3 Yajxi chꞌintl, oc nmojban wibe tucꞌil ju xuꞌj pacbal tyol Dios, aju nxuꞌjile; oc ten jun tal ex ul itzꞌj jun tal xinak. Tzajtzun tmaꞌn Kman weye: Kꞌon oca tbi neꞌ Maher-salal-hasbaz. 4 Porque naꞌnxtok tbant tmante tal neꞌ: Tat ex ka Nan, cꞌeletz kꞌiꞌn kꞌinumabl tuj tnam Damasco ex tuj tnam Samaria ex cxel kꞌiꞌn tuꞌn tpon tucꞌil rey te Asiria.

5 Ex tzaj tmaꞌntl Kman weye: 6 Tuꞌnju ma tzꞌel cyicꞌun ke xjal aju aꞌ Siloé, aju cheba in bet, ex ma che tzalaj tiꞌj rey Rezín ex tiꞌj rey Peka aju tcyꞌajal Remalías, 7 cyjaꞌtzun ctzajel wiꞌne aju rey cye aj Asiria, cyucꞌix cycyakil ke t-soldad, tuꞌn cyoc tzokpaj kꞌojlel cyiꞌj aj Judá; che ul ic tzaꞌn nima Éufrates in chꞌiy nimxix wen ex in baj naj tcyakil aju at ttzi aꞌ tuꞌn; 8 cbajel naj tcyakil cyuꞌn, mer ic tzaꞌn otok noj tuj txꞌotxꞌ Judá tuꞌn nima ex mer ic tzaꞌn otok japun aꞌ twi cysemil xjal. Ic che oquel ke aj kꞌoj, ic tzaꞌn jun chyuꞌj licꞌun ke t-xicꞌ, ex in makset tcyakil ttxꞌotxꞌa cyuꞌn, aya Emanuel.

9 Akeye nasyon, cychmoꞌn oc cyibe ex che najele; cybintze jlu akeye tnam najchak ateꞌye: Masque bant cytene tuꞌn cykꞌojine, che najele; ax toc, masque bant cytene tuꞌn cykꞌojine, che najele. 10 Che ximane tiꞌj aju cyaje tuꞌn tbant, pero cbajel naj cyximbetze; cyximan cube alcye cyaje, pero mlayx japun, porque at Dios kucꞌile.

11 In tzaj tzyuꞌne tuꞌn Kman cyuwxix wen ex tzaj tmaꞌn weye tuꞌn miꞌn woc lpeꞌye tiꞌj cymod xjal lu ex tma cyjaꞌ: 12 Oc cymante xjal: At xobajil kiꞌj tuꞌnju in che ximan xjal tuꞌn cybinchante mya baꞌn kiꞌj, ka che chi, miꞌn tzꞌocx cykꞌon cyibe cyxol. Miꞌn che secꞌpaje ex miꞌn che xobe tiꞌj tcyakilju in che el xob tiꞌj. 13 Akine Cymane aju Tajaw Tcyakil, akine tuꞌn woc cykꞌoꞌne te xjan, ex baꞌn tuꞌn tten nchiylale cyiꞌje ex tuꞌn cyxobe nwitze. 14 Chin oquele te jun lugar jatum tuꞌn cyclete; pero te cye ke cabe cꞌloj tiyjil Israel chin oquele te jun abj tuꞌn cyjaw tolj tiꞌj; chin oquele ic tzaꞌn jun cꞌobil cye aj Jerusalén, tuꞌn cyjaw tzꞌak tuj. 15 Nimcu che jawil tolj tuꞌn cycub tzꞌak ex che cymel; nimcu che bel tzꞌak tuj cꞌobil ex che tzyetel tuꞌn, chi Kman.

16 Cycꞌuꞌnxe aju yol lu ex biꞌx cykꞌon cyaje tal aju tcubil nxnakꞌtzbile. 17 Masque ma cub tewan tib Kman cywitz ke tiyjil Jacob, atzun weye chin ayole tiꞌj, porque oꞌcx tiꞌj ma keꞌ ncꞌuꞌje. 18 Akine ex ke ncꞌwaꞌle ma che tzaj tkꞌoꞌn Kman weye, ko ajbele te jun techal cyxol aj Israel. Tuꞌn Kman aju Tajaw Tcyakil ma ko oc kꞌoꞌne icju, aju najl twi witz Sión. 19 Ex ka ma tzaj cymaꞌn xjal cyeye: Cykaninxe jun yol te cyanmi cyimni ex cye aj kꞌij, ka che chi, akeju in baj cychꞌexpuꞌn tkꞌajkꞌajel cywiꞌ oc cyyolin ex oc cyjasun, atzun cyeye cxel cytzakꞌweꞌne cyjaꞌ: ¿Baka mya baꞌn tuꞌn cykanin xjal jun yol te Cydios? ¿Baꞌnpe tuꞌn cykanin jun consej cye cyimni cyiꞌj ke itzꞌx? 20 Cybinxe aju xnakꞌtzbil ex aju tley Dios. Ka mintiꞌ in cymaꞌn xjal ic tzaꞌnx ju yol lu, cucx ateꞌ tuj klolj.

21 Nok che betjebel ke xjal, ctzajel yajbil cyiꞌj ex cꞌoquel taꞌw weꞌyaj cyiꞌj, ex tuꞌn taꞌw weꞌyaj ctzajel nim cykꞌoj. Tuꞌntzun jlu cxeꞌl cyyol tiꞌj cyrey ex tiꞌj Cydios. Ex cjawil cyiꞌn cywitz jawni, 22 ex te tibajxi cbel cyqueꞌyin twitz txꞌotxꞌ; oꞌcx yajbil tzul cyibaj, tucꞌix klolj ex kxopin ex nim bis. Cycyakil che cyjel ten tuj klolj.