53
¿Mape txi cyocslaꞌn xjal kpacbable? ¿Mape pon cynabl xjal tiꞌj tipumal Kman? 2 O tajbe Kman tuꞌn tchꞌiy tmajen ic tzaꞌn awal ma in chꞌiy ex in xiꞌ tlocꞌ tuj tzkij txꞌotxꞌ. Mya tbanil queꞌyin ex aju queꞌyin twitz, mlay ko tzalaj tiꞌj; 3 el icꞌun cyuꞌn xjal ex mintiꞌ e tzalaj tiꞌj. Aju xjal lu nimcu cꞌixcꞌoj tzaj tiꞌj ex baꞌn tuꞌn tzaꞌn taꞌw cꞌixcꞌoj. Ic tzaꞌn jun xjal mintiꞌ kaj tuꞌn toc kqueꞌyin, icꞌun kuꞌn ex mintiꞌ kaj tiꞌj. 4 Masque icju, xi tikan tcyakilju cꞌixcꞌoj at kiꞌj, ex icꞌx taꞌw cꞌixcꞌoj tuꞌn nok tuꞌn klaj. Ximan kuꞌn ka tuꞌn Dios otok tzꞌoc cꞌixbisaꞌn ex otok cub kꞌoꞌn tcastiw ex otok tzꞌoc yajlaꞌn. 5 Pero o cꞌixbisanjtz tuꞌn klaj, tuꞌnju miban ko bin; nimxix cꞌixcꞌoj icꞌx tuꞌn tuꞌn tlaj kbinchben mya baꞌn; tuꞌnju icꞌx castiw tuꞌn, cyjaꞌtzun ma ko ten tuj txubtxaj, ex tuꞌnju tcꞌixblen ma ko banix.6 Kcyakil ma koꞌx tzpet; ic tzaꞌn ke ẍneꞌl in cheꞌx tzpet, teyle junjun in xiꞌ tuj tex tbe, pero ate Kman cub kꞌonte kbinchben mya baꞌn tibaj tmajen tuꞌn t-xi tikan. 7 O baj yajlaꞌn, pero cub tipaꞌn ex cub tmansin tib, mintiꞌ o kꞌajt; xi kꞌiꞌn ic tzaꞌn jun ẍneꞌl in xi kꞌiꞌn tuj biybil te ex ic tzaꞌn jun ẍneꞌl mintiꞌ in kꞌajt oc nneꞌl matzoꞌn ttzmal, icxtzun te, mintiꞌ o kꞌajt. 8 Nokx gan xi kꞌiꞌn pres, mintiꞌ til ex mi aꞌl jun colin tiꞌj; misicyer jun tzaj tbis tiꞌj. Biꞌx o naj nmajene cyxol xjal tzalu twitz txꞌotxꞌ ex cub t-sentens tuꞌn tcyim tuꞌn tlaj cyil ke xjal etzan wuꞌne. 9 Cub cyximan xjal tuꞌn tcuꞌx makuꞌn cyxol ke xjal binchal mya baꞌn, pero ocx makuꞌn junx cyucꞌil ke kꞌinun, masque mintiꞌ jun mya baꞌn otok tbincha ex mintiꞌ o tma jun yol te sbubl.
10 O tajbe Kman tuꞌn tcꞌixbiset ex tuꞌn tyajlanjtz. Ex tuꞌnju xi tkꞌon tib tuꞌn tchjet il te jumajx, ctel nim tankꞌibl ex cpol queꞌyil ke tiyjil che ul itzꞌj te tibajxi; nok tuꞌn, cꞌelel baꞌn aju tajbil Kman tuꞌn tbant. 11 Ticꞌlenxitzun nim yajbil tiꞌj, oc tilaꞌ ju spicꞌun ex nimxix ctzalajel tiꞌj oc tqueꞌyinte; tuꞌnju tzꞌaklxix ju tmajen Kman, che colpetel nimcu xjal tuꞌn, porque cxel tikan ju cybinchben mya baꞌn. 12 Cyjaꞌtzun cxel tkꞌoꞌn Dios jun toclen cyxol keju maꞌ cyoclen, ex tucꞌix ctel cyxol keju at cyipumal oc tbant cysipan aju otok cycamba tuj kꞌoj, tuꞌnju xi tkꞌon tib tuꞌn tcyim, ex cyxol ke mya baꞌn oc te tajlal, ex xi tikan cyil nimcu, ex o cubsan twitz Dios cyiꞌj xjal tuꞌn tnajset cyil.