62
Tuꞌnju at ncꞌuꞌje cyiꞌje akeye aj Sión, mlay txi ncoline tuꞌn nkꞌajte, ex tuꞌnju at ncꞌuꞌje cyiꞌje akeye aj Jerusalén, mlay chin ajlane ocxi t-spicꞌeꞌ ju cycambable ic tzaꞌn in tzaj spicꞌeꞌ t-xe cyaꞌj te prim, ex ocxi tcꞌant ju colbil cyeye ic tzaꞌn jun ttxaꞌn tzaj in cꞌant. 2 Oc cyilaꞌ ke nasyon aju colbil cyeye, oc cyilaꞌ cycyakil rey aju cyajwalile. Cꞌoquel kꞌoꞌn juntl tbi Jerusalén acꞌaj, axte Kman cꞌoquel kꞌonte. 3 Cꞌoquel tnam Jerusalén ic tzaꞌn jun coron tbanilxix queꞌyin tocx tuj tkꞌab Kman Dios. 4 Mlay txi cymaꞌntl xjal tiꞌj tnam Jerusalén: O cyaj colin, che chiwt, ax icx mlay txi cymaꞌntl tiꞌj cytanmi: O cub xitj, che chiwt. Nok oꞌcx aju tbi tnam Jerusalén cꞌoquel, atzun jlu: Aju tnam nimxix nganiye tiꞌj, ex atzun tbi cytanmi xjal jlu: Nxuꞌjile. Porque in tzalaj Kman tiꞌj tnam Jerusalén, ex ic cꞌoquel Kman ic tzaꞌn jun chmilbaj te te cytanmi xjal. 5 Ic tzaꞌn jun cuꞌxun in mojeꞌ tucꞌil jun kꞌapoj, icxtzun che oquel ke aj Jerusalén te tajwil cytanmi ex ctzalajel tucꞌil, ic tzaꞌn jun chmilbaj in tzalaj tucꞌil t-xuꞌjil. 6 Ma che cub tkꞌoꞌn Kman ke xkꞌukil cyibaj ke muro cyoc tiꞌjele tnam Jerusalén. Kꞌijl ex konicꞌan mintiꞌ in xi cycolin tuꞌn cycubsan twitz Dios. Miꞌn txi cycoline tuꞌn cykꞌajte, akeye in che cubsane witz Kman, 7 miꞌn txi cykꞌoꞌne ambil te tuꞌn tojlan maxi ocxi tjaw tbinchaꞌn juntl maj ju tnam Jerusalén, ex ocxi tjaw nimsaꞌn tnam Jerusalén cyuꞌn cycyakil xjal twitz txꞌotxꞌ.8 Ma tzaj ttziyan Kman jun yol axix toc ex ma jaw tkꞌoꞌn tbankꞌab nimxix tipumal twitz cyaꞌj, chi cyjaꞌ: Mlay txi nkꞌoꞌne ambil cye aj kꞌoj tuꞌn t-xi cywaꞌn aju triw etzan cyuꞌne ex mi tuꞌn t-xi cycꞌaꞌn ke stranjer xjal taꞌl twitz uva aju o bant cyuꞌne tuꞌn cyakꞌunbene; 9 nok oꞌcx ax keye che waꞌle tiꞌj twitz cyawale otok jaw cychmoꞌne, ex chin jawil cynimsaꞌne; cbajel cychmoꞌne twitz uva ex che cꞌale tiꞌj taꞌl ax twitz njaye xjan.
10 Cyexe, cyexe ttzi tpwertil tnam; cybinchame ju be te cye ke xjal etzan ke wuꞌne. Cheba cychkꞌajlajin baje tuj ex cyiꞌmele ke abj tuj; cykꞌon jawe bander te jun techal te txocbil cye ke nasyon. 11 Lu jun tkanil tuꞌn Kman tuꞌn tpon max ttxaꞌnpun txꞌotxꞌ; cymanxe cye keju najl tuj tnam Sión: Ma tzul aju Clol cyeye, che chicuye. Ke xjal etzan tuꞌn Kman che ul tiꞌn junx tucꞌil akeju otok che colpet tuꞌn. 12 Atzun cybi cꞌoquel kꞌoꞌn jlu: Ke xjal xjan, ex atzun juntl cybi cꞌoquel jlu: Ke xjal o che tzokpet tuꞌn Kman, ex atzun tbi tnam Jerusalén cꞌoquel kꞌoꞌn jlu: Aju tnam nim tgan Dios tiꞌj ex aju tnam mya colimaj tuꞌn.