Aju ximbetz tiꞌj chwinklal ex camic
9
In cub tenxixe ximal tiꞌj ex ma tzꞌel nnicꞌe tiꞌj, cyakꞌunben ke xjal tzꞌaklxix ex ke xjal at cynabl atzun taꞌ tuj tkꞌab Dios. Ate xjal misicyer baꞌn tuꞌn ka ccꞌujlanjtzel ex ka cꞌelel icꞌun. 2 Cyjaꞌtzun, aju cbajel tiꞌj jun xjal, axju cbajel cyiꞌj cycyakil xjal; aju cbajel tiꞌj ju xjal tzꞌaklxix, axju cbajel tiꞌj ju xjal mya tzꞌaklxix; aju cbajel tiꞌj ju xjal baꞌn tmod, axju cbajel tiꞌj ju xjal mya baꞌn tmod; aju cbajel tiꞌj ju xjal ttxꞌjon tib, axju cbajel tiꞌj ju xjal mya ttxꞌjon tib; aju cbajel tiꞌj ju xjal in xi kꞌonte chojbil, axju cbajel tiꞌj ju mintiꞌ in xi tkꞌoꞌn chojbil; aju cbajel tiꞌj ju xjal baꞌn, axju cbajel tiꞌj ju xjal aj il; aju cbajel tiꞌj ju xjal in xi ttziyan jun yol twitz Dios, axju cbajel tiꞌj ju xjal mintiꞌ in xi ttziyan jun yol twitz Dios.3 Atzunju mya baꞌn lu in tzaj cyibaj cycyakil xjal tzalu twitz txꞌotxꞌ: Aju cbajel tiꞌj jun, axtzunju cbajel cyiꞌj cycyakil. Ax icx t-ximbetz xjal nojni tuꞌn mya baꞌn acux itzꞌx mya tuj tumel taꞌ t-ximbetz; te tibajxi jlu in cyimtzun.
4 At mas oybil teju xjal acux itzꞌx; mas baꞌn jun txꞌyan itzꞌ, twitz jun balun cyimni. 5 Porque ke xjal itzꞌx ke, baꞌn cyuꞌn ka oc che cymel, atzun ke xjal cyimni ke, mintiꞌ baꞌn cyuꞌn ex mintiꞌtl twiꞌ cycꞌuꞌj in cycꞌmoꞌn, ex mi aꞌl jun in tzaj naꞌnte cye. 6 Atzun in cub naj cycꞌujlalil ex cyicꞌbil ex tloꞌch cycꞌuꞌj, mintiꞌtl cyoclen tiꞌj tcyakilju in bant tzalu twitz txꞌotxꞌ.
7 Txiꞌya ex waꞌnxa twaya tucꞌil tzalajbil, tzalajxa tiꞌj tcꞌaꞌya taꞌl twitz uva, porque aju takꞌunbena baꞌn ma tzꞌel tuj twitz Dios. 8 Cucx kꞌon oca t-xbaluna puro sak queꞌyin ex cucx kꞌon jaxa perjum tuj twiꞌya. 9 Tzalajxa tuj tankꞌibla tucꞌil t-xuꞌjila cꞌujlaꞌnxix tuꞌna, porque tcyakil kꞌij tankꞌibla ma tzaj tkꞌoꞌn Dios twitz txꞌotxꞌ nokx gan, ex oꞌcx jlu in tcambaꞌna tuꞌnju nimxix in akꞌnana twitz txꞌotxꞌ. 10 Ex tcyakilju at tuꞌn tbant tuꞌna, tzꞌoc tililx tuꞌna tuꞌn tbant, porque oc tpona ma tuj cynajbil cyimni, mi jun tiꞌxti cbantel tuꞌna ex mintiꞌ jun tuꞌn t-ximana tiꞌj, porque ma chixin mintiꞌ nabl ex mintiꞌ ojtzkibl at.
Mya tuj tumel aju in baj cyiꞌj xjal
11 At mastl ma wile tzalu twitz txꞌotxꞌ: Mya tuꞌnju cyuw che kelan xjal jacu che camban tiꞌj ojkelbil, ex mya tuꞌnju cyuw cycꞌuꞌj xjal tuj kꞌoj jacu che camban tuj kꞌoj; mya tuꞌnju at cynabl xjal jacu cnet cyuꞌn, ex mya tuꞌnju list ke xjal jacu che oc te kꞌinun; mya tuꞌnju xnakꞌtzamni ke xjal jacu cycꞌam jun xtalbil; tcyakil jlu según t-swert xjal. 12 Porque mi jun xjal baꞌn tuꞌn jtoj baꞌn tpon or tuꞌn tcyim; ic tzaꞌn ke cyiẍ in che tzyet tuꞌn xyub, ex ic tzaꞌn ke chyuꞌj in che tzyet tuꞌn cꞌobil; icxtzun tten xjal, masque mintiꞌ ximan tuꞌn, pero nok minaben in tzaj mya baꞌn tibaj.
13 At juntl ma wile tzalu twitz txꞌotxꞌ ex ma tzꞌoc te jun xnakꞌtzbil maꞌ t-xilen te weye: 14 At jun tal tnam chꞌin ex mya nim xjal najl tuj, oc tzokpaj jun rey nim tipumal tiꞌj ex baj cytxolban cyib ke t-soldad rey tiꞌjele ex jaw cybinchaꞌn cyxweꞌtzbil tiꞌjele tuꞌntzun cyocx tuj. 15 Ex tuj tnam lu najltok jun xinak meba pero at tnabl, ex tuꞌnju at tnabl o clet tnam tuꞌn, pero ya te tibajxi mi jun tzaj naꞌnte teju xinak lu.
Mas at tajben nabl twitz tcyakil tiꞌxti
16 Entons o nmaye cyjaꞌ: Masque mintiꞌ in xi niman tyol jun xjal at nabl ex mi aꞌl jun in xi tkꞌoꞌn twiꞌ tiꞌj ju in tmaꞌn, pero mas baꞌn tuꞌn koc at knabl twitzju tuꞌn koc cyuw kcꞌuꞌj.
17 Aju yol in xi kꞌmet tuj cheba tuꞌn jun xjal at tnabl, mas in xi biꞌn twitz tyol jun xjal in schꞌin wen toc te nejenel cye ke xjal mintiꞌ cynabl.
18 Mas baꞌn ju nabl cywitz ke ubl in che ajben tuj kꞌoj. Nok tuꞌn jun xjal aj il jacu tzaj nimcu mya baꞌn tuꞌn.