Isaías 6

Aju txocbil te Isaías

Tuj abkꞌi tej tcyim rey Uzías o wile Kman kꞌukl tuj tkꞌukbil maꞌ tjaw ex maꞌ toclen, nojni tuj tja tuꞌn ttxaꞌn t-xbalun. 2 Lu ke Serafín in che koptzꞌaj wen cycubsaꞌn tibajxi Kman. Teyle junjun at kak t-xicꞌ. Cabe cyxicꞌ in ajben te makbil cywitz, cabetl in ajben te txaybil cykan ex atzun cabetl in ajben tuꞌn cylipan. 3 Ex che chi in cymaꞌn jun te juntl:

Xjante, Xjante, Xjante Kman aju Tajaw Tcyakil; nojni tcyakil twitz txꞌotxꞌ tuꞌn tajwalil.

4 Tej tkꞌajt tkꞌajkꞌajel cywiꞌ, biꞌx e tzaj luꞌlun tpwertil tja Dios ex biꞌx baj noj tuj tuꞌn sib. 5 Atzun weye nmaye cyjaꞌ: Ay becꞌbil nwitze, chin cymele. Ma wile tuꞌn nwitze aju Rey, aju Kman Tajaw Tcyakil; atzun weye xjal kine ex mi jun yol tuj tumel nneꞌtz tuj ntziꞌye, ex najl kine tuj jun tnam jatum mintiꞌ jun xjal in yolin tuj tumel, nchiye.

6 Cyxol ke Serafín lu tzaj lipan jun ex ul wucꞌile, tzyuꞌn jun xkꞌaꞌl tuꞌn tuꞌn tenás, otok jaw tiꞌn tibaj altar. 7 Oc ttꞌanoꞌn tiꞌj ntziꞌye ex tma weye cyjaꞌ: Bintza, aju xkꞌaꞌl lu ma tzꞌoc tꞌanet tiꞌj ttziꞌya, ma tzꞌel kꞌit tbinchbena mya baꞌn ex ma cub najset tila, chi Serafín.

8 Nbiye tkꞌajkꞌajel twi Kman ex tma: ¿Alcye cxel nsamaꞌne? ¿Alcye cꞌoquel te ksanjele?

Atzun weye xi ntzakꞌweꞌne: Lu kine lu, chin t-samanxa.

9 Tzajtzun tmaꞌn weye: Txiꞌya ex kꞌmanxa cye xjal cyjaꞌ: Masque ma tzaj cykꞌoꞌn cywiꞌye tiꞌj, mlay tzꞌel cynicꞌe tiꞌj; ex masque ma cyile, mlayx tzꞌel cynicꞌe tiꞌj. 10 Najsaꞌn baja cynabl ke xjal lu tuꞌn miꞌn tocx tuj cywiꞌ, maksima tuj cyẍcyin tuꞌn miꞌn cybinte, ex maksima cywitz tuꞌn miꞌn tcyil ex tuꞌn miꞌn tel cynicꞌ tiꞌj, tuꞌntzun miꞌn tajtz tiꞌj cyanmi ex tuꞌn miꞌn cybanix wuꞌne, chi Kman weye.

11 Xitzun nkanine te: ¿Nicꞌpuntzun ctel jlu, Nman?

Tzajtzun ttzakꞌweꞌn: Max ocxi cybaj naj ke tnam ex mi jun xjal tuꞌn tcyaj ten cyuj, ocxi cycyaj ten ke ja mintiꞌ cyajwil, ocxi cybaj naj ke cojbil ex mi jun xjal cyjel ten cyuj, 12 ex ocxi cyxi wiꞌne ke xjal tuj jun tnam najchak, tuꞌntzun mi jun xjal tuꞌn tcyaj ten tuj ttanmi. 13 Masque nicꞌxi xjal che cyaj ten tuj tnam, ax icx che najel, ic tzaꞌn in jaw txꞌemit jun tzeꞌ cꞌol ex ka jun tzeꞌ sicꞌl ex oꞌcx ttronquil in cyaj ten, pero tiꞌj tronc lu ctzajel chꞌiy t-xul xjanxix.