Aju castiw tzul cyibaj aj Judá ex aj Jerusalén
3
Tzꞌelx cynicꞌe tiꞌj. Ate Kman aju Tajaw Tcyakil, cꞌelel tiꞌn cye aj Jerusalén ex cye aj Judá tcyakilju in keꞌ cycꞌuꞌj tiꞌj, tucꞌix tcyakil cywa ex tucꞌix aꞌ. 2 Ax icx che najel xjal tuꞌn, akeju cyuw cycꞌuꞌj tuj kꞌoj, cyucꞌix keju elni ke twitz kꞌoj, cyucꞌix ke jwes ex keju nnoꞌc cykꞌon cyib te t-sanjel Dios, cyucꞌix ke xjal baꞌn che kꞌijin, cyucꞌix ke cytijil xjal, 3 cyucꞌix ke capitán, akeju at 50 soldad tuj cycwent, cyucꞌix ke nejenel maꞌxix cyoclen, cyucꞌix keju baꞌn che kꞌon consej, cyucꞌix keju at cynabl tuꞌn tbant tcyakil txcaj akꞌuntl cyuꞌn, ex ke chman, 4 ex cꞌoquel tkꞌoꞌn Kman ke cuꞌxun te nejenel cyxol, ex ke cꞌwaꞌl che cawil cyibaj. 5 Aju cbajel tuj tnam atzun jlu: Che oquel ten xjal yajlal jun tiꞌj juntl, ax icx ke xjal cyvesin cyib che oquel tzokpaj jun tiꞌj juntl. Cjawil cyiꞌn cyib ke cuꞌxun cyiꞌj ke tij xjal, ex ke xjal mintiꞌ cyoclen cjawil cyiꞌn cyib cyiꞌj ke xjal maꞌ cyoclen. 6 Tuj ju kꞌij lu cxel tmaꞌn jun xjal te terman ax tuj tja cyman: Teya at t-xbaluna, cyjaꞌtzun toca te nejenel kxole ex cawina kibaje cyxol ke ttxꞌakan ja lu, chilo. 7 Atzunte terman cxel ttzꞌakꞌweꞌn cyjaꞌ: Mlay bant tuꞌn wonine cyeye tiꞌj ju mya baꞌn ma tzaj cyiꞌje, mintiꞌ nwaye at tuj njaye ex mintiꞌ nxbalune tuꞌn toc nkꞌoꞌne. Miꞌn chin oc cykꞌoꞌne te nejenel cye tnam xjal, chilo. 8 Ax toc ma naj tnam Jerusalén ex aju tnam Judá ma cub xitj, porque in che yolin mya baꞌn ex in cybinchaꞌn mya baꞌn tiꞌj Kman ex mintiꞌ tchiylal tajwalil Kman tuj cywitz.9 Ax cywitz in yecꞌunte tiꞌj cyil; mintiꞌ in cub cyewan cyil; ic cyten ke ic tzaꞌn ke xjal aj Sodoma, in xi cyyecꞌun cyil cye cycyakil xjal. Becꞌbil cywitz porque cyuꞌnx in tzaj cyiꞌn castiw cyibaj. 10 Cymanxe cye ke xjal tzꞌaklxix: Tcyakil cꞌelel baꞌn te cye ex che tzalajel tiꞌj twitz cyakꞌunben. 11 Ay becꞌbil cywitz ke xjal binchal mya baꞌn, porque tcyakil cꞌelel mya baꞌn te cye. Cxel kꞌoꞌn chojbil cye ic tzaꞌn cyakꞌunben mya baꞌn.
12 Cyuwxix in che cawin ke cꞌwaꞌl cyibaj ke ntanmile ex aju cawbil tuj cykꞌab xuꞌj taꞌ. Akeye ntanmile, cyuꞌnx ke nejenel ateꞌ cyxole ma che cub sbuꞌne ex ma che el tzpete tiꞌj cybeye cyuꞌn. 13 Ma bant tten Kman tuꞌn cyoc ke xjal tuj xjel tuꞌn, ma bant tten tuꞌn tcub tkꞌoꞌn cycastiw xjal ateꞌ cyuj nimcu tnam. 14 Cbel tkꞌoꞌn Kman cysentens ke cytijil xjal ex ke nejenel cye xjal etzan tuꞌn, ex cxel tmaꞌn cye cyjaꞌ: Cyuꞌne ma che baj naj ke tkan uva etzan wuꞌne; ma tzꞌel cyelkꞌaꞌne aju at cye ke meba ex aju ma tzꞌel cyelkꞌaꞌne ma tzꞌocx cycꞌuꞌne tuj cyjaye. 15 ¿Ti cyoclene tuꞌnju in baj cyyajlaꞌne ke xjal etzan wuꞌne ex in baj cywabane ke xjal meba? Chi Kman in tmaꞌn, aju Tajaw Tcyakil.
Aju cycastiw ke xuꞌj aj Jerusalén
16 Ax icx in tmaꞌn Kman cyjaꞌ: Ke xuꞌj aj Sión in jaw cyniman cyib ex tjaw cywitz twitz cyaꞌj oc in che bet in che xmutxben tuj cywitz xinak, chꞌin t-xol cykan oc in che bet ex in che chilin ke adorn cyoc tiꞌj cykan, 17 cyjaꞌtzun cbeletz pulj ttzmal cywiꞌ tuꞌn txꞌaꞌc wuꞌne ex biꞌx ctzajel cychꞌixwi oc cyoc queꞌyin mintiꞌ cyxbalun toc, chi Kman.
18 Tuj tkꞌijlalil tzul, che najel cycyakil ke adorn lu tuꞌn Kman: Ke adorn nnoꞌc cykꞌoꞌn tiꞌj cykan, cyucꞌix keju in che oc ten tiꞌj cywiꞌ, cyucꞌix uwj, 19 ke tuj ẍcyinbaj, ke tkul kꞌabaj ex ke xbalun te txaybil cywitz, 20 ke cꞌalbil cywiꞌ, ke tal caden toc te adorn tiꞌj cykan, ke cꞌalbil cycꞌuꞌj, ke tal botey tcuꞌx perjum cyuj, ke pwak toc cyiꞌj xjal tuꞌn miꞌn cyoc cyꞌaꞌn, 21 ke xmulkꞌabaj, ke adorn nnoꞌc ten tiꞌj cytxaꞌn, 22 ke cyxbalun tbanilxix, ke xbalun in ajben cyuꞌn te cyxmuj, ke xbalun in ajben te txaybil cyiꞌj ex ke pa, 23 ke respej, ke xbalun tbanilxix, ke siꞌpj ex ke xbalun xaxj. 24 Te t-xel perjum ctel ttzuwil; te t-xel cꞌalbil cycꞌuꞌj, cꞌajbel jun sakbak; te t-xel puro xeban cywiꞌ, cbeletz pulj ttzmal cywiꞌ; te cyxel ke xbalun tbanilxix, cꞌoquel cykꞌoꞌn xbalun chꞌiꞌx twitz cyiꞌj, te t-xel mejor che queꞌyin, cꞌoquel kꞌoꞌn marc cyiꞌj tuꞌn cꞌuxbil in scꞌolin tuꞌn kꞌakꞌ. 25 Atzun ke xinak aj Jerusalén che bel byoꞌn tuꞌn spad, ke xinak elni twitz kꞌoj che najel tuj kꞌoj. 26 Cꞌoquel okꞌel ex bis tuj tnam ex te jumajx cyjel colin.