Aju tcꞌujlalil Kman nok cucx in tkꞌoꞌn
55
Cycyakile akeye in che txkete, cytzaje tuꞌn cycꞌane aꞌ; akeye mintiꞌ cypwake, cytzaje, jacu cnet triw nok cucx te cyeye ex che waꞌne; jacu cnet cycꞌaye taꞌl twitz uva ex cycꞌaye lech nok cucx ex mintiꞌ tuꞌn tchjet cyuꞌne. 2 ¿Tikuꞌn nokx gan tuꞌn tbaj cynajsaꞌne cypwake ka mya wabj tuꞌn tlakꞌet cyuꞌne? ¿Tikuꞌn tuꞌn tbaj cynajsaꞌne twi cycꞌuꞌje tiꞌj ju mintiꞌ in che noje tuꞌn? Cykꞌontz cywiꞌye tiꞌj nyole ex che waꞌle tbanil wabj ex che nicꞌbele cyiꞌj ke tiꞌxti nim tcꞌocꞌjal. 3 Cytzaje wucꞌile ex cykꞌontz cywiꞌye tiꞌj nyole, chin cybintze ex che ankꞌile. Cyjel bant tiꞌj jun nyole cyucꞌile tuꞌn tcyaj ten te jumajx, tuꞌntzun tjapun aju nyole xi ntziyane te David, tuꞌnju at ncꞌujlalile tiꞌj. 4 Oc nkꞌoꞌne David ic tzaꞌn jun testiw cye xjal tuꞌn tel cynicꞌ wiꞌje, ex te jun nejenel ex kꞌol xnakꞌtzbil cye xjal. 5 Ctzajel ttxcoꞌna ke xjal mintiꞌ ojtzkiꞌn cywitz tuꞌna; ke xjal mi ojtzkiꞌna cyuꞌn che ul kelan tucꞌila, porque akine aju Dios Xjan cye aj Israel, ma jaw nnimsaꞌne, chi Kman.6 Che jyone tiꞌj Kman acux at ambil cyeye tuꞌn tcnet cyuꞌne, che cubsane twitz acux nikayin taꞌ. 7 Aju xjal binchal il, baꞌn tuꞌn tcyaj tcolin ju tbe mya baꞌn, aju xjal binchal tplojil, baꞌn tuꞌn tcyaj tkꞌoꞌn ju t-ximbetz mya baꞌn; e tajtz meltzꞌaj tucꞌil Kdios, porque ate Dios at nim xtalbil tucꞌil tuꞌn tcub tnajsaꞌn cyil xjal. 8 Porque chi Kman cyjaꞌ: Aju weye nximbetz, mya junx taꞌ ic tzaꞌn cyeye cyximbetz, ex oc in bant jun tiꞌxti wuꞌne, mya ic tten ic tzaꞌn cyeye in bant cyuꞌn. 9 Ic tzaꞌn te cyaꞌj maꞌ tjaw tibaj txꞌotxꞌ, icxtzun weye nximbetz ex aju tumlal in bant wuꞌne, mas maꞌ t-xilen twitz cyximbetze ex twitz aju in bant cyuꞌne.
10 Ic tzaꞌn jbal ex ttxa cheꞌw in cuꞌtz twitz cyaꞌj, mintiꞌ nnaꞌj meltzꞌaj juntl maj, nok oꞌcx in baj acꞌix twitz txꞌotxꞌ tuꞌn, tuꞌn tpokꞌl tawal ex tuꞌn toc twitz, tuꞌn tkꞌonte iyaj, ex tuꞌn tcuꞌx awet juntl maj, ex tuꞌn ttzaj tkꞌoꞌn twa ju in awan tiꞌj, 11 icxtzun we nyol in xi nmaꞌne, mlay tzꞌajtz meltzꞌaj juntl maj wucꞌile nok cucx, nok oꞌcx in tbinchaꞌn alcye wajbile ex in japun tuꞌn aju in xi nmaꞌne tuꞌn tbant.
12 Che eletze ma chixin tucꞌil tzalajbil, che ul meltzꞌaje tuj txubtxaj. Oc cyqueꞌyinjtze cyuꞌn ke nmak witz ex ke tal witz, che jawil bitzan tuꞌn tzalajbil ex cycyakil tzeꞌ tuj cojbil che jawil tzalaj. 13 Te t-xel chꞌiꞌx, che tzajel chꞌiy tzaj, ex te t-xel la, ctzajel chꞌiy kꞌatxab; atzun jlu c-yecꞌulte maꞌ t-xilen tbi Kman; cyjel ten te jun techal te jumajx ex mlay naj.