Aju tkanil colbil cye aj Israel
61
Aju T-xew Kman Dios at wucꞌile, porque ma tzaj kꞌoꞌn woclene tuꞌn Kman ex ma chin tzaj samaꞌne kꞌolte tkanil baꞌn cye meba, tuꞌn cybanix keju bis taꞌ cyanmi, tuꞌn t-xi nkꞌoꞌne tkanil cye keju e jeꞌx kꞌiꞌn pres tuꞌn cycolpet ex tuꞌn tjaket tpwertil cyja pres, 2 ex tuꞌn t-xi nkꞌoꞌne tkanil tiꞌj tkꞌijlalil tuꞌn tul canun t-xtalbil Kman ex tuꞌn tcub cycastiw ke aj kꞌoj tiꞌj. Ma chin tzaj t-samaꞌn tuꞌn tkꞌukbet cycꞌuꞌj keju in che bisun, 3 tuꞌn t-xi nkꞌoꞌne tzalajbil te t-xel bis cye keju in che bisun tuj tnam Sión, tuꞌn t-xi nkꞌoꞌne nim tzalajbil cye te t-xel okꞌel ex tuꞌn cybitzan te nimbil tbi Dios te t-xel bis. Ic che oquel ic tzaꞌn jun wiꞌ cꞌol awaꞌn tuꞌn Kman ex oc cybinchaꞌ aju tzꞌaklxix tuꞌn tyecꞌunjtz tajwalil Kman.4 Cjawil cybinchaꞌn juntl maj ke tnam ex ke ja e cub xitj ojtxi. 5 Stranjer xjal che oquel cwentil cyiꞌj cyẍneꞌle ex che akꞌnal tuj cycojbile ex tiꞌj tkan uva at cyeye. 6 Atzun cyeye cꞌoquel kꞌoꞌn cybiye pal te Kman ex tmajen Kdios. Che waꞌle tiꞌj cykꞌinumabl mastl nasyon ex aju cyajwalil cꞌoquel te jun adorn te cyeye. 7 Ex tuꞌnju nimxix ma tzicꞌx cyuꞌne ex nim ma cub cychꞌixwiye ex nim ma che oc icꞌlene, cyjaꞌtzun il tiꞌj tuꞌn cycꞌmonteye nim kꞌinumabl ax tuj cytanmiye ex che tzalajele te jumajx. 8 Porque nim in tzalaj Kman tuꞌn tbinchet aju tzꞌaklxix ex icꞌun tuꞌn aju elkꞌaꞌmj ex ju byoj xjal. Oc tkꞌaꞌ chojbil tbanilxix cye ke xjal etzan tuꞌn ex cyjel bant tiꞌj jun tyol cyucꞌil te jumajx. 9 Ke cyiyjil che ul itzꞌj te tibajxi che oquel te maꞌ cyoclen cyxol ke mastl nasyon; cycyakil keju che queꞌyil cyiꞌj cꞌelel cynicꞌ tiꞌj ka tcub tcyꞌiwbil Kman cyibaj.
10 Nimxix in chin tzalaje tiꞌj Kman ex in noj tuj wanmiye tuꞌn tzalajbil tiꞌj Ndiose, porque ma chin clete tuꞌn ex ma chin oc kꞌoꞌne te tzꞌaklxix tuꞌn. Ic ma chin oque ic tzaꞌn jun cuꞌxun cyjaꞌ tmojeꞌ toc t-xbalun tbanilxix, ex ic tzaꞌn jun kꞌapoj cyjaꞌ tmojeꞌ in baj tbinchaꞌn tib ex nnoꞌc tkꞌoꞌn tuꞌ. 11 Porque ic tzaꞌn te txꞌotxꞌ in tpokꞌsaꞌn tawal ex in tzaj t-xul awal tuj peꞌn, icxtzun oc tbinchaꞌ Kman tuꞌn cucx tbinchet aju tzꞌaklxix, ex cycyakil nasyon cjawil cynimsaꞌn tbi tuꞌn cybitz.