Aju tkanil tuꞌn cycolpet aj Jerusalén
52
Che weꞌctze akeye aj Sión, che wecꞌtze, cykꞌoꞌnc cyipune akeye aj Jerusalén aju tnam xjan, cykꞌoꞌnc cyxbalune tbanilxix, porque ke xjal mya ocslal tiꞌj Dios ex mya sak tuj cyanmi mlay che octz juntl maj tuj cytanmiye. 2 Che weꞌctze akeye aj Jerusalén, cychtoꞌn ele kuk cyiꞌje, che kecuye tuj kꞌukbil te cawbil; akeye aj Sión e jeꞌx kꞌiꞌne pres, cyiꞌn ele aju caden cꞌaloꞌn tiꞌj cykule.3 Chi Kman cyjaꞌ: Mi jun sentav o ncꞌame cyiꞌje tej cyxi cꞌayine tuꞌn cyoque te majen; ax icx weye mi jun sentav cxel nkꞌoꞌne cyiꞌje tuꞌn cycolpete wuꞌne. 4 T-xe tnejel ke xjal etzan wuꞌne e jeꞌx tuj tnam Ejipt ex e ten ic tzaꞌn stranjer xjal ma chixin; te tibajxi nokx gan ma che yajlet cyuꞌn aj Asiria. 5 Atzun jaꞌlo, ¿ti nbaj weye tzalu? Ke xjal etzan wuꞌne ma cheꞌx kꞌiꞌn tuj Babilonia ex mintiꞌ cyil. Ke xjal ma cub cyiꞌj aj Israel cyuꞌn in che schꞌin tuꞌnju in jaw cyniman cyib, ex tcyakil kꞌij in che yolin mya baꞌn wiꞌje. 6 Pero tzul tkꞌijlalil tuꞌn tel cynicꞌ xjal wiꞌje, akeju etzan wuꞌne, akine Dios o chinx yoline cye.
7 Tbanilxix tqueꞌyinx ju xjal in bet cywiꞌ ke tal witz in pacban tkanil tuꞌn cyten xjal tuj txubtxaj, in pacban tkanil baꞌn ex in tkꞌoꞌn tkanil tzokpibl, ex in tmaꞌn cye aj Sión cyjaꞌ: Aju Cydiose cucx tcawin.
8 Cybinxe, in jaw tkꞌajkꞌajel cywiꞌ ke cwentil cytanmiye ex junx in che schꞌin tuꞌn tzalajbil, porque ax ke in che queꞌyinte tzaꞌn tten cyjaꞌ ttzaj juntl maj Kman tuꞌn tul tuj tnam Sión. 9 Che schꞌine wen tuꞌn tzalajbil akeye aj Jerusalén masque o cub xitj cytanmiye, porque ma tzaj tkꞌukbaꞌn Kman cycꞌuꞌj ke xjal etzan tuꞌn ex ma colpet tnam Jerusalén tuꞌn. 10 Ma tzaj tyecꞌun Kman tipumal cywitz cycyakil nasyon. Tuj tcyakil twitz txꞌotxꞌ oc cybiꞌ xjal ma ko clet tuꞌn Kdios. 11 Cyetze, cyetz naje tuj Babilonia, miꞌn tzꞌoc cymacoꞌne ju ttzꞌilil, cyetze tuj Babilonia. Baꞌn tuꞌn tcub cycwentin cyibe tiꞌj mya baꞌn, akeye kꞌilte cycyakil ke macbil in che ajben tuj tja Kman. 12 Pero mya jurat naj che eletze, ex mya nok che eletz oke, porque ate Kman aju Cydiose cꞌoquel cwentin cyeye, akeye aj Israel; a cbel nej cywitze ex ax ctzajel lpeꞌ cyiꞌje.
Aju yajbil tiꞌj tmajen Kman
13 Baꞌn cꞌelel tcyakil te nmajene, cjawil nimsaꞌn ex cꞌoquel kꞌoꞌn toclen maꞌxix. 14 Nimcu xjal biꞌx naj cynabl tej cyqueꞌyinte tej tchꞌexpet tilbilal ex mya ic queꞌyintl ic tzaꞌn jun xjal. 15 Atzun jaꞌlo che labil nimcu nasyon tiꞌj; ke rey, oc cyqueꞌyinte, mlay che yolin tuꞌn cyxobil, porque cꞌoquel cyqueꞌyin aju bajxtok tzaj kꞌmaꞌn cye ex cꞌelel cynicꞌ tiꞌj aju bajxtok cybi.