—Akine, in chin yolin jun yol tzꞌaklxix ex at nim wipumale tuꞌn cyclete wuꞌne.

2 ¿Tikuꞌntzun cyak queꞌyin t-xbaluna tocsaꞌn, mer ic tzaꞌn t-xbalun jun xjal oc nneꞌl tpatzꞌuꞌn taꞌl twitz uva tuꞌn tkan?

3 Ax toc o chin patzꞌune taꞌl twitz uva njunalxe ex mi aꞌl jun o onin wiꞌje, tucꞌil nim ntxꞌuꞌjile e baj nwabane ke aj kꞌoj wiꞌje, e baj nbetzꞌane tuꞌn nkꞌoje; ma tzꞌoc txꞌitl chicꞌ tiꞌj nxbalune ex ma baj naj tiꞌj tcyakil tuꞌn. 4 Cub nximane tuꞌn tpon tkꞌijlalil tuꞌn tcub cycastiw aj kꞌoj wuꞌne, porque otok tzul canun tkꞌijlalil tuꞌn cycolpet ke xjal etzan wuꞌne. 5 Baj nqueꞌyine, pero mi aꞌl jun tuꞌn t-onin wiꞌje; biꞌx in jaw labine tuꞌnju mi aꞌl jun tuꞌn tkeꞌ ncꞌuꞌje tiꞌj. Cyjaꞌtzun, tuꞌnx nkꞌabe cub cyiꞌj aj kꞌoj ex ax nkꞌoje o kꞌonte wipumale. 6 Tuꞌnju nim nkꞌoje tzaj, e baj nbetzꞌane ke nasyon, biꞌx e naj tuꞌn nkꞌoje ex o bet tel cychcꞌel wuꞌne twitz txꞌotxꞌ, chi Kman.

7 Waje tuꞌn nyoline tiꞌj tcꞌujlalil Kman, ex tuꞌn nbitzane tuꞌntzun tjaw nimset tbi tiꞌj tcyakilju baꞌn ma tbincha kiꞌj, tuꞌnju nimxix t-xtalbil cyiꞌj ke cyiyjil aj Israel ex tuꞌnju o tbincha tuꞌn tkꞌakꞌbil tcꞌuꞌj ex tuꞌn tcꞌujlalil. 8 Chi Kman o tma: Etzan ke xjal lu wuꞌne, cꞌwaꞌlin ke wuꞌne ex mlay chin sbunjtze cyuꞌn. Cyjaꞌtzun e clet tuꞌn. 9 Tuj tcyakil yajbil tzaj cyiꞌj, ax icx te o yajlanjtz. Ax t-anjel Kman o clonte cye. A o colpin cye tuꞌnju tcꞌujlalil ex tuꞌnju tkꞌakꞌbil tcꞌuꞌj; e jaw twaban ex e jaw tchleꞌn; iclex o tbincha atxix ojtxi. 10 Atzun cye jaw cyiꞌn cyib tuꞌn cykꞌojin tiꞌj Kman, cyjaꞌtzun, tzaj tbis T-xew Dios tuꞌn cybinchben mya baꞌn ex oc te aj kꞌoj cyiꞌj ex ax o kꞌojin cyiꞌj. 11 Ke xjal etzan tuꞌn Kman tzaj cynaꞌn aju tkꞌijlalil te ojtxi tej tten Moisés, ex in baj cykanin cyxolx cyjaꞌ: ¿Jatum taꞌ Dios aju colpinte cye xjal tuj mar, tucꞌix Moisés aju pastor cyiꞌj ke xjal etzan tuꞌn Kman? ¿Jatum taꞌ Dios aju xi kꞌonte T-xew tuꞌn tten cyucꞌil, 12 ex xi tkꞌoꞌn tipumal maꞌ toclen tuꞌn tten tucꞌil Moisés? ¿Jatum taꞌ Dios aju cub paꞌnte mar cywitz ke xjal etzan tuꞌn, tuꞌntzun tbinjtz aju tkanil tiꞌj tipumal te jumajx? 13 ¿Jatum taꞌ aju icꞌx kꞌinte cye xjal tuj tmij mar ex mintiꞌ e jaw tolj, ic tzaꞌn ke chej mintiꞌ in che jaw tolj tuj tzkij txꞌotxꞌ, 14 ex ic tzaꞌn ke wacẍ in che cuꞌtz cywi witz tuꞌn cycubil tuj chkꞌajlaj? Axte Dios ẍaklul cye. Cyjaꞌtzun tten e jeꞌx t-ẍakluꞌn ke xjal etzan tuꞌn ex cyjaꞌtzun tten o tcamba tuꞌn tyolinjtz jun tkanil baꞌn tiꞌj ex tuꞌn tjaw nimsaꞌn tbi.

15 Kman, ko tqueꞌyintza max tuj cyaꞌj, max tuj lugar xjan ex maꞌ toclen jatum najliya. ¿Jatum taꞌ tcꞌujlalila maꞌxix ex tipumala? ¿Mape baj tkꞌakꞌbil tcꞌuꞌja kiꞌje? 16 Aya Kmane masque mintiꞌ ojtzkiꞌn koꞌye tuꞌn kxeꞌchele Abraham ex mintiꞌ in ko ule tiꞌj tcꞌuꞌj Jacob, pero aya Kmane; ma bet-xi kꞌij axte colpil keye. 17 Kman, ¿Tikuꞌn in tkꞌoꞌna ambil tuꞌn kel txalpaje tiꞌj tbeya ex in tcyuwsaꞌna kanmiye tuꞌn miꞌn knimane teya? Tajtz meltzꞌaja juntl maj kucꞌile nok tuꞌn tcꞌujlalila kiꞌje, akoꞌye tmajena ex akoꞌye aj Israel etzan koꞌye tuꞌna. 18 Nok chꞌin tuj o oque tajwil ktanmiye, akoꞌye kpaꞌn kibe tuꞌn kajbene teya. Ke aj kꞌoj kiꞌje ma baj cywaban aju tjaya xjan. 19 Atoꞌye mer ic tzaꞌn bajx cawina jun maj kibaje ex mer ic tzaꞌn bajx tzꞌoc tbiya kiꞌje.