10
Ay becꞌbil cywitze tuꞌnju in cub cykꞌoꞌne ke ley mya tzꞌaklxix ex cyuwxix, aju mlay tzicꞌx cyuꞌn xjal, 2 mintiꞌ in xi cybinchaꞌne tiꞌj cyxtis ke xjal meba, ex nneꞌl cyiꞌne aju at cyoclen ke meba tiꞌj, akeye nxjalile in baj cyyajlaꞌne ke meba xuꞌj, ex in che elkꞌane cyiꞌj ke meba cꞌwaꞌl. 3 ¿Ti cbantel cyuꞌne oc t-xi cykꞌoꞌne tajlal tiꞌj cyakꞌunbene, oc t-xi cyqueꞌyine najchak aju castiw cyjaꞌ ttzaj cyibaje? ¿Al ucꞌil che xeꞌle kanil onbil? ¿Jatum cyjel cykꞌoꞌne cykꞌinumable? 4 Che bel yutꞌeꞌye tuꞌn xobajil oc cyxi kꞌiꞌne pres, ex ka miꞌn, che bel tzꞌake junx cyucꞌil keju byoꞌn che bel. Masque icju, naꞌnx tchewix tkꞌoj Kman cyiꞌje; cucx tjaw tiꞌn tkꞌab tuꞌn tcub cycastiwoye.Ajben rey te Asiria tuꞌn Dios tuꞌn ttzaj castiw
5 Ay becꞌbil twitz rey cye aj Asiria. Ic tten ic tzaꞌn jun tkꞌab tzeꞌ in ajben wuꞌne tuꞌn tcub castiw, ex in ajben wuꞌne ic tzaꞌn jun var oc ttzaj nkꞌoje. 6 In xi nsamaꞌne tuꞌn toc tzokpaj tiꞌj jun nasyon mintiꞌ tchiꞌ Dios tuj twitz, ex in xi nsamaꞌne tiꞌj jun tnam at nkꞌoje tiꞌj, tuꞌn ttzaj telkꞌaꞌn, tuꞌn tel tiꞌn cykꞌinumabl ex tuꞌn cybaj twaban ke xjal ic tzaꞌn xokꞌl tuj cay. 7 Atzunte rey cye aj Asiria mintiꞌ ma cub t-ximan icju ex mya t-ximbetz jlu. Nok oꞌcx in ximan tiꞌj tuꞌn cycub t-xitun ex tuꞌn cynaj nimcu nasyon tuꞌn. 8 In tmaꞌn: Ke nejenel ateꞌ ntxlaje ax cyoclen ic tzaꞌn ke rey. 9 Aju o baj tiꞌj tnam Calno wuꞌne, axtzun o baj tiꞌj tnam Carquemis, aju o baj tiꞌj tnam Hamat, axtzun o baj tiꞌj tnam Arfad, aju o baj tiꞌj tnam Samaria, axtzun o baj tiꞌj tnam Damasco. 10 O cub cyiꞌj ke nasyon wuꞌne, akeju at nimxix cydios, mas nim cyilbilal cydios at twitz cye aj Jerusalén ex cye aj Samaria. 11 Aju o nbinchaye cyiꞌj aj Samaria ex cyiꞌj cydios, ¿mlaypetzun bant jlu wuꞌne cyiꞌj aj Jerusalén ex cyiꞌj cydios? Chi rey cye aj Asiria.
12 Oc tbaj bant tcyakil tuꞌn Kman aju at tuꞌn tbinchante twi witz Sión ex tuj Jerusalén, cbeltzun tkꞌoꞌn tcastiw rey cye aj Asiria tuꞌn tlaj tnimbil tib, ex tuꞌnju oc tkꞌon tib te maꞌxix toclen ex o cawin cyuwxix wen.
13 Aju rey cye aj Asiria in tmaꞌn cyjaꞌ: Tuꞌn wexe wipumal ma nbinchaye jlu: Ma baj nchꞌexpune cymojonil ke nasyon, ma che tzyet cykꞌinumabl wuꞌne ex ma che naj ke rey wuꞌne tuꞌnju cyuw ncꞌuꞌje tuj kꞌoj. 14 Ma tzꞌel wiꞌne cykꞌinumabl ke tnam, ma tzyet tcyakil cytxꞌotxꞌ wuꞌne, mer ic tzaꞌn jun xjal nneꞌtz tiꞌn jos tuj tkꞌuꞌ jun chyuꞌj otok cyaj tcolin tkꞌuꞌ, mi aꞌl jun tzaj tyucun t-xicꞌ ex mi aꞌl jun jaw tcꞌabin tuj ttziꞌ ex mi aꞌl jun jaw kꞌajt.
15 ¿Jacupe tzꞌoc tkꞌon tib siꞌwbil cꞌuxbil te mas maꞌ toclen twitz ju xjal in txꞌemin? ¿Jacupe tzꞌoc tkꞌon tib sier te mas maꞌ toclen twitz ju yuculte? Mya te cyꞌakoꞌch in jaw yucun te xjal, ate xjal in jaw yucunte cyꞌakoꞌch.
