3 Ka at jun stranjer xjal ma txi tkꞌon tib te Kman, miꞌn txi tmaꞌn cyjaꞌ: Part chin tele tuꞌn Kman tiꞌj ju tnam etzan tuꞌn, chiwt. Ax icx ju xinak mintiꞌ tumel tuꞌn tten t-xuꞌjil, miꞌn txi tmaꞌn cyjaꞌ: Mer ic tzaꞌn jun tzeꞌ tzkij kine, chiwt. 4 Porque in tmaꞌn Kman cyjaꞌ: Akeju xinak mintiꞌ tumel tuꞌn tten cyxuꞌjil, ka ma txi cyniman keju kꞌij te ojlabl kꞌmaꞌmaj wuꞌne, ex ka ma japun aju wajbile cyuꞌn, ex ka cucx ma che ten waꞌlxix tuj ju yol o cyaj bant tiꞌj wuꞌne, 5 cxel nkꞌoꞌne jun tiꞌxti cye mejorxix twitzju tuꞌn tten cycꞌwaꞌl, cucx ctzajel naꞌn cybi tuj njaye tujxi ju muro te njaye, ex cxel nkꞌoꞌne jun cybi tuꞌn tten te jumajx, ex mlayx jaw kꞌuchin. 6 Ex akeju stranjer xjal ctzajel cykꞌon cyib wucꞌile tuꞌn cyajben weye ex tuꞌn tten cycꞌujlalil wiꞌje, tuꞌntzun cyoc te nmajene, ka ma txi cyniman keju kꞌij te ojlabl, ka miꞌn ma tzꞌoc cykꞌoꞌn te mintiꞌ tajben ex ka cucx ma che ten waꞌlxix tuj ju yol o cyaj bant tiꞌj wuꞌne, 7 che tzajel wiꞌne twi witz xjan aju etzan wuꞌne, ex che tzalajel wuꞌne tuj njaye te nabl weye. Twi altar etzan wuꞌne ccꞌmetel wuꞌne aju cyoyaj patun in cub, ax icx ke chojbil ctzajel cykꞌoꞌn weye, porque aju njaye, ja te nabl Dios tbi cꞌoquel te cye cycyakil tnam. 8 Che ajetz meltzꞌaj wuꞌne ke xjal otok cheꞌx kꞌiꞌn pres najchak, chi Kman Dios aju nnaꞌjtz chmonte cye aj Israel, akeju otok che baj sputj.

9 Cytzaje akeye txcup ateꞌ tuj cojbil, cytzaje akeye jil te tjakꞌ cꞌul, cytzaje chyoꞌl ke ẍneꞌl; 10 porque ke cwentil cye ke xjal etzan wuꞌne mer ma cub moẍxix cywitz ex mintiꞌ chꞌin baꞌn cyuꞌn. Cycyakil ke jlu ic cyten ic tzaꞌn txꞌyan miban che kꞌajt ex miban che kawin, nok bunl ke ex in che witzcyꞌan, nimxix cygan tuꞌn cytan. 11 Mer ic tzaꞌn txꞌyan ke, nok nneꞌl cycꞌuꞌj ex mintiꞌ in che noj, pastor ke ex mintiꞌ nneꞌl chꞌin cynicꞌ tiꞌj; teylex te junjun in xi tiꞌn tex tbe, oꞌcx in che jyon tiꞌj aju cyex cyajbil. 12 In cymaꞌn cyjaꞌ: Koꞌ jyolte kcꞌa vin ex jyolte kꞌeꞌn aju mas at-xix taꞌw, tuꞌntzun tchyoꞌn kwiꞌ. Ex e tbant kuꞌn nchiꞌj, ic tzaꞌn cbantel kuꞌn jaꞌlo ex ka masxix chꞌintl.