50
Chi Kman cyjaꞌ: Miꞌn che ximane tiꞌj ka ma che cyaj ncoline ke aj Israel ic tzaꞌn jun xinak nneꞌx tlajoꞌn t-xuꞌjil, ex miꞌn che ximane tiꞌj ka ma cheꞌx ncꞌayine ke tuꞌn cyoc te majen tuꞌnju at cycꞌas tucꞌil juntl. E jeꞌx ncꞌayine ke aj Israel tuꞌn tlaj e binchan il, ex tuꞌnju el cypaꞌn cyib wiꞌje ex e oc miban che niman. 2 ¿Tikuꞌn mi aꞌl jun o cnet wuꞌne tej wule? ¿Tikuꞌn mi aꞌl jun tzaj tzakꞌwente weye tej ntxocone? ¿Baka mintiꞌ wipumale tuꞌn cycolpete, ex baka mlay che tzokpete wuꞌne? Nok tuꞌn jun nyole oc t-xi nmaꞌne, nnaꞌj tzkij mar ex ke nima in che oc te tzkij txꞌotxꞌ; tuꞌn jlu in che baj cyim ke cyiẍ tuꞌn txketleꞌn ex in che kꞌay tuꞌnju mintiꞌ aꞌ. 3 Wuꞌne nnoꞌc yupj twitz cyaꞌj ex bis in cyaj.O keꞌ tcꞌuꞌj tmajen Kman tej ttzaj yajbil tiꞌj
4 Ma tzaj kꞌoꞌn nnable tuꞌn Kman tuꞌn t-xi nmaꞌne jun yol te kꞌukbabl cycꞌuꞌj ke xjal ma che sict. Cycyakil prim in chin jaw cꞌasune tuꞌn Kman tuꞌn t-xi nkꞌoꞌne nwiꞌye tiꞌj tyol, ic tzaꞌn jun xnakꞌtzben. 5 A Kman ma tzaj kꞌonte nnable, mintiꞌ ma tzꞌel wicꞌune ex mintiꞌ ma chin el oke tiꞌj. 6 Xi nkꞌoꞌne ttzal wiꞌje tuꞌn nbaj asyaline ex mintiꞌ in kꞌajte tej tjatz bakoꞌn nxmatze. Mintiꞌ el wewane nwitze cye keju e oc yasonte weye ex cye keju ocx cytzuban tuj nwitze. 7 Ate Kman onil weye, cyjaꞌtzun mintiꞌ tzaj nchꞌixwiye cywitz keju e oc yasonte weye, ex cyuw ntene ic tzaꞌn jun pic, porque baꞌn wuꞌne mlay cub nchꞌixwiye. 8 Tcub ju colol wiꞌje ntxlaje: ¿Atpe jun at tkꞌoj wiꞌje? Koꞌ junx twitz jwes. ¿Atpe jun taj tuꞌn tmante alcye wile? E ttzaj wucꞌile ex e ttzaj tmaꞌn weye. 9 Ate Kman onil weye, ¿alcye jun jacu cub kꞌonte nsentense? Cycyakil aj kꞌoj wiꞌje che bel naj ic tzaꞌn jun xbalun in baj tuꞌn pocꞌ.
10 Akeye in che niman te Kman ex in xi cybiꞌne aju in tmaꞌn tmajen, ka in che bete tuj klolj ex mintiꞌ chꞌin spicꞌun tuj cybeye, toc keꞌ cycꞌuꞌje tiꞌj Kman, cyokxenanx cyibe tuj tkꞌab Dios. 11 Pero cycyakile akeye nnoꞌc cytxakoꞌne kꞌakꞌ ex in tzaj cytzyuꞌne ttxaꞌn tzaj, che bete tuj t-spicꞌumal kꞌakꞌ ex che bete tuj t-spicꞌumal ttxaꞌn tzaj otok tzꞌoc cytxakoꞌne. Ctzajel t-samaꞌn Kman aju castiw lu cyibaje, ex ax che cyjel paleꞌye tuj cꞌixbisabl.