Cub cycastiw aj Israel tuꞌn tlaj il o cybincha
59
Aju tipumal Kman mintiꞌ ma tzꞌajtz tiꞌj, atx tipumal tuꞌn cyclete tuꞌn; mintiꞌ ma tzꞌoc te miban bin, baꞌn te Kman bin. 2 Pero tuꞌnju mya baꞌn o cybinchaye o tzꞌel tpaꞌn tib Dios cyiꞌje; tuꞌnju il o cybinchaye ma tzꞌoc tmaksiꞌn Dios twitz; tuꞌntzun jlu mintiꞌ in che tzaj biꞌne tuꞌn. 3 Tzꞌil tiꞌj cykꞌabe tuꞌn cychcꞌel xjal cub cybyoꞌne, tzꞌil cyiꞌj ke tal cykꞌabe tuꞌn nimcu mya baꞌn in bant cyuꞌne; in cymaꞌne nicꞌaj yol tuꞌn cytziꞌye, ax icx in cymaꞌne nimcu mya baꞌn. 4 Oc cyxiꞌye tuj jusgad kꞌmalte til juntl, mintiꞌ in che yoline axix toc, mi aꞌl jun in xtisin tuj tumelxix. Mas nnoꞌc keꞌ cycꞌuꞌje tiꞌj ju nicꞌaj yol ex cyiꞌj ke yol mya ax toc. In cub cyximane mya baꞌn tuj cyanmiye ex axtzunju mya baꞌn in cub cybinchaꞌne. 5 Aju cyximbetze mya baꞌn ic tten ic tzaꞌn tjos kꞌantiꞌ; ka ma txi tchyoꞌn xjal ke jos lu cymel, ex ka at jun ma cub betzꞌante cye, che eletz ke tal lobaj cyuj, akeju in che cyim xjal cyuꞌn. Mer ic tzaꞌn in che chmone tiꞌj tchemaj xin; 6 pero cyiꞌj ke tchemaj xin lu mlay che bant xbalun cyiꞌj; mi aꞌl jun jacu tzꞌoc xbaluminte aju in che chmone tiꞌj. Cycyakil cybinchbene puro mya baꞌn ex oꞌcx in bant cyuꞌne tuꞌn tcub cybyoꞌne jun xjal; 7 in che ajben cykane tuꞌn cyxi ojkelane tuꞌn cybinchanteye mya baꞌn ex nnoꞌc tilil cyuꞌne tuꞌn tcub cybyoꞌne jun xjal mintiꞌ til. Oꞌcx toc cyximbetze tuꞌn cybinchanteye mya baꞌn ex jatum in che icꞌ bete in cub xitj tcyakil cyuꞌne ex in che naj xjal cyuꞌne. 8 Mintiꞌ chꞌin cymojbabl cyibe cyucꞌil mastl, tcyakil aju in bant cyuꞌne mya tuj tumel. Aju be kꞌiꞌn cyuꞌne ẍoꞌc tiꞌj; ke xjal in che bet tuj be lu mintiꞌ chꞌin in che ten tuj txubtxaj.9 Cyjaꞌtzun, aju colbil ke ma tzꞌel lakꞌeꞌ kiꞌj ex aju tzokpibl mintiꞌ nnuꞌl lakꞌeꞌ kiꞌj; in ko ayontok tiꞌj spicꞌun, pero oꞌcx klolj at, in ko ayontok tiꞌj spicꞌun ex tuj kxopin in ko bet. 10 In ko bet nok xmacan nnoꞌc kuꞌn ic tzaꞌn ke moẍ nok xmacan in che bet twitz ja, mer ic tzaꞌn mintiꞌ tbakꞌ kwitz; in ko jaw tolj te chilcukꞌij, mer ic tzaꞌn konicꞌan in ko bet, baꞌn taꞌ kximlal, pero mer ic tzaꞌn cyimni koꞌ. 11 Kcyakil in ko wuꞌyin ic tzaꞌn ke txcup oso, in ko kꞌututun, ic tzaꞌn ke palom; in ko ayon tiꞌj colbil ke, pero mintiꞌ nnuꞌl; in ko ayon tiꞌj tzokpibl ke, pero najchak taꞌ. 12 Kman Dios, nimxix mya baꞌn ma kbinchaye twitza ex ax kile in kꞌmante aj il koꞌye; baꞌn kuꞌne alcye ke kile ex ojtzkiꞌn kuꞌne akeju mya baꞌn o kbinchaye. 