Cub cycastiw ke xjal miban che bin
65
In tmaꞌn Kman cyjaꞌ: Ke xjal mi jun tiꞌxti o tzaj cykanin weye, atzun keju ma che ul wucꞌile, ke xjal mintiꞌ o che jyon wiꞌje, atzun keju ma chin cnete cyuꞌn. Xi nmaꞌne cyjaꞌ cye ke xjal bajx che cubsan nwitze: Lu kine lu, nchiye. 2 Enter kꞌij ma txi nnukpiꞌn nkꞌabe txcol cye xjal miban che bin, cyjaꞌ cyxiꞌ tuj be mya baꞌn ex lepch ke tiꞌjx cyex cyximbetz; 3 cucx ma chin oc icꞌleꞌne cyuꞌn ke xjal lu ex tibaj nwitze ma tzꞌoc cymaꞌn cyyol, xi cykꞌoꞌn chojbil te cydios t-xol tkan awal ex cub cypatun storac tibaj lagriy binchamaj te altar; 4 in che cub ten cyxol ke cymukbil cyimni ex nneꞌx akꞌbil cyuꞌn cyuj ke lugar tuj tewan in che chyoꞌn tchibjal boch ex in cynojsaꞌn cycꞌil tuꞌn taꞌl chibj mayoꞌn wuꞌne tuꞌn miꞌn t-xi cychyoꞌn. 5 In cymaꞌn cye cyucꞌil: Tencja ma chixin, miꞌn ko oc tmacoꞌna, porque xjan koꞌye ex mya baꞌn tuꞌn koc tmacoꞌna, che chi. Ke xjal lu ic cyten ic tzaꞌn kꞌakꞌ in cꞌant tcyakil kꞌij, ex mya baꞌn ke te weye; ic cyten ic tzaꞌn oc nnoꞌcx sib tuj ntxaꞌne. 6 Pero tcyakil jlu tzꞌibamaj nwitze ex mlay chin cyaj tene nok cucx miꞌnwt chin kꞌajte; cbel nkꞌoꞌne cycastiw ic tzaꞌnx cybinchben. 7 Cchjetel cyuꞌn tiꞌj ju mya baꞌn o cybincha ex mya oꞌcx jlu, ax icx tiꞌj mya baꞌn o cybincha ktzan cyxeꞌchel, porque cub cypatun storac cywiꞌ nmak witz ex in el icꞌune cyuꞌn cywiꞌ ke tal witz. Nej cjawil wiꞌne tajlal cybinchben mya baꞌn, maxitzun cbel nkꞌoꞌne cycastiw, chi Kman Dios.Tzaj ttziyan Kman tuꞌn ttzaj tkꞌoꞌn tcyꞌiwbil
8 Chi Kman in tmaꞌn cyjaꞌ: Ka at nim taꞌl jun pnuj twitz uva, mintiꞌ in baj cyyajan xjal, porque jacu tzꞌel nim taꞌl uva tiꞌj. Cyjaꞌxtzun weye, nok tuꞌnju ncꞌujlalile cyiꞌj nmajene, mlay cub nxitune enter nasyon. 9 Che chmetel ke tiyjil Jacob wuꞌne, ax icx ke tiyjil Judá, tuꞌn cynajan cywiꞌ ke witz etzan wuꞌne. Ke xjal scꞌoꞌmaj wuꞌne che etzal tiꞌj txꞌotxꞌ, ke xjal in che ajben weye che najal ma chixin. 10 Aju chkꞌajlaj Sarón cnojel tuj cyuꞌn ẍneꞌl, ex tuj chkꞌajlaj Acor che waꞌl ke wacẍ; ke alumaj lu cyalun ke xjal in che jyon wiꞌje. 11 Atzun cyeye nneꞌl cypaꞌn cyibe wiꞌje ex nnicꞌ tnaꞌnjtz cyuꞌne aju witz xjan etzan wuꞌne, in xi cykꞌoꞌne wabj ex taꞌl twitz uva te Gad ex te Meni, akeju tilbilal jatum in che pon xjal kanil cyswert. 12 Cyjaꞌtzun, mya baꞌn aju cyswerte tzul wuꞌne, che bel ẍmejeꞌye tuꞌn cycub byoꞌne tuꞌn spad. Porque e tzaj ntxcoꞌne, atzun cyeye mintiꞌ in tzaj cytzakꞌweꞌne; in yoline cyucꞌile, pero mintiꞌ in cub cybiꞌne; o cybinchaye aju mintiꞌ in cub tuj nwitze, jaw cyscꞌoꞌne aju mintiꞌ in chin tzalaje tiꞌj.
