2 Tuj kꞌij lu, pon tkanil lu tucꞌil rey Acaz ex cyucꞌil keju ateꞌ tuj tja: Ma tzꞌoc cyjunin cyib aj Siria cyucꞌil aj Efraín. Tej tbinte rey cyucꞌix ke xjal, e oc ten luꞌlul ic tzaꞌn in che yucch ke tzeꞌ tuj chcꞌul oc in tzaj cykꞌikꞌ.

3 Tzajtzun tmaꞌn Kman te Isaías cyjaꞌ: Ucꞌinx tcyꞌajala Sear-jasub, ex txiꞌya canil tiꞌj rey Acaz ma jatum ponin baj tbeyil aꞌ tuj tcubil te jawni, tuj be in xiꞌ tuj tcojbil ju xjal txꞌjol tiꞌj xbalun, 4 ex kꞌmanxa te cyjaꞌ: Ten tcwenta, miꞌn jaw secꞌpaja ex miꞌn xoba, miꞌn tzaj baj tcꞌuꞌja cyuꞌn ke cabe xjal lu; ic ke ic tzaꞌn cabe ttxaꞌn kꞌakꞌ in che kusin, ex atzun ke jlu: Rezín, cyucꞌix aj Siria, tucꞌix tcyꞌajal Remalías; nimxix cykꞌoj ma tzaj. 5 Ke aj Siria, cyucꞌix ke aj Efraín, tucꞌix tcyꞌajal Remalías, ma bant tiꞌj cyuꞌn tuꞌn cybinchante mya baꞌn tiꞌja ex ma cyma cyjaꞌ: 6 E koc tzokpaj kꞌojlel cyiꞌj aj Judá ex e toc kxobtzaꞌn ke; e koc te tajwil cytxꞌotxꞌ ex e toc kkꞌoꞌn tcyꞌajal Tabeel te rey cyibaj, che chi.

7 Pero chi Kman: Mlayx bant jlu icju. 8-9 Aju tnam Damasco, atzun jun nintz tnam tuj txꞌotxꞌ Siria, ex ate Rezín toc te rey tuj Damasco; atzunte Samaria, atzunju nintz tnam tuj txꞌotxꞌ Efraín, ex aju tcyꞌajal Remalías toc te rey tuj Samaria, pero tujxi 75 abkꞌi jaꞌlo, cnajel cycawbil aj Efraín; ax icx cyeye ka mintiꞌ ma ten cyocslable axix toc, mlay che cyaj ankꞌine, chi Kman.

10 Ax icx xi tmaꞌn Isaías te Acaz aju yol tzaj tmaꞌn Kman: 11 Kaninxa te Kman Dios tuꞌn tbinchante jun señ nim tipumal tuꞌn tajben te teya, ka max tjakꞌxi txꞌotxꞌ taja tuꞌn tqueꞌyinjtz ex ka max tuj cyaꞌj.

12 Xi ttzakꞌweꞌn Acaz: Mlay txi nkanine jun señ te Kman ex mlay tzꞌoc nkꞌoꞌne tuj malbil.

13 Tma Isaías: Akeye tiyjil rey David, cybintze: ¿Mintiꞌ in keꞌ cycꞌuꞌje tuꞌn tbaj cypasens xjal cyuꞌne, ax icx cyaje tuꞌn tbaj tpasens Ndiose cyuꞌne? 14 Atzun jaꞌlo, ax te Kman ctzajel yecꞌunte jun señ cyeye: Cybintze: Cꞌoquel ten tal jun kꞌapoj ex kꞌa jun tal tzul itzꞌj, ex Emanuel tbi cꞌoquel. 15 Cyes cxeꞌl tuꞌn ex taꞌl cab ocxi tel tnicꞌ tiꞌj tuꞌn tel ticꞌun aju mya baꞌn ex tuꞌn tjaw t-scꞌoꞌn aju baꞌn. 16 Pero atxtok taj tuꞌn tel tnicꞌ tal neꞌ tiꞌj tuꞌn tel ticꞌun aju mya baꞌn ex tuꞌn tjaw t-scꞌoꞌn aju baꞌn, cyjel colin ju txꞌotxꞌ jatum ateꞌ ke cabe rey in tzaj t-xobila cyuꞌn.

17 Tzul tkꞌijlalil tuꞌn ttzaj tiꞌn Kman aju rey cye aj Asiria kꞌojlel tiꞌja, cyiꞌj ke t-xjalila ex cyiꞌj terman tmana, ex bajx tzaj jun maj icju atxix tej tel cypaꞌn cyib aj Efraín cyiꞌj aj Judá.

18 Tuj tkꞌijlalil tzul, che tzajel tiꞌn Kman ke xjal ateꞌ max cytziꞌ ke nima te Ejipt ic tzaꞌn txkan us, ex che ul tiꞌn ke xjal ateꞌ tuj Asiria ic tzaꞌn txkan ttxu cab. 19 Cycyakil ke jlu che ul tuꞌn cycub ten cyuj ke tkan xak maꞌ cyxeꞌ ex cyuj ke toyꞌ pic, tuj tcyakil tkan chꞌiꞌx ex cyuj ke lugar jatum in che cꞌan alumaj aꞌ.

20 Oc tul tkꞌijlalil lu, cꞌajbel rey te Asiria tuꞌn Kman ic tzaꞌn jun navaj in tzaj majanit, max jlajxi nima Éufrates, ex cꞌelel baj tiꞌn tcyakil ttxaꞌn cywiꞌ aj Israel tucꞌix cyxmatz ex xyaꞌn cyiꞌj.

21 Oc tul tkꞌijlalil lu, ka ma chꞌiy jun vac ex cabe chip tuꞌn jun xjal, 22 ctel nim lech tucꞌil ex cchyoꞌl cyes. Ex cycyakil xjal che cyjel ten oc tnaj tnam, che chyoꞌl cyes ex che loꞌl taꞌl cab.

23 Tuj tkꞌijlalil lu, aju lugar attok jun mil wiꞌ tkan uva tuj, ex ax jun mil sak pwak twiꞌ, cꞌoquel te jun lugar at nim chꞌiꞌx cꞌul ex chꞌiꞌx tzeꞌ tuj. 24 Nok oꞌcx tuꞌn arc xoꞌl plech in ajben tuꞌn cycub jil jacu che ocx xjal tuj lugar lu, porque enter tnam cꞌoquel te tkan chꞌiꞌx cꞌul ex chꞌiꞌx tzeꞌ. 25 Ctzajel chꞌiy nim tkan chꞌiꞌx cꞌul ex chꞌiꞌx tzeꞌ cywiꞌyile tal witz jatum in akꞌnet txꞌotxꞌ tuꞌn chꞌoc nej, ex mi aꞌl jun xjal cxel betel tuj. Oꞌcx cꞌajbel jlu te cywabl wacẍ ex cywabl ẍneꞌl.