Coro
6
¿Jatumtzun ma txiꞌ aju xinak cꞌujlaꞌnxix tuꞌna, aya tbanilxix queꞌyin cywitz mastl xuꞌj? ¿Tzaꞌn ma txiꞌ? Ko xeꞌle tucꞌila jyolte te.Aju tyol xuꞌj
2 Aju xinak cujlaꞌnxix wuꞌne ma txiꞌ tuj tkan tawal, tuj tkan bálsamo cꞌocꞌjxix, ma txiꞌ pastoril cye t-ẍneꞌl ex kꞌilte bech.
3 Weye aju xinak cꞌujlaꞌnxix wuꞌne ex akine te te. In pastorin cyiꞌj ke t-ẍneꞌl cyxol tkan bech.
Tjweꞌyin bitz
Aju tyol xinak
4 Aya xuꞌj at-xix ncꞌujlalile tiꞌja, tbanilxix queꞌyina ex achbajilxixa ic tzaꞌn ke nintz tnam Tirsa ex Jerusalén; xobajilxixa ic tzaꞌn jun cꞌloj soldad cyjaꞌ cyxiꞌ tuj kꞌoj.
5 Miꞌn cucx tzaj tqueꞌyina wiꞌje, porque ma cub wiꞌje cyuꞌn ke tbakꞌ twitza.
Aju ttzmal twiꞌya ic queꞌyin ic tzaꞌn ke tal chip in che tꞌicpaj cywi witz tuj Galaad.
6 Cycyakil twitz teꞌya tzꞌaklxix ateꞌ, mer ic tzaꞌn txkan ẍneꞌl matok tbajlen txꞌjoꞌn cyiꞌj, teyle junjun yoꞌẍ tal ex mintiꞌ jun miban alin.
7 Ke tkꞌoꞌtxa ic che queꞌyin ic tzaꞌn cabe piẍ carnad ẍokꞌ cyewan cyib tujxi ju txaybil twitza.
8 Sesenta cybet ke xuꞌj rey, akeju t-xuꞌjil rey, 80 cybet keju toc cyoclen te tcabin t-xuꞌjil rey, ex nimcu cyajlal ke kꞌapoj,
9 pero aju weye nxuꞌjil ic tten ic tzaꞌn jun tal palom mintiꞌ tpaltil; oꞌcxcu jun at, mintiꞌ juntl ic tzaꞌn te, oꞌcxcu te cꞌujlaꞌn tuꞌnju xuꞌj tzaj alinte te. Oc toc queꞌyin cyuꞌn kꞌapoj, in cymaꞌn tuj tzalajbil taꞌ; ex in jaw nimsaꞌn cyuꞌn ke xuꞌj rey, akeju t-xuꞌjil rey, ex cyuꞌn keju toc cyoclen te tcabin t-xuꞌjil rey.
Coro
10 ¿Alcyeju xuꞌj in lakꞌeꞌ ttzaj ic tzaꞌn in tzaj spicꞌeꞌ t-xe cyaꞌj? Tbanilxix queꞌyin ic tzaꞌn queꞌyin xjaw, in koptzꞌaj ic tzaꞌn tkan kꞌij, xobajilxix ic tzaꞌn jun cꞌloj soldad cyjaꞌ cyxiꞌ tuj kꞌoj.
Aju tyol xuꞌj
11 In cuꞌxe jatum taꞌ tkan tzeꞌ nogal tuꞌn t-xi nqueꞌyine chaꞌx cꞌul ttzi tkꞌab xak, tuꞌn toc nqueꞌyine ka otok tzaj cyxul tkan uva, ex ka otok tzꞌoc cyxmacal carnad ẍokꞌ.
12 Te tibajxi ya mintiꞌ o nbiye ti o baj, nok oꞌcx tej nnaꞌnteye ya otok chin jaxe tuj tcarwaj aju nejenel at tuj ntanmiye.
Coro
13 Tajtz meltzꞌaja aya xuꞌj aj Sulamita, tajtz meltzꞌaja. Tajtz meltzꞌaja, kajbile tuꞌn toc kqueꞌyine twitza.
Aju tyol xuꞌj
¿Alcyetzun cyajbile tuꞌn toc cyqueꞌyine tiꞌj ju xuꞌj aj Sulamita?
Coro
Jun bixbil, ic tzaꞌn ju bixbil nnoꞌc cyuj ke campament.