Aju tajwalil acꞌaj tnam Jerusalén
60
Weꞌctza tnam Jerusalén, koptzꞌajxa, porque ma tzul canun spicꞌun teya ex in koptzꞌaj t-spicꞌumal Kman tibaja. 2 Ma tzꞌoc yupj twitz txꞌotxꞌ tuꞌn klolj, ma che cyaj ten ke nasyon tuj kxopin, atzun teya ckoptzꞌajel t-spicꞌumal Kman tibaja ex cbel tyecꞌun tib tajwalil tibaja. 3 Che ul ke nasyon tuj t-spicꞌumala ex che ul ke rey tuj t-spicꞌumala, mer ic tzaꞌn oc in jawil kꞌij. 4 Kꞌin jaw twitza ex queꞌyinxa tiꞌjeleya, cycyakil xjal in baj cychmon cyib ex che ul tucꞌila. Ke tcꞌwaꞌla xinak ateꞌ najchak che ul ex ke tcꞌwaꞌla xuꞌj che ul paloꞌn. 5 Octzun tqueꞌyinteya jlu, cjawil tzalaja ex cnojel tuj tanmiya tuꞌn tzalajbil; ke tnam ateꞌ ttzi mar tzul cyiꞌn ke tiꞌxti tbanil ex wiꞌyilxix te teya, ax icx ctzajel cykꞌoꞌn ke nasyon cykꞌinumabl teya. 6 Nim txkan chej camey che ul tucꞌila, max che tzajel tuj tnam Madián ex tuj tnam Efa; che ul cycyakil aj Sabá ikan kꞌan pwak ex storac cyuꞌn, ex oc cykꞌaꞌ tkanil tiꞌj tajwalil Kman. 7 Cycyakil ke ẍneꞌl ateꞌ tuj txꞌotxꞌ Cedar che oquel te teya, ke cyẍneꞌl aj Nebaiot che ajbel teya tuꞌn cycub tbyoꞌna tibaj altar te Kman ic tzaꞌn jun oyaj in tzalaj tiꞌj, ex aju tja tbanilxix queꞌyin cꞌoquel mas tbanilxix tuꞌn.8 ¿Alcye ke jlu in che lipan wen ic tzaꞌn muj ex ic tzaꞌn palom cyjaꞌ cypon tuj cyja? 9 Barc ke, cyjaꞌ cytzaj junx cyucꞌil ke barc te tnam Tarsis, nejni cywitz ke mastl, kꞌiꞌn ke tcꞌwaꞌla cyuꞌn, tzajni ke najchak tucꞌix kꞌan pwak ex sak pwak at cye, te jun nimbil tbi Kman aju Dios Xjan cye aj Israel, aju oc kꞌonte toclena maꞌxix. 10 Stranjer xjal ke che jawil binchante juntl maj ke muro tocsaꞌn tiꞌja ex ke cyrey che ajbel teya; masque cub tcastiwoya tuꞌn Kman tej ttzaj tkꞌoj tiꞌja, jaꞌlo nok tuꞌnju t-xtalbil ma tzaj tzꞌeꞌy tcꞌuꞌj tiꞌja. 11 Ke tpwertila cucx che cyjel cateꞌ; miꞌn che lamet kꞌijl ex mi konicꞌan, tuꞌntzun tul kꞌiꞌn cykꞌinumabl ke nasyon te teya ex tuꞌn cyocx ke rey cyucꞌix ke mastl cyucꞌil ucꞌin. 12 Ka at jun tnam mintiꞌ ma tzꞌajben teya, biꞌx cnajel ex che bajel xitj ke nasyon.
13 Chi Kman te tnam Jerusalén: Aju kꞌinumabl at twi witz Líbano tzul tucꞌila: Ke tzeꞌ tzaj, ke cꞌol ex ke wiꞌten che ajbel tuꞌn toc njaye tbanilxix queꞌyin, tuꞌntzun tjaw nimsaꞌn ju lugar jatum ax atine. 14 Ke cycꞌwaꞌl keju e yajlante teya che ul twitza ex cbel cymansin cyib twitza, ex cycyakil keju e el icꞌunte teya che bel ẍmejeꞌ t-xe tkana ex cꞌoquel cykꞌoꞌn tbiya: “Aju tnam etzan tuꞌn Kman”, “Aju tnam Sión etzan tuꞌnju Dios Xjan cye aj Israel”. 15 Otok cyaj colina nej ex otok tzꞌel icꞌuna ex mintiꞌ xjal najl tuja, atzun jaꞌlo cꞌoquel nkꞌoꞌne te maꞌ toclena ex tuꞌn tajbena te tzalajbil te jumajx. 16 Tzul cykꞌoꞌn ke nasyon tbanil wabj teya ex ctzajel cyiꞌn ke rey cykꞌinumabl teya, ex atzun cꞌelel tnicꞌa tiꞌj akine Dios ex Clol teya, akine Tdios Jacob at nim wipumale ex akine colpil teya.
17 Te t-xel kꞌan cꞌuxbil, cxel nkꞌoꞌne kꞌan pwak teya, ex te t-xel cꞌuxbil, cxel nkꞌoꞌne sak pwak; te t-xel tzeꞌ, cxel nkꞌoꞌne kꞌan cꞌuxbil, ex te cyxel ke abj, cxel nkꞌoꞌne tbanil cꞌuxbil. Che tele tuj txubtxaj wuꞌne ex cbantel aju tzꞌaklxix cyuꞌne, ex atzun ke jlu che oquel ic tzaꞌn jun cawil cyeye. 18 Tuj ttxꞌotxꞌa mlay binjtz juntl maj tkꞌajkꞌajel kꞌoj cyxol xjal, mlay che naj ke cytanmiya ex mlay che cub xitj, nok oꞌcx cꞌoquel tkꞌoꞌna tbi ju muro tocsaꞌn tiꞌja: “Colbil” ex cꞌoquel tkꞌoꞌna cybi ke tpwertila: “Akꞌbil chjonte”.
19 Mya il tiꞌj te teya tuꞌn tjawil t-spicꞌumal kꞌij, mi t-spicꞌumal xjaw te konicꞌan, porque ax kine chin oquel te spicꞌun tuja te jumajx, akine Tdiosa chin oquele te t-spicꞌumala. 20 Aju kꞌij mlay tzꞌex ex mlayx tzꞌoc yupj xjaw, porque akine chin oquele te t-spicꞌumala te jumajx, ex keju kꞌij te tbisa cbajel cywiꞌ.
21 Cycyakil xjal ateꞌ tuja che oquel te tzꞌaklxix ex che oquel te tajwil cytanmi te jumajx, porque ic cyten ic tzaꞌn t-xul jun wiꞌ awal cuꞌx wawaꞌne, takꞌunben nkꞌabe tuꞌntzun t-xi nyecꞌune wajwalile. 22 Aju tal byuj xjal lu cchmetel cybaj tuj milen, ex akeju nok nicꞌxi cybaj jaꞌlo che oquel te jun nintz nasyon. Akine Dios, cbantel naj jlu wuꞌne tujxix tkꞌijlalil.