13 Cyjaꞌtzun in xi nmaꞌne cyeye: Ke ajbel weye ctel cywa, atzun cyeye cꞌicꞌex weꞌyaj cyuꞌne; ke ajbel weye ctel cycꞌa, atzun cyeye cꞌicꞌex txketleꞌn cyuꞌne; ke ajbel weye che tzalajel, atzun cyeye ctzajel cychꞌixwiye; 14 ke ajbel weye che bitzal tuꞌnju at nimxix tzalajbil tuj cyanmi, atzun cyeye che schꞌile ex che okꞌele tuꞌn cybise ex tuꞌn taꞌw cꞌixcꞌoj toc cyiꞌje. 15 Ke xjal scꞌoꞌmaj wuꞌne cꞌajbel cybiye cyuꞌn tuꞌn ttzaj cykanin mya baꞌn ex camic cyiꞌj txkantl xjal, atzun ke weye nmajen cbajel nchꞌexpuꞌne cybi. 16 Nok alcyex jun xjal najl tuj tnam lu, oc t-xi tkanin jun cyꞌiwbil, cxel tkanin te Dios aju in japunxix tyol; ex nok alcyex ma txi ttziyan jun yol axix toc, cxel ttziyan tuj tbi Dios aju in japunxix tyol. Aju cꞌixbisabl cye ojtxi ma tzicꞌ tnaꞌl wuꞌne ex mlay tzꞌoc nqueꞌyine juntl maj; ma che cub naj nwitze.
Aju acꞌaj cyaꞌj ex acꞌaj txꞌotxꞌ
17 Cybintze, cbantel jun acꞌaj cyaꞌj ex jun acꞌaj txꞌotxꞌ wuꞌne. Aju o baj te tjakꞌxi cꞌicꞌel tnaꞌl ex mi aꞌl jun ctzajel naꞌntl te. 18 Nojx tuj cyanmiye tuꞌn tzalajbil ex cucx che tzalaje te jumajx tiꞌj ju cbantel wuꞌne, porque cꞌoquel Jerusalén te acꞌaj juntl maj wuꞌne, cꞌoquel te jun tnam te tzalajbil, tuꞌn cytzalaj ke xjal che tel tuj. 19 Ax wucꞌixe chin jawil tzalaj tiꞌj tnam Jerusalén ex chin tzalajele cyiꞌj ke xjal etzan wuꞌne. Mlay binjtz juntl maj okꞌel tuj ex mi jun c-ayayal tuꞌn tbis. 20 Tuj tnam lu mi jun cꞌwaꞌl cymel cꞌitzketok tul-len itzꞌj ex mi jun tij xjal cymel naꞌnxtok tjapun baj tankꞌibl. Ka ma cyim jun xjal matok in japun jun syent abkꞌi tuꞌn, entons cuꞌxunx taꞌ oc tcyim, ex katzun mi ma japun jun syent abkꞌi tuꞌn jun xjal, jun castiw jlu. 21 Cjawil cybinchaꞌn xjal cyja ex ax ke che najal tuj, ex cbelex cyawaꞌn tkan uva ex ax ke che loꞌl tiꞌj twitz. 22 Oc tjaw tbinchaꞌn xjal jun ja, mlay bant tuꞌn tpon junxitl najal tuj, ex oc tcuꞌx tawal xjal, mlay bant junxitl tuꞌn twaꞌn tiꞌj. Ke xjal etzan wuꞌne, maꞌ ctel tuj cyankꞌibl ic tzaꞌn tuj tankꞌibl jun tzeꞌ; ke xjal scꞌoꞌmaj wuꞌne che tzalajel tiꞌj takꞌunben cykꞌab. 23 Mya nokx gan che akꞌnal, ex ke cycꞌwaꞌl mlay che cyim naj, porque ke cꞌwaꞌl lu, cyiyjil ke xjal tcub ncyꞌiwbile cyibaj; ax icx ke cyiyjil che ul itzꞌj te tibajxi, che bel ncyꞌiwlaꞌne. 24 Naꞌnxtok ntzaj txcoꞌne cyuꞌn, che tzajel ntzakꞌweꞌn naje; ex naꞌnxtok cybaj yolin, ctzajel nkꞌoꞌn nwiꞌye cyiꞌj. 25 Junx che waꞌl ke xoꞌj cyucꞌil ke ẍneꞌl; cꞌul cxel cywaꞌn ke balun ic tzaꞌn ke wacẍ, ex txꞌotxꞌ cxeꞌl cyuꞌn lobaj. Twitz tcyakilju witz xjan weye, mi jun cꞌoquel binchante jun mya baꞌn tiꞌj juntl ex mi tuꞌn toc ten cꞌixbisal, chi Kman.