13 Kman, ma ko oque miban ko nimane ex ma tzꞌel kpaꞌn kibe tiꞌja, mintiꞌ o kajbeye tuꞌn koc lpeꞌye tiꞌja aya Kdiose, o ko yoline tiꞌj tuꞌn tcub kyajlaꞌne ke xjal ex ma tzꞌel kpaꞌn kibe tiꞌja, baj knacꞌuꞌne tiꞌj tuꞌn ksbune cyiꞌj mastl. 14 Ya mintiꞌ in xi binchaꞌn cyiꞌj xjal tuj jusgad, misicyer in cybinchaꞌn aju tzꞌaklxix, ya mintiꞌtl in che yolin xjal tiꞌj ju yol axix toc; oc cyxiꞌ xtisil mintiꞌ in cykꞌoꞌn ambil tuꞌn tbant tiꞌj jun tiꞌxti tuj tumelxix. 15 Ma cub naj aju yol axix toc, ex alcye nneꞌl tpaꞌn tib tiꞌj mya baꞌn, nneꞌl elkꞌaꞌn aju at te. Ma til Kman jlu ex mya baꞌn ma tzꞌela tuj twitz, tuꞌnju mintiꞌ in xi binchaꞌn cyiꞌj xjal tuj tumelxix. 16 Jaw labin Kman tej tqueꞌyinte mi aꞌl jun tuꞌn tonin cyiꞌj keju in che yajlanjtz, cyjaꞌtzun e clet tuꞌnx tipumal ex tuꞌnju tzꞌaklxixte, ex axte o camban. 17 Tzaj tyecꞌun ka tzꞌaklxix te, ic tten jlu ic tzaꞌn jun chicyet cꞌuxbil nnoꞌc tkꞌoꞌn soldad, tzaj tkꞌoꞌn ju colbil, ic tten jlu ic tzaꞌn jun pasbil cꞌuxbil, ex o xelin tuꞌn aju mya baꞌn o cybincha xjal, mer ic tzaꞌn jun soldad nnoꞌc tkꞌoꞌn t-xbalun te kꞌojbil, ex tzaj nim tkꞌoj. 18 Cxel tkꞌoꞌn Kman chojbil te teyle junjun ic tzaꞌnx tbinchben, cbel tkꞌoꞌn cycastiw ke aj kꞌoj tiꞌj. Cxel tkꞌoꞌn chojbil cye keju in che icꞌun tiꞌj ic tzaꞌnx cybinchben, cyucꞌix ke tnam ateꞌ ttziꞌyile mar. 19 Cycyakil xjal cxel cyniman Kman, ctzajelx keꞌ tuj tjawitz kꞌij ex tuꞌn tpon baj tuj telex kꞌij, cxel cyniman Kman oc toc cyqueꞌyin tajwalil, porque ate Kman tzul tucꞌil tipumal ic tzaꞌn jun nima otok chꞌiy, yucun tuꞌn jun cykꞌikꞌ nimxix tipun. 20 Tzul tuꞌn ttzokpet tnam Sión cyucꞌix ke tiyjil Jacob, akeju cꞌajetz tiꞌj cyanmi tiꞌj cybinchben mya baꞌn. Ate Kman in kꞌmante jlu.
21 In tmaꞌn Kman cyjaꞌ: Cbantel tiꞌj jun yol wuꞌne cyucꞌile, aju Nxewe ex ke xnakꞌtzbil o txi nkꞌoꞌne cyeye, mlay che el wiꞌne cyeye ex mi cye ke cyiyjile te jumajx.