16 Cyjaꞌtzun, ate Kman aju Tajaw Tcyakil che cyjel tkꞌoꞌn te mintiꞌ cyipun ke xjal at-xix cyipun; ctzajel tkꞌoꞌn kꞌakꞌ tuꞌn tbaj naj tcyakil cyipun. 17 Ate Dios Xjan, aju Spicꞌun cye aj Israel, cꞌoquel ic tzaꞌn tkan kꞌakꞌ ex tuj junx kꞌij che bel tpatun tcyakil tkan chꞌiꞌx cyucꞌix chꞌiꞌx cꞌul at tuj txꞌotxꞌ, ex che najel tuꞌn. 18 Te jumajx che najel ke tzeꞌ ex ke tkan cyawal tbanilxix. Che cyjel ten ke ic tzaꞌn jun xjal yab mintiꞌ tipun. 19 Ex tuꞌnju nicꞌxi tzeꞌ che cyjel ten tuj chcꞌul, jacu bant cyajlet tuꞌn jun cꞌwaꞌl.
20 Tuj tkꞌijlalil tzul, aju chꞌintl xjal aj Israel otok che cyaj ten, akeju tiyjil Jacob otok che cyaj clet, mlay tzꞌoc keꞌtl cycꞌuꞌj cyiꞌj keju otok che baj cꞌixbisante cye, nok oꞌcx cꞌoquel keꞌ cycꞌuꞌj tiꞌj Kman aju Dios Xjan cye aj Israel. 21 Nicꞌxi junjun xjal tiyjil Jacob che ajetz meltzꞌaj tucꞌil Dios maꞌxix tipumal. 22 Akeye aj Israel, masque nimxix cyajlale ic tzaꞌn ttxa tzꞌaꞌn at ttzi mar, pero nok nicꞌxi junjun cꞌajetz meltzꞌaj. 23 Porque ate Kman aju Tajaw Tcyakil, ma cub t-ximan tuꞌn cynaje, ex cbantel tuꞌn tuj tcyakil cytxꞌotxꞌe.
24 In tmaꞌn Kman cyjaꞌ, aju Tajaw Tcyakil: Akeye xjal etzan wuꞌne ex najl keye tuj tnam Sión, miꞌn che xobe cywitz aj Asiria, masque che baj pekꞌane tuꞌn cyvar, ex ka ma che baj yajlaꞌne cyuꞌn, ic tzaꞌn o cybincha aj Ejipt. 25 Porque chꞌix tpon tkꞌijlalil tuꞌn tchewix nkꞌoje cyiꞌje, ex te tibajxi che najel aj Asiria wuꞌne, chi Kman. 26 Ate Kman aju Tajaw Tcyakil che bajel tcꞌixbisaꞌn, ic tzaꞌn tej cynaj aj Madián tuꞌn max twi pic Oreb, ex cxel tnukpiꞌn tcyꞌakoꞌch tibaj mar ic tzaꞌn o tbincha tuj Ejipt. 27 Tuj kꞌij lu cꞌelel kꞌiꞌn aju iktz o tzꞌoc cykꞌoꞌn ttzal cyiꞌje, tucꞌix ju yuw cub cykꞌoꞌn tibaj cykule.
Che ul lakꞌeꞌ aj kꞌoj
Ke aj kꞌoj cyjaꞌ cytzaj tumlal tnam Rimón, 28 che ul tuj tnam Ajat, che icꞌel aj tuj tnam Migrón ex cyjel cycꞌuꞌn cyikatz tuj tnam Micmas, 29 che icꞌetz tuj xajbil aꞌ, ax che bel ten jun konicꞌan tuj tnam Geba; ke xjal tuj tnam Ramá ctzajel t-xobil cyiꞌj; che elel ok aj Gabaa aju ttanmi Saúl. 30 Cyjaw schꞌine akeye aj Galim. Cybinxe akeye aj Laisa. Becꞌbil cywitze akeye aj Anatot. 31 Ke aj Madmena che elel ok, ke xjal najl tuj tnam Gebim cxel cyewan cyib. 32 Biꞌx jaꞌlo che webil jun rat ke aj kꞌoj tuj tnam Nob; cjawil cyyecꞌun cykꞌab te jun techal tuꞌn cykꞌojin tiꞌj tnam Jerusalén twi witz Sión. 33 Cyqueꞌyinxe, ate Kman aju Tajaw tcyakil cbajel tjachin ke tkꞌab tzeꞌ tuꞌn tipumal xobajilxix, cjawil ttxꞌemin ke tzeꞌ maꞌxix cywaꞌl, ex che bel tzꞌak twitz txꞌotxꞌ. 34 Tuꞌn siꞌwbil cꞌuxbil cbajel ttxꞌemin aju chcꞌul pin tzeꞌ tuj, ex ke tzeꞌ tbanilxix ateꞌ twi witz Líbano che bel tzꞌak twitz txꞌotxꞌ tuꞌn tipumal.