Aju tiyjil Isaí cꞌoquel te rey tuꞌn cyten xjal tuj txubtxaj ex tuꞌn t-xi binchet cyiꞌj
11
Cyxol tiyjil Isaí cjawil jlet jun rey tuꞌn toc te t-xel David. Ic tten jlu ic tzaꞌn jun tzeꞌ in jaw txꞌemit, oꞌcx ttronquil in cyaj ten ex tiꞌj tronc in tzaj jlet t-xul. 2 Cucx ctel T-xew Kman tucꞌil tiyjil David ex cxel tkꞌoꞌn tojtzkibl tuꞌn tel tnicꞌ tiꞌj tcyakil; cxel tkꞌoꞌn tnabl ex tipumal, cꞌelel tnicꞌ tiꞌj tajbil Kman ex cnimal te. 3 Ctzalajel oc tniman te Kman; mlay che oc xjal tuj xjel tuꞌn nok tuꞌnju oc tqueꞌyinte alcye cyten xjal, ex mlay bant cyiꞌj xjal nok tuꞌnju in tbiꞌn.4 Tuj tumelxix cxel tbinchaꞌn cyiꞌj ke xjal mintiꞌ cyipun ex cxel tbinchaꞌn cyiꞌj ke meba xjal ateꞌ tuj tcyakil twitz txꞌotxꞌ. Aju tyol ic cꞌoquel ic tzaꞌn jun tzeꞌ tuꞌn tcub cycastiw xjal najl twitz txꞌotxꞌ, ex tuꞌn t-xew nneꞌtz tuj ttziꞌ che cymel ke xjal binchal mya baꞌn. 5 Tuj tumelxix ccawil cyibaj xjal ex axix toc tyol. 6 Ke xoꞌj ex ke tal ẍneꞌl che najal junx tuj tzalajbil, ke tigr ex ke tal chip junx che bel buneꞌ, ke tal tor ex ke balun junx che waꞌl ex ke tal cꞌwaꞌl che pastoril cyiꞌj. 7 Ke vac ex ke ttxuꞌ oso junx che waꞌl, ex junx che bel buneꞌ ke cyal. Aju balun cꞌul cxel twaꞌn ic tzaꞌn te wacẍ. 8 Jacu che schan tal neꞌ ttziꞌ tjul lobaj baꞌn biyun, ex jacu cuꞌx cykꞌoꞌn cykꞌab tuj tkꞌuꞌ kꞌantiꞌ ex mintiꞌ cbajel cyiꞌj. 9 Tuj tcyakil twi witz xjan aju etzan tuꞌn Kman, misicyer jun cbinchal jun mya baꞌn tiꞌj juntl, porque ic tzaꞌn aꞌ in noj mar tuꞌn, ax icxtzun cycyakil xjal twitz txꞌotxꞌ cꞌelel cynicꞌ tiꞌj Kman. 10 Tuj tkꞌijlalil tzul ctzajel jun tiyjil Isaí ex cꞌoquel te jun techal cye cycyakil xjal; che jyol ke nasyon tiꞌj ex tbanilxix cꞌoquel tnajbil.
Che ajetz meltzꞌaj juntl maj ke xjal otok cheꞌx kꞌiꞌn najchak
11 Tuj tkꞌijlalil tzul cxel tyecꞌun Kman juntl maj tipumal tuꞌn cycolpet ke xjal etzan tuꞌn, akeju otok che cyaj ten tuj Asiria, tuj Ejipt, tuj Patros, tuj Etiopía, tuj Elam, tuj Sinar, tuj Hamat ex cyuj ke txꞌotxꞌ ateꞌ ttzi mar, ex tuꞌn cyajtz tiꞌn juntl maj. 12 Cjawil twaban jun techal cye ke nasyon ex che oquel tchmoꞌn ke aj Israel, akeju otok cheꞌx kꞌiꞌn cyuj tnam najchak, ex che tzajel tchmoꞌn ke xjal aj Judá cysputin cyib tuj tcyakil pacꞌ ttxaꞌnpun txꞌotxꞌ. 13 Cbajel tloꞌch cycꞌuꞌj aj Efraín ex che najel ke aj kꞌoj cyiꞌj aj Judá; mlay tzajtl tloꞌch cycꞌuꞌj aj Efraín cyiꞌj aj Judá ex mlay che kꞌojintl aj Judá cyiꞌj aj Efraín. 14 Cycabil che xeꞌl tuj telex kꞌij tuꞌn cyoc tzokpaj cyiꞌj aj Filistey tuj mlaj txꞌotxꞌ; cycabil che elel kꞌinte cykꞌinumabl ke xjal ateꞌ tuj tjawitz kꞌij. Cbel cyiꞌj aj Edom ex aj Moab cyuꞌn, ex ke aj Amón che cyjel ten tjakꞌ cycawbil. 15 Cꞌajel tzkij tkꞌab mar aju at tuj Ejipt, cxel tnukpiꞌn tkꞌab tibaj nima Éufrates, ctzajel t-xupin jun cykꞌikꞌ xobajilxix, ex te wuk paꞌn cꞌelel nima tuꞌn, ex miꞌn tzꞌel cyiꞌn cyxajab oc cyicꞌx tuj aꞌ. 16 Octzun cyajtz meltzꞌaj ke xjal otok che cyaj ten tuj Asiria, akeju etzan tuꞌn Kman, cnetel jun be maꞌxix twitz cyuꞌn, ic tzaꞌnx tej cyetz ke aj Israel tuj Ejipt.