3
Tuj ncoẍbile te konicꞌan in jyone tiꞌj ju xinak cꞌujlaꞌn wuꞌne. In jyone tiꞌj ex mintiꞌ cnet wuꞌne.2 Entons in jaw weꞌye ex baj nbetine enter tnam, in jyone cyuj cay ex cyuj plas tiꞌj ju xinak cꞌujlaꞌn wuꞌne. In jyone tiꞌj ex mintiꞌ cnet wuꞌne.
3 Xi nkanine cye xkꞌukil in che bet tuj tnam: ¿Mintiꞌpe ma cyile aju xinak cꞌujlaꞌn wuꞌne? Nchiye.
4 Matok chꞌin wel-len lakꞌeꞌye cyiꞌj ke xkꞌukil tej tcnet wuꞌne aju xinak cꞌujlaꞌn wuꞌne. Tzaj ntzyuꞌne tkꞌab ex mintiꞌ xi ntzokpiꞌne ex xi wiꞌne tuj tja ntxuꞌye.
Aju tyol xinak
5 Akeye xuꞌj aj Jerusalén, cytziyantze jun yol weye nok tuꞌn cylaj ke masat ex ke tal masat te tjakꞌ cꞌul, miꞌn tzꞌel cyiꞌne twatl ju xuꞌj at ncꞌujlalile tiꞌj. Baꞌn tuꞌn ttan nok nicꞌxi or taj tuꞌn tel twatl.
Toxin bitz
Coro
6 ¿Alcye tzul aju cyjaꞌ tjatz tuj lugar mintiꞌ cynajbil xjal tuj, lu in lakꞌeꞌ ttzaj tuj txkan sib, tuj t-sibel tkꞌolil tzeꞌ mirra tbi, tuj t-sibel storac ex tuj t-sibel tcyakil txcaj perjum?
7 Atzunju tcarwaj Salomón tocx cyxol 60 soldad akeju mas cyuwxix cycꞌuꞌj ateꞌ cyxol aj Israel;
8 cycyakil soldad lu kꞌiꞌmlex spad cyuꞌn ex nimxix cynabl tuj kꞌoj; teyle junjun tocsaꞌn t-spad tcꞌuꞌj te colbil cye ka at jun xobil konicꞌan.
9 Cub tbinchaꞌn rey Salomón jun tcarwaj cyiꞌj tzeꞌ tbanilxix ateꞌ twi witz Líbano.
10 Sak pwak ke tkan, atzun jatum nnaꞌj kejeꞌ puro kꞌan pwak; aju tkꞌukbil tocsaꞌn jun xbalun tiꞌj puro ẍjulin queꞌyin; te tujxi binchamaj tuꞌn cycꞌujlalil ke xuꞌj aj Jerusalén.
11 Akeye xuꞌj aj Sión, cyetze queꞌyilte rey Salomón. Tjax tcoron aju tbincha ttxuꞌ tuꞌn tajben te tej tmojeꞌ tuj ju kꞌij tej ttzalaj nimxix.