Tzul itzꞌj jun cꞌwaꞌl ex cꞌoquel te rey tuꞌn cyten xjal tuj txubtxaj
9
Mya te jumajx cbel ten klolj tibaj tnam at tuj bis jaꞌlo. Tnejel cub tkꞌoꞌn Dios tcastiw tnam Galiley, aju cytxꞌotxꞌ tiyjil Zabulón ex ke tiyjil Neftalí, aju lugar tvesin tib cyucꞌil ke mastl tnam mya aj Israel, tzajnix keꞌ jlajxi nima Jordán tuꞌn tpon baj ttzi mar; pero te yajxi oc tcꞌmaꞌ ju lugar lu jun nimbilte. 2 Aju tnam in bettok tuj klolj o til jun matij spicꞌun; jun spicꞌun ma koptzꞌaj te cye xjal najlke tuj kxopinxix. 3 Nman, tuꞌna ma che chmet nimxix xjal ex nim in che tzalaj. Cycyakil in che tzalaj twitza ic tzaꞌn in che tzalaj xjal oc tpon tkꞌijlalil tuꞌn tjaw chmet twitz awal, ex ic tzaꞌn in che tzalaj ke xinak oc tcub cysipan jun kꞌinumabl cyxolx tcublenxi cyiꞌj aj kꞌoj cyuꞌn. 4 Porque ma cub ttokina aju yuw alxix tcub tibaj cykul xjal, ma cub ttokina tzeꞌ aju in ajben te jubil ttzal cyiꞌj, ex tuꞌna ma naj cyipun xjal akeju cyuwxix in che cawin cyibaj, ic tzaꞌn tuj tkꞌijlalil tej cynaj aj Madián tuꞌna. 5 Ke sapat in kꞌajt t-xiꞌ cykan soldad cyuj oc cyxiꞌ tuj kꞌoj, ex cyucꞌix ke xbalun tocsaꞌn tchcꞌel xjal tiꞌj, che oquex patit tuj kꞌakꞌ tuꞌn cytzꞌeꞌy te jumajx. 6 Porque ma itzꞌj jun tal neꞌ kxol, ma tzaj tkꞌoꞌn Dios jun cꞌwaꞌlbaj ke ex ma tzaj kꞌoꞌn toclen tuꞌn tcawin, ex cꞌoquel kꞌoꞌn ke tbi cyjaꞌ: Kꞌol Nabl maꞌxix t-xilen, Dios maꞌxix tipumal, Mambaj te jumajx, Nejenel tuꞌn cyten xjal tuj txubtxaj. 7 Cbel keꞌ tuj tkꞌukbil David tuꞌn tcawin te t-xel; ex cucx cchꞌiyil tcawbil tuj tcyakil twitz txꞌotxꞌ; te jumajx cwebel kꞌoj tuꞌn, tuꞌn cyten xjal tuj txubtxaj, ex aju tcawbil cyjel ten te jumajx. Aju t-xilen tcawbil atzun, tuꞌn tbinchante aju tzꞌaklxix, ex tuj tumel cxel tbinchaꞌn cyiꞌj xjal te jaꞌlo ex te jumajx. Cbantel jlu tuꞌn Kman aju Tajaw Tcyakil, tuꞌnju at-xix tcꞌujlalil.Aju tkꞌoj Kman cyiꞌj aj Israel
8 Ma tzaj t-samaꞌn Kman jun tkanil cye aj Israel, akeju tiyjil Jacob; 9 cycyakil aj Efraín akeju najl tuj Samaria cꞌelel cynicꞌ tiꞌj. Tuꞌnju jawni ke ex in jaw cyniman cyib, in cymaꞌn cyjaꞌ: 10 Ma che cub tilj ke lokꞌ, pero cjawil kbinchaꞌn ke ja tuꞌn abj. Ma cub cytxꞌemin ke viga elni cyiꞌj ke tzeꞌ sicómoro mya tbanilxix, pero che elel kchꞌexpuꞌn ex che oquel kkꞌoꞌn ke tzeꞌ wiꞌten te cyxel, che chi. 11 Pero che tzajel tiꞌn Kman ke aj kꞌoj tiꞌj Rezín ex cxel tmaꞌn cye tuꞌn cyoc tzokpaj cyiꞌj aj Israel. 12 Tuj tjawitz kꞌij che tzajel aj Siria ex tuj telex kꞌij che tzajel aj Filistey. Jun txꞌaꞌx che elel aj Israel cyuꞌn. Masque icju, pero naꞌnx tchewix tkꞌoj Kman cyiꞌj; cucx tjaw tiꞌn tkꞌab tuꞌn tcub cycastiw.
