4
Tuj tkꞌijlalil tzul, tuꞌnju nicꞌxi xinak che cyjel ten, cꞌoquel cykꞌon cyib wuk xuꞌj te t-xuꞌjil jun xinak ex cxel cymaꞌn cyjaꞌ: Bay keye, kuꞌnxe jacu tzꞌoc kcwentin kibe ex kuꞌnxe jacu tzꞌoc kxbalumin kibe, nok oꞌcx tuꞌn toca te kchmile, tuꞌntzun miꞌn kele tuj kchꞌixwiye.Cyjel ten Jerusalén juntl maj tuj txubtxaj
2 Tuj tkꞌijlalil tzul, aju t-xul ju tronc ctzajel tuꞌn Kman tbanilxix queꞌyin ex nimxix tajwalil, ex aju twitz awal ctzajel tkꞌoꞌn txꞌotxꞌ cꞌoquel te jun cyoclen maꞌxix ex te nimbil cye aj Israel, akeju otok che cyaj ankꞌin. 3 Akeju che cyjel ankꞌin tuj tnam Sión ex ateꞌx tuj Jerusalén ex at cyoclen tuꞌn cynajan ma chixin, cꞌoquel cybi ke xjal xjansaꞌmaj tuꞌn Kman. 4 Oc tcub cysentens aj Jerusalén tuꞌn Kman, cnajsetel cyil tuꞌnju nim xjal cub cybyoꞌn; ex oc tcub cycastiw ke xuꞌj najl tuj tnam Sión, che txꞌjetel, tuꞌn tel cytzꞌilil. 5 Tibaj tcyakil witz Sión ex cyibaj ke xjal cychmon cyib ma chixin, ctzajel tkꞌoꞌn Kman jun kꞌek muj kꞌijl, ex atzun konicꞌan ctzajel tkꞌoꞌn jun spicꞌun ex tkan kꞌakꞌ. Ex cbel ten tajwalil Kman tibaj tcyakil tnam, 6 tuꞌntzun cycwentinjtz xjal ex tuꞌn tajben te colbil cyib; ex cꞌajbel te cyxmuj oc ttzaj taꞌw cyak kꞌijl ex te colbil cyib oc ttzaj jbal ex cykꞌikꞌ jbal.