tten tuj kꞌoj lu. Aju xjal mya baꞌn mlay colin tbinchben mya baꞌn tiꞌj tuꞌn tclet.

9 Tcyakil jlu ma wile tej t-xi nkꞌonxix wibe tuꞌn tel nnicꞌe tiꞌj aju in bant tzalu twitz txꞌotxꞌ, ex aju tipumal xjal at tuꞌn tbinchante mya baꞌn tiꞌj juntl.

10 Ax icx o wile ke xjal mya baꞌn in che cuꞌx makuꞌn tucꞌil nimbil cye. Atzun ke xjal nim cygan tuꞌn cyten tuj Lugar Xjan, jurat nnicꞌ cynaꞌnjtz cyuꞌn ke xjal tuj tnam jatum otok cybincha ju tzꞌaklxix. Ax icx nokx gan jlu, 11 porque tuꞌnju mintiꞌ in cub kꞌoꞌn naj tcastiw xjal tiꞌj tbinchben mya baꞌn, tuꞌntzun jlu oꞌcx in che ximan xjal tiꞌj tuꞌn cybinchante mya baꞌn. 12 Masque binchan xjal il nimcu maj ex masque nim abkꞌi ten tzalu twitz txꞌotxꞌ, pero aju weye baꞌn wuꞌn akeju xjal in che niman te Dios ex in che xob twitz, baꞌn cꞌelel tcyakil te cye; 13 atzun cye ke xjal binchal mya baꞌn, mya baꞌn cꞌelel te cye ex mya nim kꞌij che tel twitz txꞌotxꞌ; ic che oquel ic tzaꞌn jun xlecun jurat in cub naj, porque mintiꞌ in che xob twitz Dios. 14 Cyjaꞌtzun, nimcu aju mya tuj ttxolil in binchanjtz tzalu twitz txꞌotxꞌ: Ke xjal baꞌn cymod, in tzaj mya baꞌn cyibaj, mer ic tzaꞌn mya baꞌn ke, ex atzun ke xjal binchal mya baꞌn in che tzalaj, mer ic tzaꞌn puro baꞌn ke. Tuj weye nwitz ax icx nokx gan te jlu.

15 Cyjaꞌtzun in xi nmaꞌne, mas baꞌn tuꞌn ktzalaj. Aju mas baꞌn tuꞌn cybinchante xjal tzalu twitz txꞌotxꞌ, baꞌn tuꞌn cywaꞌn ex tuꞌn cycꞌan ex baꞌn tuꞌn cytzalaj, porque oꞌcxtzun jlu jacu bant cyuꞌn tiꞌj cyakꞌunben cyuj ke kꞌij te cyankꞌibl ctzajel tkꞌoꞌn Dios tzalu twitz txꞌotxꞌ.

16 Xi nkꞌon mastl wibe tuꞌn nxnakꞌtzane ex tuꞌn tel nnicꞌe tiꞌj ex tuꞌn ticꞌ nwitze tiꞌj tcyakil aju in bant tzalu twitz txꞌotxꞌ, (porque at junjun xjal mi konicꞌan ex mi kꞌijtl mintiꞌ in che tan,) 17 ex ma tzꞌel nnicꞌe tiꞌj, ate xjal mlay tzꞌel tnicꞌ tiꞌj ju in tbinchaꞌn Dios ex mi aju in baj tzalu twitz txꞌotxꞌ. Masque tzꞌoc tkꞌoꞌn tilil tuꞌn tel tnicꞌ tiꞌj aju in bant tuꞌn Dios, pero mlayx tzꞌel tnicꞌ tiꞌj; ex masque tma jun xjal at tnabl ka ojtzkiꞌn tuꞌn, pero mintiꞌ nneꞌl tnicꞌ tiꞌj.