Chi Kman tzaj tmaꞌn weye: Tjaw schꞌina cyuw wen, miꞌn tzaj t-xobila, tjaw tkꞌajkꞌajel twiꞌya ic tzaꞌn jun chun; mayoꞌn oca ke xjal etzan wuꞌne, akeju tiyjil Jacob, tuꞌn tlaj cybinchben mya baꞌn ex tuꞌn tlaj cyil. 2 Tcyakil kꞌij in che jyon wiꞌje, mer in che tzalaj tuꞌnju ma tzꞌel cynicꞌ tiꞌj nbeye, mer in cybinchaꞌn aju tzꞌaklxix, ex mer mintiꞌ in che icꞌ tibaj nleye, in cykanin ley tzꞌaklxix weye ex in che tzalaj tuꞌnju ma che ul lakꞌeꞌ wucꞌile, 3 pero in cymaꞌn cyjaꞌ: ¿Ti tajben tuꞌn tcub kyoꞌn weꞌyaj ka mintiꞌ in queꞌyin Dios kiꞌj? ¿Ti tajben tuꞌn tcub kyajlan kib ka mintiꞌ toc tcwent Dios kiꞌj? Che chi. Aju kꞌij tuꞌn tcub cyyoꞌne weꞌyaj in ajben cyuꞌne tuꞌn tcub cykꞌoꞌne cycꞌaꞌẍe ex in che oc tene yajlal cye ke cymajene; 4 tuj ju kꞌij tuꞌn tcub cyyoꞌne weꞌyaj, oꞌcx in che iline cyxolxe ex in che oc tene kꞌojlel ex in baj cybyoꞌne juntl cyucꞌile tuꞌn cykꞌabe. Mya baꞌn aju in cybinchaꞌne. Nokx gan tuꞌn tcub cyyoꞌne weꞌyaj icju, porque mlayx tzaj nbiꞌne cynaꞌj Diose. 5 ¿Che chipetzune ka in chin tzalaje cyiꞌje tuꞌnju in baj cyyajlan cyibe tuꞌn tcub cyyoꞌne weꞌyaj oc tcub mocꞌeꞌ cywiꞌye ic tzaꞌn ajlaj mocꞌl twiꞌ, ex oc cycub coẍeꞌye tuj tzaꞌj tucꞌil cyxbalune chꞌiꞌx twitz te jun techal cybise? ¿Apetzun jlu nnoꞌc cykꞌoꞌne ka otok cub cyyoꞌne weꞌyaj, aju in chin tzalaje tiꞌj? 6 Baka a jlu in chin tzalaje tiꞌj. Aju tuꞌn tcub cyyoꞌne weꞌyaj axix toc ex in chin tzalaje tiꞌj, atzun jlu: Tuꞌn tcub lakj ju caden ma tzꞌoc cykꞌoꞌne te cꞌalbil cye xjal mya tuj tumelxix, tuꞌn tel cycoꞌpine aju pyal kitzꞌin yuw tuꞌn tiꞌj cykul xjal, tuꞌn cytzokpet keju in che yajlanjtz cyuꞌne, tuꞌn t-xi cycoline tuꞌn cyoque jawni cyiꞌj xjal, 7 tuꞌn t-xi cykꞌoꞌne chꞌin tiꞌj cywaye te twa juntl xjal at weꞌyaj tiꞌj, tuꞌn t-xi cykꞌoꞌne cyposad ke meba xjal mintiꞌ cyja, tuꞌn t-xi cykꞌoꞌne t-xbalun xjal mintiꞌ t-xbalun, ex tuꞌn miꞌn tzicꞌ tnaꞌl cyuꞌne tuꞌn cyonine cyiꞌj cyxjalile. 8 Ka ma bant jlu cyuꞌne, cspicꞌebil tuj cywitze ic tzaꞌn in jawil kꞌij, ex ju cꞌixbisabl cyiꞌje cbantel naj. Aju tzꞌaklxix cbel nej cywitze te ẍaklul cyeye, ex aju nspicꞌumale cꞌoquel lpeꞌ cyiꞌje tuꞌn cyclete. 9 Katzun ma chin tzaj cytxcoꞌne, ctzajel ntzakꞌweꞌne, ex ka ma che jaw schꞌine tuꞌn cykanine onbil, oc nmaꞌye cyeye: Lu kine lu. Ka ma txi cycoline tuꞌn cyyajlane cyiꞌj xjal, ka mintiꞌ ma tzꞌoc cychꞌicune cyiꞌj cyucꞌile ex ka mintiꞌ ma jaw cynicꞌantle yol cyiꞌj, 10 ka ma cyakꞌ cyibe tuꞌn cyajbene teju xjal at weꞌyaj tiꞌj ex ka ma che onine tiꞌj ju xjal taꞌ tuj bis tuꞌnju meba, tzultzun koptzꞌaj spicꞌun cyeye tuj klolj, ex aju klolj toc cyiꞌje cꞌoquel ic tzaꞌn spicꞌun te chilcukꞌij. 11 Tcyakil maj akine chin ẍaklul cyeye ex nim cywaye cxel nkꞌoꞌne tuj tzkij txꞌotxꞌ, cxel nkꞌoꞌne tipun cyximlale ex ic che oquele ic tzaꞌn txkan awal aꞌlin wen, ex ic tzaꞌn jun twi aꞌ mintiꞌ nnaꞌj tzkij. 12 Cjawil cybinchaꞌn cytanmiye juntl maj, aju otok cub xitj, ex cjawil cybinchaꞌne juntl maj tibaj ju simyent tcubsaꞌn ojtxi. Cꞌoquel kꞌoꞌn cybi ke cytanmiye: “Ke binchal muro otok che cub tzꞌak” ex “Ke binchal juntl maj ke ja otok che cub xitj”.