Aju tyol xinak
7
Tbanilxix che queꞌyin ke tkana cyuj ke t-xajbiya, ic ttena ic tzaꞌn tmeꞌjel rey. Ke twi t-xixa ic cyten ic tzaꞌn ke adorno kꞌan pwak tzꞌumin cywitz binchamaj cyuꞌn xjal at-xix cynabl tiꞌj.2 Aju tmuxa mer ic tzaꞌn jun copa seꞌw tten mintiꞌ in cub naj tbanil taꞌl twitz uva tuj; aju tcꞌuꞌja mer ic tzaꞌn jun byuj triw ex txolsaꞌn ke bech tiꞌjele.
3 Ke tima mer ic tzaꞌn cabe tal ttxu masat yoꞌẍ.
4 Aju tkula mer ic tzaꞌn jun ja maꞌ twaꞌl sakxix queꞌyin; ke tbakꞌ twitza mer ic tzaꞌn cabe pil aꞌ ateꞌ tuj tnam Hesbón, akeju cycub ttxlaj pwert Bat-rabim; aju ttxaꞌna ic tten ic tzaꞌn ju ja maꞌ twaꞌl at twi witz Líbano, aju cyjaꞌ in xi tqueꞌyin tumlal tnam Damasco.
5 Aju twiꞌya ic tten ic tzaꞌn ju witz Carmelo; aju ttzmal twiꞌya mer ic tzaꞌn nokꞌ ẍjulin queꞌyin ex in koptzꞌaj; tzyuꞌn rey tuꞌn ttzmal twiꞌya xpaltxꞌiꞌn tten.
6 Aya xuꞌj at nimxix ncꞌujlalile tiꞌja, achbajilxixa ex tbanilxix queꞌyina.
7 Aju twaꞌla mer ic tzaꞌn twaꞌl jun palma; ex ke tima mer ic tzaꞌn t-rasimil twitz palma.
8 In chin ximane tiꞌj tuꞌn njaxe twi tkan palma lu ex tuꞌn woque te tajwil ke twitz. Ke tima ic cyten ic tzaꞌn ke t-rasimil twitz uva; aju t-xewa mer ic tzaꞌn tcꞌocꞌjal mansan;
9 aju tuj ttziꞌya puro chiꞌ ic tzaꞌn taꞌl twitz uva tbanilxix, cheba in kꞌilin tuj ttziꞌya ex cyxol ke twitz teꞌya.
Aju tyol xuꞌj
10 Akine te teju xinak cꞌujlaꞌnxix wuꞌne; tuꞌnju at nimxix tgan wiꞌje nnuꞌl wucꞌile.
11 Chuxa xinak cꞌujlaꞌnxix wuꞌne, koꞌ tuj cojbil. Cꞌelex konicꞌan kuꞌn cyxol tkan bech nimxix cycꞌocꞌjal.
12 Te prim ko xeꞌl cyxol tkan uva queꞌyilte ka at cyxul, ka o pokꞌchaj cyxmacal, ex ka o che xmacalin ke carnad ẍokꞌ. Atzun cxel nmaꞌne teya ka cꞌujlaꞌnxixa wuꞌne.
13 Ke twitz mandrágora cꞌocꞌj ticꞌ cycꞌocꞌjal. Twitz tlamel kja at tcyakil txcaj twitz awal baꞌn tloꞌnjtz; ke twitz awal tzkijsaꞌn ex twitz awal cꞌitzke che cub kꞌiꞌn, tcyakil jlu ma tzꞌel npaꞌne te teya, aya xinak cꞌujlaꞌnxixa wuꞌne.