13 Atzun ke xjal, mintiꞌ e ajtz meltzꞌaj tucꞌil Dios aju cub kꞌonte cycastiw, ex mintiꞌ e cubsan twitz Kman aju Tajaw Tcyakil. 14 Ic che oquel aj Israel tuꞌn Kman ic tzaꞌn nneꞌl ttxꞌemin xjal tjeꞌ jun alumaj tucꞌix twiꞌ ex ic tzaꞌn in jaw ttxꞌemin xjal tkan xaꞌj ex tkan ajlaj. 15 Aju twiꞌ, atzun in yolin cyiꞌj ke cytijil xjal ex ke nejenel cyxol, atzunju tjeꞌ in yolin cyiꞌj keju nnoꞌc cykꞌon cyib te t-sanjel Dios, in cykꞌoꞌn xnakꞌtzbil tiꞌj nicꞌaj yol. 16 Cyuꞌn ke nejenel ma che el txalpuj ke xjal lu tiꞌj cybe ex keju ẍakluꞌn cyuꞌn ma che el tzpet. 17 Cyjaꞌtzun mintiꞌ tzaj tzꞌeꞌy tcꞌuꞌj Kman cyiꞌj ke cuꞌxun, ex mintiꞌ tzaj kꞌakꞌan tcꞌuꞌj cyiꞌj ke meba cꞌwaꞌl ex cyiꞌj ke meba xuꞌj. Porque cycyakil tnam xjal mintiꞌ tchi Dios tuj cywitz, jumajx mya baꞌn ke ex cycyakil in cymaꞌn yol mya baꞌn. Masque icju, naꞌnx tchewix tkꞌoj Kman cyiꞌj, cucx tjaw tiꞌn tkꞌab tuꞌn tcub cycastiw.
18 Aju mya baꞌn in bant cyuꞌn xjal ic tten ic tzaꞌn kꞌakꞌ in tzꞌeꞌy chꞌiꞌx tzeꞌ tuꞌn, tucꞌix chꞌiꞌx cꞌul, ex in che baj tzꞌeꞌy tzeꞌ tuꞌn tuj chcꞌul, ex tuꞌn tkꞌakꞌal in jaw tololon nimxix sib. 19 Tuꞌn tkꞌoj Kman aju Tajaw Tcyakil ma baj tzꞌeꞌy txꞌotxꞌ, ma baj naj tnam tuꞌn kꞌakꞌ ex mintiꞌ in tzꞌeꞌy cycꞌuꞌj xjal cyiꞌj cyerman. 20 Jurat in baj cywaꞌn aju in cnet cyuꞌn tuj bankꞌabaj, pero cucx ctzajel el cycꞌuꞌj, in xi cywaꞌn aju at tuj cynayaj, pero mintiꞌ in noj cycꞌuꞌj, in xi cychyoꞌn xjal cychibjal ke cycꞌwaꞌl. 21 Cyuꞌn aj Manasés in che naj ke aj Efraín, ex cyuꞌn aj Efraín in che naj ke aj Manasés, ex cycabil in che oc tzokpaj cyiꞌj aj Judá. Masque icju, naꞌnx tchewix tkꞌoj Kman cyiꞌj, cucx tjaw tiꞌn tkꞌab tuꞌn tcub cycastiw.