12
Cucx ximana tiꞌj Dios aju binchan teya, acux cuꞌxuna ex acux naꞌnx tul canun tkꞌijlalil mya baꞌn, porque tzul tkꞌijlalil tuꞌn tmanteya: Ya mintiꞌtl in chin tzalaje cucx tuꞌn ntene. 2 Naꞌntza jaꞌlo naꞌnxtok toc yupj twitz kꞌij ex twitz xjaw ex cywitz ke cheꞌw, porque mlay che tila ke, ex atxcu muj ticꞌlenxi jbal tuj twitza tuꞌnju sjumin tiꞌj. 3 Tzul tkꞌijlalil tuꞌn cytzaj luꞌlun ke tkꞌaba o che ajben te clol teya, ex cbajel cyipun ke tkana, mya nim twitz teya che cyjel ten tuꞌn twaꞌna; cꞌoquel yupj tiꞌj tbakꞌ twitza ex mlay tila wen. 4 Oc tul canun tkꞌijlalil lu, mlay tbiya aju in kꞌajt tuj cay, porque che lametel ke t-ẍcyina, ex ya mlay tbiya tkꞌajkꞌajel cycyaꞌ xjal, mi cybitz ke chyuꞌj. 5 Tzul tchi tiꞌja oc tjax beta jawl ex puro xobajil tuꞌn tbeta tuj be.Cꞌoquel ttzmal twiꞌya puro sak, ex pen cbetela, ex mintiꞌtl taja tiꞌj jun tiꞌxti. Cyjaꞌ t-xiꞌ xjal tuj tnajbil te jumajx, ex in binjtz ma tuj cay aju okꞌel nnoꞌc tiꞌj xjal oc tcyim.
6 Cucx ximana tiꞌj Dios biꞌx jaꞌlo, aju binchan teya, naꞌnxtok tlakj takꞌal sak pwak, ex naꞌnxtok tpax ju cꞌil kꞌan pwak ttxꞌotxꞌil, ex naꞌnxtok tpax ju ẍokꞌ ttzi jul jatum in jatz aꞌ, ex naꞌnxtok tnaj garruch in ajben tuꞌn tjatz aꞌ. 7 Porque te tibajxi jlu, aju kximlal cꞌoquel juntl maj te txꞌotxꞌ ic tzaꞌn tten nej, ex aju kxew cꞌajel juntl maj tucꞌil Dios porque tucꞌil Dios tzaj.
8 Akine pacbal in xi nmaꞌne juntl maj: Nokx gan jlu, nokx gan jlu; tcyakil jlu nokx gan.
Ke mancbil yol
9 Ex tej toc ju pacbal mas at-xix tnabl, xi tkꞌoꞌn mastl xnakꞌtzbil cye xjal tiꞌj tcyakilju baꞌn tuꞌn. Ax icx xi tkꞌon tib tuꞌn t-xnakꞌtzan tiꞌj nimcu yol te xnakꞌtzbil, ex tuꞌn tbaj tbinchaꞌn tuj ttxolil. 10 Oc tilil tuꞌn pacbal tuꞌn cycnet ke yol tujxix tumel, ex tuꞌn cycub ttzꞌiban ke yol tuj ttxolil ex axix toc.
11 Aju cyyol ke xjal at cynabl ic cyten ic tzaꞌn jun tzeꞌ tzꞌuꞌp twiꞌ in ajben tuꞌn cwentil wacẍ, ex octzun cybaj chmet, ic cyten ic tzaꞌn jun stac awaꞌnxix wen tuꞌn jun pastor. 12 Jaꞌlotzun ncꞌwaꞌl, tzꞌocx tnabla tiꞌj tcyakil jlu. Tuꞌn cybinchet ke libro, a jlu mintiꞌ bajsbil te, ex tuꞌnju nim in xnakꞌtzaꞌn xjal tiꞌj, nim in sict.