3 Atzun jaꞌlo in tmaꞌn wamiwoye: Akeye xjal najl tuj tnam Jerusalén cyucꞌix ke aj Judá, cymantze alcye at til. ¿Apeju tkan uva ex ka akine? 4 ¿Atpe juntl tiꞌxti mintiꞌ ma bant wuꞌne tiꞌj tkan uva etzan wuꞌne? Ximantok wuꞌne tuꞌn ttzaj tkꞌoꞌn twitz chiꞌxix. ¿Tikuꞌntzun puro txꞌom twitz tzaj tkꞌoꞌn? 5 Atzun jaꞌlo cxel nmaꞌne cyeye alcye cbantel wuꞌne tiꞌj tkan uva etzan wuꞌne: Cꞌelel wiꞌne aju peꞌn toc tiꞌjele tuꞌn tbaj naj; cbel nxitune ju tapya toc tiꞌjele tuꞌn tbaj waban tkan uva; 6 ex cꞌoquel nkꞌoꞌne te jun txꞌotxꞌ mintiꞌ in tzaj awal tuj. Miꞌn tzꞌel kꞌit tkꞌab ex miꞌn tzꞌel juꞌlit tiꞌj, ctzajel chꞌiy nim chꞌiꞌx cꞌul tjakꞌ ex mastl cꞌul in naj awal tuꞌn. Cxel nmaꞌne te muj tuꞌn miꞌn ttzaj tkꞌoꞌn jbal tibaj, chi wamiwoye.

7 Aju tkan uva te Kman aju Tajaw Tcyakil, ex aju tawal cꞌujlaꞌnxix tuꞌn, atzun ke aj Israel ex ke aj Judá. Ximantok tuꞌn Kman tuꞌn tjapun tley cyuꞌn, pero ma che oc te byol xjal, ximantok tuꞌn tuꞌn cybinchante aju tzꞌaklxix, pero nok in che schꞌin xjal tuꞌnju yajbil cye.

8 Ay becꞌbil cywitze, akeye xjal nok lakꞌoj ja nnoꞌc tilil cyuꞌne, in baj cylakꞌoꞌne nim cojbil, mintiꞌ in cykꞌoꞌne ambil cye mastl xjal ex in che cub tene najal cyuj, mer ic tzaꞌncu oꞌcx cyeye tajaw txꞌotxꞌ. 9 Ma tzaj kꞌmaꞌn jun yol axix toc weye tuꞌn Kman aju Tajaw Tcyakil, chi cyjaꞌ: Nimcu ja che bel xitj ex masque nmak ke ex tbanilxix che queꞌyin, mi jun cnajal cyuj. 10 Tuj 75 ech tkan uva, nok jun barril taꞌl twitz uva ctzajel tkꞌoꞌn. Oc tcuꞌx awat laj sac triw, nok oꞌcx jun sac twitz ctzajel tkꞌoꞌn.

11 Ay becꞌbil cywitze, akeye in che jaw weꞌ primxix tuꞌn cycꞌane kꞌeꞌn, ex oc t-xiꞌ akꞌbil, cucx mekꞌmaj keye tuꞌn vin. 12 Oc nnoꞌc jun nintz waꞌn cyuꞌne in pon cyiꞌne tcyakil txcaj chnab; at arpa, quitar, tampor ex at tulix ex nimcu vin; pero mintiꞌ in che ximane tiꞌj aju in tbinchaꞌn Kman, mintiꞌ nnoꞌc cycwente tiꞌj tbinchben. 13 Cyjaꞌtzun, tuꞌnju miban che bin ke xjal etzan wuꞌne, che xel kꞌiꞌn pres tuj juntl tnam najchak. Cycyakil xjal cyucꞌix ke nejenel cyxol che cymel tuꞌn weꞌyaj ex tuꞌn txketleꞌn. 14 Aju cynajbil cyimni in xi tcꞌabin tuj ttziꞌ mer ic tzaꞌn jun txcup te tjakꞌ cꞌul, tuꞌn t-xi tbalkꞌuꞌn ke tnam xjal cyucꞌix ke nejenel cye, akeju in che schꞌin tuj tzalajbil ex tuj achbil. 15 Ke xjal chꞌin cyoclen ex keju maꞌ cyoclen, jumajx che cyjel ten mintiꞌ cyoclen, ex keju in jaw cyniman cyib, biꞌx che cbel mocꞌeꞌ tuꞌn cychꞌixwi. 16 Ate Kman aju Tajaw Tcyakil cjawil nimsaꞌn oc tcub cycastiw xjal tuꞌn; aju Dios Xjan cxel tyecꞌun ka xjante oc tcub cysentens xjal tuꞌn tuj tumelxix. 17 Che bel xitj ke tnam ex che waꞌl ke ẍneꞌl ex ke chip cyxol ke ja otok che cub tilj.

