4 Akeye xjal etzan wuꞌne chin cybintze, aya nasyon scꞌoꞌmaj wuꞌne chin tbintza: Akine chin kꞌmalte xnakꞌtzbil, ex ke nmandamyente che ajbel te spicꞌun cye tnam. 5 Chꞌix tul canun tkꞌijlalil tzokpibl wuꞌne; aju colpibl wuꞌne cyjaꞌ ttzaj lakꞌeꞌ; tucꞌil wipumale chin cawile cyibaj ke tnam. Ke tnam ateꞌ ttziꞌyile mar in che ayon wiꞌje ex nnoꞌc keꞌ cycꞌuꞌj tiꞌj wipumale. 6 Cyqueꞌyin jawe twitz cyaꞌj ex cyqueꞌyin cube twitz txꞌotxꞌ; cbel naj cyaꞌj ic tzaꞌn sib, cbajel tipun txꞌotxꞌ ic tzaꞌn jun xbalun in baj, ke xjal najl twitz che cymel ic tzaꞌn ke tal us. Atzunju colbil wuꞌne cucx cyjel ten te jumajx, ex aju tzokpibl wuꞌne mintiꞌ bajsbil te.

7 Chin cybintze, akeye nneꞌl cynicꞌe tiꞌj alcyeju tzꞌaklxix ex awaꞌn nxnakꞌtzbile tuj cyanmiye. Miꞌn che xobe ka in che oc icꞌleꞌne cyuꞌn xjal, miꞌn che el secꞌpaje ka ma che oc yasoꞌne cyuꞌn, 8 porque che najel ic tzaꞌn in naj xbalun tuꞌn pocꞌ ex ic tzaꞌn in baj tamtzꞌuꞌn lan tuꞌn skꞌiꞌn. Pero aju tzokpibl wuꞌne cucx ctel te jumajx, ex aju colbil wuꞌne mintiꞌ bajsbil te, chi Kman. 9 Tzulx tnabla Kman, tenx tipun tkꞌaba, tzulx tnabla ic tzaꞌn o tbinchaya tuj tkꞌijlalil ojtxi. Tuꞌna baj tpaẍuꞌna aju nintz txcup Rahab ex tuꞌna baj t-xayuꞌna aju nintz txcup dragón, 10 tzkij ju mar tuꞌna, aju maꞌ t-xeꞌ, ex bant jun be tuꞌna max t-xeꞌpun mar tuꞌn cyicꞌtz ke xjal tuj, akeju otok che colpet. 11 Cyjaꞌxtzun tten che ul meltzꞌaj keju ma che colpet tuꞌn Kman, ex che oquex tuj tnam Sión in che bitzan tuꞌn tzalajbil; ex cucx ctzalajel cywitz; cnetel tzalajbil cyuꞌn ex che tel tuj txubtxaj; mlay che tentl tuj bis ex mlay che ayayantl.

12 Chi Kman cyjaꞌ: Ax kine chin xel kꞌukbante cycꞌuꞌje. ¿Tikuꞌn in che xobe cywitz ke xjal in che cyim, akeju ic cyten ic tzaꞌn chꞌim jurat in tzkij? 13 ¿Mape tzꞌic tnaꞌl Kman cyuꞌne, aju pokꞌsalte cyeye, aju xi licꞌunte cyaꞌj ex cub tkꞌoꞌn t-simyentil txꞌotxꞌ? ¿Cocꞌxpe che luꞌlule tcyakil kꞌij tuꞌn tlaj cytxꞌuꞌjil keju baꞌn che yajlan ex ma bant cyten tuꞌn cynaje cyuꞌn? Pero ¿jatumtzun taꞌ aju cytxꞌuꞌjil jaꞌlo? 14 Ke xjal in che yajlanjtz tuj pres, jurat che tzokpetel, mlay che cyim tuj calabós ex cucx cxel kꞌoꞌn cywa.

15 Akine Cymane aju Cydiose aju Tajaw Tcyakil, atzun nbiye jlu; wuꞌne in yucch twitz mar ex in julin oc in xtulkꞌin aꞌ, 16 wuꞌne xi nlicꞌpuꞌne cyaꞌj ex wuꞌne cub nkꞌoꞌne tkꞌukbil txꞌotxꞌ. Wuꞌne ocx nkꞌoꞌne ke nyole tuj cytziꞌye ex e oc ncwentine tjakꞌ t-xlecumal nkꞌabe. Xi nmaꞌne cye aj Sión: Akeye etzan wuꞌne.

17 Tzulx cynable, tzulx cynable akeye aj Jerusalén, che weꞌctze. O che cꞌixbisanjtze tuꞌn tkꞌoj Kman mer ic tzaꞌn jun xjal in xi tcꞌaꞌn kꞌeꞌn, cxel tcꞌaꞌn ocxi tbaj tuꞌn ex ocxi tchyoꞌn twiꞌ. 18 Cyxol cycyakil ke cycꞌwaꞌle o che tzaj, mintiꞌ jun in xi ẍaklunte cyeye; cyxol cycyakil ke cycꞌwaꞌle o che cub cychꞌisune, mintiꞌ jun in xi katonte cyeye. 19 Atzun ke cabe mya baꞌn lu e tzaj cyibaje: Aju cytanmiye o cub xitun ex o tzꞌex elkꞌan aju at tuj, ex ke xjal ateꞌ tuj e cyim tuꞌn weꞌyaj ex tuꞌn kꞌoj. ¿Alcye jun jacu tzaj tzꞌeꞌy tcꞌuꞌj cyiꞌje? ¿Alcye jun jacu tzaj kꞌukbante cycꞌuꞌje? 20 Ke cyxjalile ma baj cyipun, ic cyten ic tzaꞌn jun masat otok tzyet tuꞌn cꞌobil, palch ke cyuj cyscyin tcyakil cay, ma che tzaꞌw tuꞌn tkꞌoj Kman Dios ex tuꞌnju ma che tzaj cawin tuꞌn. 21 Cyjaꞌtzun, akeye xjal ateꞌye tuj yajbil cybintze jlu, ma chyoꞌn cywiꞌye pero mya tuꞌn vin. 22 Chi Kman aju Cydiose cyjaꞌ, aju in colin cyiꞌj ke xjal etzan tuꞌn: Cꞌelel wiꞌne aju copa tuj cykꞌabe, aju xi nkꞌoꞌne cyeye tej ttzaj ntxꞌuꞌjile cyiꞌje ex chyoꞌn cywiꞌye tuꞌn, ex mlay txi cycꞌantle juntl maj. 23 Cxel nkꞌoꞌne cye keju ma che cꞌixbisante cyeye, akeju in cymaꞌntok cyeye cyjaꞌ: Che palecuye twitz txꞌotxꞌ porque ko icꞌex bete cyibaje, che chi; atzun cyeye e cub paleꞌye twitz txꞌotxꞌ, ic e oque ic tzaꞌn be tuꞌn cyicꞌx bet xjal cyibaje.