64
Nokwit xbaj tlakina cyaꞌj ex xcuꞌtza tuꞌn cyjaw luꞌlun ke witz twitza, 2 ic tzaꞌn in baj tzꞌeꞌy txkan chꞌiꞌx tuꞌn kꞌakꞌ ex ka ic tzaꞌn in tzaj loklon aꞌ, jacutzun tzꞌel cynicꞌ aj kꞌoj tiꞌja, tiꞌj tipumala ex jacu che tzaj luꞌlun ke nasyon twitza. 3 Tej tbinchanteya tbinchbena xobajilxix, aju mintiꞌtok ximan kuꞌne tuꞌn ttzaj tkꞌoꞌna, ex tej tcuꞌtza, e jaw luꞌlun ke witz twitza. 4 Bajx kbiye ex bajx kile ka at juntl dios jacu bant tcyakil jlu tuꞌn, ex tuꞌn tbinchante t-xtalbil cye keju kꞌukl cycꞌuꞌj tiꞌj. 5 In cꞌmet xjal tuꞌna, aju in tzalaj tuꞌn tbinchante ju baꞌn ex nnuꞌl tiꞌj tcꞌuꞌj tuꞌn tbinchante aju tajbila.Ma tzaj tkꞌoja kiꞌje tuꞌn tlaj ma ko binchane il; ax tuj kile ma ko tene ma bet-xi kꞌij. ¿Ocpetzun ko cletele? 6 Kcyakile ic ktene ic tzaꞌn jun xjal mya sak tuj tanmi, tcyakilju kbinchbene baꞌn mer ic tzaꞌn jun ttxꞌakan xbalun tzꞌil tiꞌj; kcyakile ma ko cub tzꞌake ic tzaꞌn t-xak tzeꞌ in tzaj tzꞌak oc ttzkij, ex aju kbinchbene mya baꞌn in xi kꞌinte keye ic tzaꞌn tuꞌn cykꞌikꞌ. 7 Mi aꞌl jun in cubsan twitza ex mi aꞌl jun nnoꞌc tilil tuꞌn tuꞌn toc keꞌ tcꞌuꞌj tiꞌja; cyjaꞌtzun ma cub tewan tiba kwitze ex ma ko cyaj tcolina tuꞌn tlaj kbinchbene mya baꞌn.
8 Masque icju, pero aya Kmane; akoꞌye ic tzaꞌn xcab txꞌotxꞌ ex atzun teya binchal keye ic tzaꞌn jun xjal binchal xar, porque kcyakile ma ko bante tuꞌna. 9 Kman, miꞌn tzaj nimxix tkꞌoja kiꞌje ex miꞌn tzaj tnaꞌna kbinchbene mya baꞌn. Ko tqueꞌyintza, porque kcyakile etzan koꞌye tuꞌna. 10 Ke tnam xjan teya, ma che oc te jun lugar tzkij txꞌotxꞌ; ma tzꞌoc Jerusalén te jun tnam mintiꞌ xjal tuj, ma naj tnam Sión. 11 Aju lugar xjan ex maꞌ toclen te keye, jatum jaw nimsaꞌn tbiya cyuꞌn ke kxeꞌchele, ma baj naj tuꞌn kꞌakꞌ. Tcyakilju in ko tzalaje tiꞌj ma baj xitj. 12 Ex tiꞌj tcyakil jlu, Kman, ¿cucxpetzun cꞌicꞌelex tiꞌj tuꞌna? ¿Maj miꞌntzun kꞌajta tiꞌj? ¿Cucxpetzun ko tele tuj bis maꞌxix tuꞌna?