2 Tuj tkꞌijlalil tzul, aju witz jatum tcub tja Kman maꞌxix toclen cꞌoquel. Aju witz lu maꞌxix twaꞌl cywitz ke mastl witz. Cycyakil nasyon che ul baj twiꞌ, 3 ex nimcu cyajlal tnam che ul ex oc cymaꞌ cyjaꞌ: Cytzaje ex ko jax twiꞌ ju witz etzan tuꞌn Kman, tuj tja Tdios Jacob, tuꞌntzun ttzaj t-xnakꞌtzaꞌn ke aju tajbil tuꞌn tbant kuꞌn ex tuꞌntzun kbet tuj be ma tzaj tmaꞌn ke. Porque tuj tnam Sión ctzajel kꞌoꞌn xnakꞌtzbil ke, ex tuj Jerusalén ctzajel tmaꞌn Kman tyol. 4 A cꞌoquel te jwes cyibaj nasyon ex cxel tbinchaꞌn cyiꞌj nimcu tnam tuꞌn miꞌn cykꞌojin. Cbajel cybinchaꞌn cyspad tuꞌn cyoc te punt ex cylans cbajel cybinchaꞌn tuꞌn cyoc te jobl tkꞌab uva. Mlayx tzaj cytzyuꞌn ke tnam juntl maj cyspad tuꞌn cykꞌojin cyiꞌj mastl tnam, ex mlayx cycꞌam juntl maj xnakꞌtzbil tuꞌn tbant cykꞌojin. 5 Akeye tiyjil Jacob, koke jaꞌlo tuꞌn kbet tuj t-spicꞌumal Kman.

6 Nman, ma che cyaj tcolina ke xjal etzan tuꞌna, akeju tiyjil Jacob; ma noj tuj cytanmi cyuꞌn ke xjal baꞌn che kꞌijin tzajni ke tuj tjawitz kꞌij, ex cyuꞌn aj nabl ic tzaꞌn keju ateꞌ cyxol aj Filistey, ex in bant tiꞌj cyyol cyucꞌil xjal cyuj mastl nasyon. 7 Nojni tuj cytanmi tuꞌn kꞌan pwak ex sak pwak ex at nimxix kꞌinumabl tuj; nojni tuj cytanmi cyuꞌn chej cabay ex at nimxix carwaj mlay bant cyajlanjtz. 8 Ax icx nojni tuj cytanmi cyuꞌn ke tilbilal nnoꞌc cydiosin xjal ex in che cꞌulun cywitz ke cydios cyuꞌnx in che bant. 9 Ma che oc te chꞌin cyoclen, jumajx ma tzꞌel cyoclen. Miꞌn cub tnajsaꞌna cyil.

10 Cylamon ocx cyibe cyuj toyꞌ pic, ex cyewanx cyibe tjakꞌ txꞌotxꞌ; cyewanx cyibe twitz Kman tuꞌnju xobajilxixte ex in koptzꞌaj tajwalil wen. 11 Ake xjal in jaw cyniman cyib cbel cychꞌixwi; ex akeju nnoꞌc cykꞌon cyib te maꞌ cyoclen che oquel te chꞌin cyoclen. Oꞌcxte Kman cjawil nimsaꞌn tbi tuj tkꞌijlalil tzul. 12 Tuj kꞌij lu cjawil tiꞌn tib Kman tuꞌn tkꞌojin cyiꞌj cycyakil xjal in jaw cyniman cyib, ex cyiꞌj cycyakil keju nnoꞌc cykꞌon cyib te maꞌ cyoclen, ex biꞌx cbel cychꞌixwi, porque ate Kman aju Tajaw Tcyakil cbinchalte jlu. 13 Ax icx cjawil ttxꞌemin cycyakil ke tzeꞌ wiꞌten maꞌxix cywaꞌl ateꞌ twi witz Líbano, ex cycyakil ke tzeꞌ cꞌol ateꞌ tuj txꞌotxꞌ Basán; 14 ax icx cbel t-xitun ke nimak witz ex ke tal witz maꞌxix cywaꞌl, 15 cyucꞌix ke ja maꞌ cywaꞌl ex ke muro cyuw cyten. 16 Ax icx cbel t-xitun cycyakil cybarc aj Tarsis cyucꞌix cycyakil ke barc tbanilxix che queꞌyin. 17 Ake xjal in jaw cyniman cyib ex nnoꞌc cykꞌon cyib te maꞌ cyoclen, biꞌx cbel cychꞌixwi. Oꞌcx te Kman cjawil nimsaꞌn tbi tuj tkꞌijlalil lu, 18 ex biꞌx che najel cycyakil ke tilbilal tuꞌn, akeju nnoꞌc cydiosin xjal.

19 Oc ttzaj Kman tuꞌn tcub cycastiw xjal tuꞌn, cꞌoquex cylamon cyib xjal cyuj toyꞌ pic ex cbelex cylamon cyib cyuj ke tpaꞌxil txꞌotxꞌ; cꞌelel cyewan cyib twitz Kman tuꞌnju xobajilxixte ex in koptzꞌaj tajwalil wen. 20 Tuj tkꞌijlalil tzul cꞌelex cyxoꞌn xjal ke tilbilal kꞌan pwak ex sak pwak cytxꞌotxꞌil, akeju cyuꞌnx cub cybinchaꞌn tuꞌn cycꞌulun cywitz; cꞌelex cyxoꞌn jatum ateꞌ ke ichꞌ ex ke sotzꞌ, 21 ex cꞌoquex cylamon cyib cyuj ke toyꞌ xak ex cyuj ke toyꞌ pic tuꞌn tel cyewan cyib twitz Kman, tuꞌnju xobajilxixte, ex in koptzꞌaj tajwalil wen oc ttzaj Kman tuꞌn tcub cycastiw xjal tuꞌn. 22 Miꞌn tzꞌoc keꞌ cycꞌuꞌje tiꞌj jun xjal, porque nok chꞌin toclen ex minaben jacu jatz baj t-xew.