2 Tcyakil twitz teꞌya tzꞌaklxix ateꞌ, mer ic tzaꞌn txkan ẍneꞌl matok tbajlen txꞌjoꞌn cyiꞌj, teyle junjun yoꞌẍ tal, ex mintiꞌ jun miban alin.

3 Ke ttxoꞌw ttziꞌya cyak che queꞌyin, mer ic tzaꞌn nokꞌ cyak queꞌyin, ex cyeꞌxix tbinx tyola. Ke tkꞌoꞌtxa ic che queꞌyin ic tzaꞌn cabe piẍ carnad ẍokꞌ cyewan cyib tujxi ju txaybil twitza.

4 Aju tkula ic tten ic tzaꞌn jun ja maꞌ twaꞌl te tcolbil tib rey David binchamaj te cꞌubl cye macbil in che ajben tuj kꞌoj. Tiꞌjtzun in che oc yoban jun mil makbil, akeju cymakbil xjal cyuwxix cycꞌuꞌj tuj kꞌoj.

5 Ke tima ic cyten ic tzaꞌn cabe tal masat yoꞌẍ in che waꞌn cyxol tkan bech.

6 Acux in jawil kꞌij ex cyjaꞌ tcub naj klolj, chin xeꞌle twi witz jatum taꞌ tkꞌolil tzeꞌ mirra tbi, max twiꞌ tal witz jatum awaꞌn ke tal tzeꞌ nneꞌl storac cyiꞌj.

7 Tbanilxix queꞌyin tcyakil t-ximlala aya xuꞌj at-xix ncꞌujlalile tiꞌja; mintiꞌ chꞌin tpaltila toc.

8 Tcuꞌtza wucꞌile twi witz Líbano aya xuꞌj in chin yoline tucꞌila tuꞌn kmojeꞌ; tcuꞌtza wucꞌile twi witz Líbano. Queꞌyinxa aju chkꞌajlaj max twi witz Amana, max twi witz Cenir ex twi witz Hermón; max twi witz jatum taꞌ cynajbil balun ex jatum ateꞌ ke txcup tigre.

9 Ma tzyet wanmiye tuꞌna, wanbe, aya xuꞌj in chin yoline tucꞌila tuꞌn kmojeꞌ; ma tzyet wanmiye tuꞌna nok oꞌcx tuꞌn jun maj saj tqueꞌyina tuj nwitze, ex nok tuꞌn jun tzꞌum tuꞌya.

10 Tbanilxix tcꞌujlalila wanbe, aya xuꞌj in chin yoline tucꞌila tuꞌn kmojeꞌ. Aju tcꞌujlalila mas chiꞌ twitz taꞌl twitz uva, ex aju perjum toc tiꞌja mas cꞌocꞌj cywitz ke mastl perjum at cycꞌocꞌjal.

11 Aya xuꞌj in chin yoline tucꞌila tuꞌn kmojeꞌ, mer ic tzaꞌn taꞌl cab at tuj ttziꞌya. Mer ic tzaꞌn taꞌl cab ex lech at tjakꞌ takꞌa. Ex aju tcꞌocꞌjal nneꞌl tiꞌj t-xbaluna, mer ic tzaꞌn cycꞌocꞌjal ke tzeꞌ ateꞌ twi witz Líbano.

12 Aya wanbe, aya xuꞌj in chin yoline tucꞌila tuꞌn kmojeꞌ, ic ttena ic tzaꞌn tkan awal toc peꞌn tiꞌj, ex ic tzaꞌn jun twi aꞌ jpuꞌn ex toc sey tiꞌj;

13 ic ttena ic tzaꞌn tkan awal jatum in che jaw pokꞌl ke carnad ẍokꞌ tbanilxix cywitz; ex ic tzaꞌn tkan awal jatum ateꞌ bech alheña cꞌocꞌjxix,

14 ex jatum ateꞌ ke bech nardo ex azafrán, tucꞌix tkan ajlaj at nimxix tcꞌocꞌjal, tucꞌix tkan canela, tucꞌix tcyakil txcaj tzeꞌ nneꞌl storac cyiꞌj, tucꞌix tkan tzeꞌ nneꞌl tkꞌolil mirra tiꞌj ex áloe; ex tcyakil txcaj tkan tcꞌocꞌjal.

15 Ic ttena ic tzaꞌn jun twi aꞌ at tuj tkan awal ex ic tzaꞌn jun xoch jatum in jatz kojl aꞌ, aju in cuꞌtz twi witz Líbano.

16 Tzaja aya cykꞌikꞌ in tzaj tuj txꞌotxꞌ tuj tbankꞌab kꞌij, tzaja aya cykꞌikꞌ in tzaj tuj txꞌotxꞌ tuj tnayaj kꞌij. Cyxupintze tuj tkan wawale tuꞌntzun tel t-sipan tib aju tcꞌocꞌjal bech at tuj.