18 Ay becꞌbil cywitze akeye xjal; tuꞌn nicꞌaj yol in tzaj cyiꞌne mya baꞌn cyibaje, cꞌaloꞌn keye tuꞌn il ic tzaꞌn jun boys jawolte carret cꞌaloꞌn tuꞌn pyal. 19 In cymaꞌne cyjaꞌ: E tbant naj tuꞌn Dios aju taj tuꞌn tbant tuꞌn, tuꞌntzun tkile; xjante Dios aju Cydios aj Israel, baꞌn tuꞌn tjapun naj tuꞌn aju ma baj t-ximan, tuꞌntzun tel knicꞌe tiꞌj, che chiye. 20 Ay becꞌbil cywitze akeye xjal nnoꞌc cykꞌoꞌne te baꞌn aju mya baꞌn, ex nnoꞌc cykꞌoꞌne te mya baꞌn aju baꞌn, nnoꞌc cykꞌoꞌne spicꞌun te klolj, ex nnoꞌc cykꞌoꞌne klolj te spicꞌun; nnoꞌc cykꞌoꞌne aju at tcꞌayil te chiꞌ, ex aju chiꞌ nnoꞌc cykꞌoꞌne te cꞌa.

21 Ay becꞌbil cywitze akeye xjal nnoꞌc cykꞌon cyibe at cynable ex nnoꞌc cykꞌon cyibe secꞌ cynable. 22 Ay becꞌbil cywitze akeye xjal jawni che cꞌane vin ex mi aꞌl jun jacu pon ic tzaꞌn cyeye tuꞌn tbaj smet kꞌeꞌn tucꞌil tcꞌocꞌjal. 23 Nok tuꞌn pwak in tzaj kꞌoꞌn cyeye nnoꞌc cykꞌoꞌne te mintiꞌ til aju xjal at til, ex mintiꞌ in xi cybinchaꞌne tiꞌj ju xjal mintiꞌ til. 24 Cyjaꞌtzun, ic tzaꞌn in baj tzꞌeꞌy chꞌim tuꞌn kꞌakꞌ ex in tzꞌeꞌy t-xak tzeꞌ tzkij tuꞌn tkꞌakꞌal, ax icxtzun cyeye che najele, ic tzaꞌn in naj jun tzeꞌ in cuꞌx kꞌay tlocꞌ ex in cheꞌx ikan t-xmacal tuꞌn cykꞌikꞌ ic tzaꞌn kuk. Porque ma tzꞌel cyicꞌune aju ley ex ju yol tzaj tkꞌoꞌn Kman aju Tajaw Tcyakil, aju Dios Xjan cye aj Israel. 25 Cyjaꞌtzun ma tzaj tkꞌoj Kman cyiꞌj ke xjal etzan tuꞌn ex ma jaw tiꞌn tkꞌab tuꞌn tcub tkꞌoꞌn cycastiw. Ma che tzaj luꞌlun ke witz, ma che cyaj paleꞌ cyximlal cyimni tuj cay ic tzaꞌn tzꞌis. Masque icju, naꞌnx tchewix tkꞌoj Kman cyiꞌj ex cucx tjaw tiꞌn tkꞌab tuꞌn tcub cycastiw.

26 Cjawil tkꞌoꞌn Kman jun bander te txocbil cyiꞌj ke nasyon ateꞌ najchak, ex cxel ẍutꞌin tuꞌn ttzaj ttxcoꞌn aju tnam najchak taꞌ. Lu ke che ul naj ex in che ojkelan wen. 27 Mi aꞌl jun cye jacu sict, mi aꞌl jun jacu jaw tolj, mi aꞌl jun ctal, mi aꞌl jun ctzajel twatl, mi aꞌl jun ctel mya kitzꞌun cꞌalbil tcꞌuꞌj, mi aꞌl jun ctzakjel takꞌal t-xajab. 28 Ke cyplech puro tzꞌuꞌp cywiꞌ ex cycyakil ma tzaj cyjawoꞌn takꞌal cyxobl plech. Cyuwxix ke t-xpacꞌal tkan cychej mer ic tzaꞌn abj. ex ke tkan cycarwaj mer ic tzaꞌn xcyakinpaẍ. 29 Aju tkꞌajkꞌajel cywiꞌ, mer ic tzaꞌn tkꞌajkꞌajel twiꞌ jun balun ex ic tzaꞌn tkꞌajkꞌajel twiꞌ jun tal tman balun oc tjaw tzanun; in che jaw tzanun oc ttzyet cycanb, in xi cyiꞌn ex mi aꞌl jun jacu tzꞌel kꞌinte cye. 30 Oc tpon aju kꞌij banimaj tiꞌj, cjawil julun aju nasyon lu cyiꞌj ke aj Israel, ic tzaꞌn in jululun mar; ex ka at jun ma txi tqueꞌyin txꞌotxꞌ, oc tilaꞌ puro kloljxix tcyakil ex bisbajilxix, ex cꞌoquel klolj twitz cyaꞌj tuꞌn kꞌek muj.