10
Tuꞌn jun us cyimni in tzuwix tbanil perjum tuꞌn. Cyjaꞌtzun, masque nok chꞌin tchcyinil ju xjal at tnabl, pero tuꞌn jlu jacu tzꞌoc ic tzaꞌn jun xjal mintiꞌ tnabl ex mintiꞌ nimbil te.2 Aju t-ximbetz ju xjal at tnabl oꞌcx toc tiꞌj ju baꞌn, atzunju xjal mintiꞌ tnabl oꞌcx toc t-ximbetz tiꞌj ju mya baꞌn.
3 Aju xjal mintiꞌ tnabl, tiꞌj tcyakilju in tbinchaꞌn in tyecꞌun tib ka mintiꞌ tnabl, ex in tmaꞌn ka ake txkantl mintiꞌ cynabl.
4 Ka ma tzaj tkꞌoj cawil tiꞌja, miꞌn cyaj tcolina toclena; porque ka ma cub tmansin tiba, cꞌicꞌex tiꞌj nimcu mya baꞌn.
5 At jun mya baꞌn ma wile tzalu twitz txꞌotxꞌ ex a jlu in bant cyuꞌn ke cawil: 6 Aju xjal mintiꞌ tnabl nnoꞌc kꞌoꞌn toclen mas maꞌ, ex atzun teju xjal maꞌ t-xilen nnoꞌc kꞌoꞌn toclen mas chꞌin. 7 O wile ke majen in che bet cyjax ke cyibaj chej, ex atzun ke xjal maꞌ cyoclen in che bet tuꞌn cykan, mer ic tzaꞌn majen ke.
8 Aju xjal in cuꞌx lacunte jun jul, tujx jul lu cxel tzꞌak. Aju xjal in cub tilin te tapya, cꞌoquel txꞌaꞌn tuꞌn lobaj.
9 Aju xjal in xpelin tiꞌj abj, jacu bant ttzaꞌw tuꞌn abj. Aju xjal in txꞌemin siꞌ, jacu bant tcub ttxꞌemin tib.
10 Ka ma baj ttziꞌ siꞌwbil cꞌuxbil ex ka mintiꞌ ma cub jakut ttziꞌ juntl maj, taj nim kipun tuꞌn ttxꞌemit siꞌ tuꞌn. Mas baꞌn tuꞌn tbant tcyakil tuj tumel ex tucꞌil nabl.
11 Ka mintiꞌ ma cub mansin lobaj ex ka ma tzꞌoc txꞌaꞌn jun xjal tuꞌn, mintiꞌ tajben jlu teju xjal baꞌn cyoc lobaj mans tuꞌn.
12 Ke tyol ju xjal at tnabl mejorxix tbinx, atzun ke tyol ju xjal mintiꞌ tnabl in che ajben te xitbil te te,
13 nnoꞌc ten kꞌmalte ke yol mintiꞌ cynabl ex aju bajsbil te tyol, mas plojxix.
14 Aju xjal mintiꞌ tnabl, mintiꞌ in baj tgan tuꞌn tyolin. Mi jun xjal baꞌn tuꞌn aju cbajel yajxi, porque ¿alcye jun jacu tzꞌel tnicꞌ tiꞌj ju tzul te tibajxi?
15 Aju xjal mintiꞌ tnabl in baj tbyon tib tiꞌj akꞌuntl, ex mintiꞌlpe baꞌn tuꞌn aju be in pon tuj tnam.
16 Becꞌbil twitz nasyon aju toc jun cꞌwaꞌl te rey tuj, ex ke xjal maꞌ cyoclen ateꞌ tuj, primxix nnoꞌc nintz waꞌn cyuꞌn.
17 At tzalajbil teju nasyon aju toc jun xjal baꞌn tnabl te rey tuj, ex ke mastl xjal in che cawin tuj in che waꞌn ic tzaꞌnx or te wabl, tuꞌn toc t-xel cyipun otok baj ex mya tuꞌn tchyoꞌn cywiꞌ.
18 Aju xjal cyꞌaj in tzaj tilj twi tja; ka mintiꞌx ma tbincha tiꞌj, cbel tilj tcyakil tja.
19 Aju pan, atzun tajben tuꞌn kwaꞌn tiꞌj; ex aju taꞌl twitz uva, atzun tajben tuꞌn ktzalaj; ex aju pwak at tajben tiꞌj tcyakil.
20 Miꞌn yolina mya baꞌn tiꞌj rey ex miꞌn cub t-ximana jun mya baꞌn tiꞌj. Miꞌn yolina mya baꞌn tiꞌj xjal kꞌinun masque junx teya at, porque ke chyuꞌj baꞌn che lipan twitz cyaꞌj jacu cheꞌx kꞌmalte cye.