Aju tcꞌujlalil Dios mintiꞌ bajsbil te
54
Tjaw schꞌina tuꞌn tzalajbil aya xuꞌj miban alina ex mintiꞌ jun tala o tzaj; tjaw bitzana tuꞌn tzalajbil aya bajx tzaj jun tala, porque chi Kman cyjaꞌ: Aju xuꞌj o cyaj colin tuꞌn tchmil, mas nim tal che ul itzꞌj twitz ju xuꞌj at tchmil. 2 Nimsaꞌn el tuj tjaya xbalun ex miꞌn xoba tuꞌn t-xi tlicꞌpuꞌna ju xbalun tocxa tuj, nukpinxa mas ke takꞌal ex pajoꞌn cuꞌxa mas ke stac te tzuybil te, 3 porque max cpol baja tuj tcyakil lugar tiꞌjeleya; ke tiyjila cbel cyiꞌj nimcu nasyon cyuꞌn, ex che najal cyuj ke tnam mintiꞌ xjal cyuj jaꞌlo. 4 Miꞌn xoba, mlay cub tchꞌixwiya ex mlay tzꞌoc icꞌlena. Cꞌicꞌel tnaꞌl tuꞌna aju tchꞌixwiya tzaj tej matok kꞌapojxa ex mlay tzaj tnaꞌntla aju tchꞌixwiya cub tej ttena te meba xuꞌj, 5 porque aju binchante teya cjawil xuꞌjlaꞌna tuꞌn, ex atzun tbi jlu: Kman aju Tajaw Tcyakil; aju colpil teya atzun Dios Xjan cye aj Israel, ex atzun Dios tuj tcyakil twitz txꞌotxꞌ.6 Ic ttena ic tzaꞌn jun xuꞌj o cyaj colin tuꞌn tchmil cyꞌitzketok toclen mojeꞌ, ex at nim tbis, pero ma txconjtza juntl maj tuꞌn Dios ex in tmaꞌn teya cyjaꞌ: 7 Nok chꞌin tuj cyaj ncolina, pero tuꞌnju at nim nxtalbile, ctzajel wiꞌne juntl maj tuꞌn tmojeꞌya wucꞌile. 8 Nok tuꞌnju in jaw cyakpaje, o tzꞌel npaꞌn wibe te jun rat tiꞌja, pero tuꞌnju mintiꞌ bajsbil te ncꞌujlalile, ctzajel tzꞌeꞌy ncꞌuꞌje tiꞌja, chi Kman aju Colpil teya.
9 Ic tzaꞌn xi nmaꞌne jun nyole axix toc te Noé, tuꞌn miꞌn tnaj juntl maj twitz txꞌotxꞌ tuꞌn aꞌ, icxtzun cxel nmaꞌne jun nyole axix toc jaꞌlo, tuꞌn miꞌn ttzaj juntl maj nkꞌoje tiꞌja, ex tuꞌn miꞌn woc tzokpaje cyuw tuꞌn nyole tiꞌja. 10 Masque chꞌexpet cylugar ke nmak witz ex masque che cub xitj ke tal witz, aju ncꞌujlalile tiꞌja mlay chꞌexpet ex mlay chꞌexpet aju nyole cyaj bant tiꞌj cyucꞌile tuꞌn cytene tuj txubtxaj, chi Kman, aju at tcꞌuꞌj cyiꞌje.
Aju Acꞌaj Jerusalén
11 Becꞌbil twitza tnam Jerusalén, ma baj yajlaꞌna cyuꞌn xjal ic tzaꞌn in naj jun tnam tuꞌn jun nintz cykꞌikꞌ, ex mi aꞌl jun ma kꞌukbante tcꞌuꞌja. Atzun jaꞌlo tbanil abj azabache cybi che ajbel te muro wuꞌne tiꞌja, ex ju t-simyentila cbantel cyiꞌj ke tbanil abj zafiro cybi. 12 Ke tbanil abj rubí cybi che ajbel tuꞌn cyjaw binchet ke ja maꞌ cywaꞌl te cwentbil tnam, ke tpwertila che bantel cyiꞌj ke tbanil abj berilo cybi, ex aju muro cꞌoquel tiꞌja, tiꞌj tbanil abj cjawil binchet. 13 Cxel nkꞌoꞌne xnakꞌtzbil cye xjal che najal tuja ex cycyakil che tel tuj txubtxaj. 14 Cꞌoquel nimxix tipuna oc tbinchet aju tzꞌaklxix tuꞌna; mintiꞌtl yajbil tiꞌja, mlay xoba, ex mlay tzaj juntl maj xobajil tiꞌja. 15 Ka at jun ma tzꞌoc tzokpaj tiꞌja, mya wuꞌne samaꞌn jlu, pero cbel tiꞌj tuꞌna aju cꞌoquel tzokpaj tiꞌja.
16 Bintza, akine in binchante cye xjal txꞌinol cꞌuxbil nnoꞌcx cyxupin kꞌakꞌ tuꞌn tjaw cꞌant, ex in che bant tcyakil txcaj ubl cyuꞌn nok alcyex tajben; ax icx ma nbinchaye ju xjal in baj naj nimcu tuꞌn, tuꞌn tbaj t-xitun nimcu; 17 pero mi jun xjal jacu bant jun ubl tuꞌn tuꞌn tnaja tuꞌn. Biꞌx cmaksetel cytziꞌ tuꞌna, akeju in tzaj cymaꞌn ka at tila. Atzun jlu in xi nkꞌoꞌne cye keju in che ajben weye, ex aju colbil cye, wuꞌne in xi nkꞌoꞌne, chi Kman.