3 Che lakꞌetze akeye tal jun xuꞌj baꞌn cyꞌaꞌn, akeye o che el itzꞌj tiꞌj jun xuꞌj aj pajil ex tiꞌj jun xuꞌj jawni twitz cyucꞌil xinak: 4 ¿Al iꞌj in che xmayine? ¿Al iꞌj in jaw cyyuchꞌine twi cytxaꞌne? ¿Al iꞌj in xi cyyecꞌune cyakꞌe? Akeye cycꞌwaꞌl xjal miban che bin ex nicꞌal yol ke, 5 in xi cykꞌon cyibe tuꞌn cycꞌulune cywitz ke tilbilal, ex tuꞌn cyyaẍine cyjakꞌ cꞌol ex cyjakꞌ cycyakil tzeꞌ nim cyxak, ex in xi cykꞌoꞌne cycꞌwaꞌle te chojbil cytxlaj ke tkꞌab xak ex cyuj ke cypaꞌxil pic.

6 Akeye aj Israel, mas baꞌn tuj cywitze tuꞌn t-xi cykꞌoꞌne cꞌulbil cywitz ke abj tzꞌumin cywitz ateꞌ tuj tkꞌab xak, porque atzun taꞌ jun lugar paꞌmaj cyuꞌne te cyeye. Cyibajtzun keju abj lu ma cub cykoꞌne taꞌl twitz uva te oyaj cye ex ma txi cykꞌoꞌne twitz awal te oyaj cye. ¿Ocpetzun chin tzalajele tiꞌj tcyakil jlu? 7 Twiꞌ jun witz maꞌxix twaꞌl, atzun cub cykꞌoꞌne cywatbile tuꞌn cyyaẍine, ex axtzun in che jaxe kꞌolte ju chojbil. 8 Tiꞌjxi tpwertil cyjaye cub cykꞌoꞌne ke tilbilal icꞌbilxix. Ma tzicꞌ nnaꞌnjtze cyuꞌne, ma tzꞌel cyskitin cyiꞌje ex ma che cub tane twi cywatbile maꞌ twitz; ma bant cytrate cyucꞌil ke xinak akeju cyajbile tuꞌn cycub tane cyucꞌil, ex in che queꞌyine cyiꞌj ke tilbilal.

9 E jeꞌx kelane tuꞌn cypone jatum taꞌ ju dios Mélec, kꞌiꞌn aseyt cyuꞌne ex nimxix tajlal perjum; xi cysamaꞌne ke sanjel najchak wen, xi cysamaꞌne tuꞌn cycuꞌpun tuj cynajbil cyimni. 10 E sicte tuꞌnju nimxix e bete, pero mintiꞌ el cynicꞌe tiꞌj ka tcyakil jlu mintiꞌ tajben. Oc juntl maj cyipune ex tuꞌntzun jlu mintiꞌ e sicte. 11 ¿Alcyetzun ke dios in che xobtoke cywitz ex in xi cykꞌoꞌne nimbil cye, tuꞌnju mintiꞌ ma japun nyole cyuꞌne ex ma tzicꞌ nnaꞌnjtze cyuꞌne te jumajx? ¿Myapetzun ax toc mintiꞌ in che xobe nwitze, tuꞌnju mintiꞌ in chin kꞌajte atxix ojtxi? 12 Pero cxel nmaꞌne cyeye alcye cymodiye, tuj cynable tzꞌaklxix ateꞌye, pero tcyakil jlu mlay tzꞌajben te cyeye. 13 Oc cyjaw schꞌine tuꞌn cytzaj onine, mlay che tzaj onine cyuꞌn ke tilbilal in che cꞌulune cywitz, ex mlay che clete cyuꞌn. Cycyakil ke che xel ikan tuꞌn cykꞌikꞌ; nok che bel naj oc cyel xupin tuꞌn cykꞌikꞌ. Atzun ke xjal kꞌukl cycꞌuꞌj wiꞌje, che etzal tiꞌj ju txꞌotxꞌ ex che najal twiꞌ ju witz xjan etzan wuꞌne.

14 Cbinjtzel jun yol cyjaꞌ: Cybinchame jun be chkꞌajlaj tuj, cyiꞌmele ke tiꞌxti tolsabl cycub tuj be, tuꞌntzun cyex ke xjal etzan wuꞌne, chi Dios. 15 Porque ate Dios aju at tuj cyaꞌj, aju itzꞌ te jumajx ex aju toc tbi Xjan, in tmaꞌn cyjaꞌ: Atzun najl kine tuj jun lugar najchak tjaw ex xjan, pero ax icx atine tucꞌil ju xjal mans ex ma tzꞌajtz tiꞌj tanmi, ax icx in xi ncyuwsaꞌne tcꞌuꞌj ex in xi nkꞌukbaꞌne tcꞌuꞌj. 16 Mya cucx cxel nmaꞌne cyil ke xjal etzan wuꞌne ex mya cucx tuꞌn ttzaj tloꞌch ncꞌuꞌje cyiꞌj; porque ka cucx ma bant wuꞌne icju, jacu tzaj baj cycꞌuꞌj nwitze ke xjal nchꞌisbene. 17 Tuꞌn tlaj cyil ke aj Israel tzaj nkꞌoje cyiꞌj, cub cycastiw wuꞌne ex el npaꞌn wibe cyiꞌj; atzun cye cucx el cypaꞌn cyib wiꞌje ex cucx e oc lpeꞌ tiꞌj cyex cyajbil. 18 Ma wile cybinchben mya baꞌn, pero che banixel wuꞌne ex che xel nẍakluꞌne. Cxel nkꞌukbaꞌne cycꞌuꞌj keju in che bisun, 19 ex cxel nkꞌoꞌne bitz tuj cytziꞌ. E cyten tuj txubtxaj keju ateꞌ najchak, ex e cyten tuj txubtxaj keju ateꞌ nikayin ex che banixel wuꞌne. 20 Pero ke xjal mya baꞌn, ic cyten ic tzaꞌn jun mar in pulin wen, mintiꞌ tuꞌn tweꞌ ex nneꞌtz t-xoꞌn xokꞌl ex ttzꞌilil. 21 Ke xjal mya baꞌn mlay che ten tuj txubtxaj, chi Dios.