Aju tyol xinak
5
Ma chin ocxe tuj tkan wawale, aya wanbe, aya xuꞌj in chin yoline tucꞌila tuꞌn kmojeꞌ. Ma tzaj wiꞌne tkꞌolil tzeꞌ mirra ex ke perjum etzan wuꞌne, ma txi nnicꞌbeꞌne aju taꞌl cab at wucꞌile, ex ma txi ncꞌane taꞌl twitz uva ex aju lech at wucꞌile.Coro
Akeye wamiwoye at ncꞌuꞌje cyiꞌje, che waꞌne ex che cꞌane nok nicꞌpun cyajbile.
Tcyajin bitz
Aju tyol xuꞌj
2 In chin tantoke, pero itzꞌxtok wanmiye, ex o nbiye aju xinak cꞌujlaꞌnxix wuꞌne in kꞌajt ttzi tlamel ja, chi cyjaꞌ: Jakoꞌncxa ja aya wanbe, aya xuꞌj at ncꞌujlalile tiꞌja, ic ttena ic tzaꞌn jun tal palom mintiꞌ tpaltil. Aju nwiꞌye ma tzꞌacꞌ tuꞌn tkꞌab cheꞌw. Aju tkꞌab cheꞌw in cub konicꞌan ma cub tibaj ttzmal nwiꞌye, chi xinak.
3 Ma tzꞌel wiꞌne nxbalune; ¿cꞌoquelpe nkꞌoꞌne juntl maj? Ma che baj ntxꞌjoꞌne cyiꞌj nkane. ¿Ocpe che tzꞌilixtel juntl maj wuꞌne? Nchiye.
4 Aju xinak cꞌujlaꞌnxix wuꞌne, octz tkꞌoꞌn tkꞌab tuj toyꞌ tlamel ja. Tuꞌn jlu tzaj putin wanmiye tuꞌn bis.
5 In jawtzun weꞌye jakol ja twitz ju xinak cꞌujlaꞌnxix wuꞌne. Cyiꞌj ke nkꞌabe ex ke tal nkꞌabe e jeꞌl txutin taꞌl mirra ex e cub tzꞌak tibaj pasador te tlamel ja.
6 Tej nbinteye lu in yolintok, o nnaꞌye mer ic tzaꞌn chꞌixtok ncyime.
Octztzun njakoꞌne ja twitz ju xinak cꞌujlaꞌnxix wuꞌne, pero mi aꞌltok at ttzi ja. In oc tene jyol tiꞌj pero mintiꞌ cnet wuꞌne, tzaj ntxcoꞌne pero mintiꞌ in tzaj tzakꞌweꞌne tuꞌn.
7 In cnete cyuꞌn ke xkꞌukil in che bet tuj tnam; in baj cꞌixbisaꞌne ex nim ẍil oc wiꞌje cyuꞌn; keju in che xkꞌukin ttzi tpwertil tnam el cyiꞌn tucꞌil txꞌuꞌjbil aju xbalun toc te txaybil nwitze.
8 Akeye xuꞌj aj Jerusalén, ka ma cyile aju xinak cꞌujlanxix wuꞌne, cytziyantze weye tuꞌn t-xi cymaꞌne te, lu kine chꞌix ncyime tuꞌnju at-xix ncꞌujlalile tiꞌj.
Coro
9 ¿Alcyetzun tbanilxix nnoꞌc tqueꞌyina tiꞌj ju xinak cꞌujlaꞌnxix tuꞌna, aya tbanilxix queꞌyin cywitz mastl xuꞌj? ¿Alcyetzun tbanilxix nnoꞌc tqueꞌyina tiꞌj ju xinak cꞌujlaꞌnxix tuꞌna, tuꞌnju in tzaj tmaꞌna tuꞌn t-xi kmaꞌne ju yol lu te?
Aju tyol xuꞌj
10 Aju xinak cꞌujlaꞌnxix wuꞌne cyak xjal ex in koptzꞌaj twitz, mi aꞌl juntl in pon queꞌyin ic tzaꞌn te cyxol laj mil xinak.
11 Aju twiꞌ mer ic tzaꞌn kꞌan pwak tbanilxix; aju ttzmal twiꞌ coloch, kꞌek queꞌyin ic tzaꞌn tiꞌj jun joj.
12 Ke tbakꞌ twitz ic che queꞌyin ic tzaꞌn ke palom otok che baj chin tuj lech ex cyocxsaꞌn ke tujxix cylugaril;
13 ke tkꞌoꞌtx ic che queꞌyin ic tzaꞌn tkan awal bálsamo nim tcꞌocꞌjal. Ke ttxoꞌw ttziꞌ ic che queꞌyin ic tzaꞌn bech ex cyuj nneꞌtz tzꞌujin taꞌl mirra;
14 ke tkꞌab mer ic tzaꞌn jun xmulkꞌabaj kꞌan pwak cyocsaꞌn ke tal abj tiꞌj topasio cybi; aju t-ximlal mer ic tzaꞌn marfil tzꞌumin twitz ex cyocsaꞌn ke tal abj tiꞌj zafiro cybi;
15 ke tkan mer ic tzaꞌn tkan ja binchamaj tiꞌj abj mármol, cycubsaꞌn cyibaj ke cykꞌukbil kꞌan pwak cytxꞌotxꞌil; kꞌanchaꞌlxix che queꞌyin ic tzaꞌn che queꞌyin ke tzeꞌ wiꞌten ateꞌ twi witz Líbano;
16 aju yol nneꞌtz tuj ttziꞌ puro chiꞌ. Tbanilxix ju xinak lu tuj tcyakil.
Cyjaꞌtzun tten aju xinak cꞌujlaꞌnxix wuꞌne ex wamiwoye, akeye xuꞌj aj Jerusalén.