Aju tmajen Kman spicꞌun cye nasyon
49
Chin cybintze akeye tnam tcubsaꞌn ttzi mar; cykꞌontz cywiꞌye tiꞌj nyole akeye nasyon najchak ateꞌye: Ate Kman jaw scꞌon weye tej naꞌnxtok wul itzꞌje, oc tkꞌoꞌn nbiye atxix tej atinxe tuj talbil ntxuꞌye. 2 Oc tkꞌoꞌn ntziꞌye ic tzaꞌn jun spad banin ttziꞌ, ex ewan kine tuj tkꞌab tuꞌn nclete; ma chin oc tkꞌoꞌn ic tzaꞌn jun plech tzꞌuꞌp twiꞌ ex ma chin cuꞌx tkꞌoꞌn tuj tcubil. 3 Tzaj tmaꞌn weye cyjaꞌ: Akeye aj Israel nmajene keye, cyiꞌje cjawil nimsaꞌn nbiye. 4 Atzun weye otok cub nximane cyjaꞌ: Nokx gan ma chin akꞌnane ex nokx gan ma baj nnajsaꞌne wipune, pero ax toc ate Kman ccolil wiꞌje, ex aju twi ncꞌuꞌje tucꞌil Dios taꞌ.5 Ma ncꞌame jun woclene tucꞌil Kman aju Ndiose, ex ma tzaj tkꞌoꞌn wipumale. Ate Kman o pokꞌsante weye max tuj talbil ntxuꞌye tuꞌntzun woque te tmajen, ex tuꞌn tajtz cyiꞌj ke aj Israel akeju tiyjil Jacob, ex tuꞌn toc cychmon cyib tucꞌil Kman. 6 Chi Kman weye cyjaꞌ: Mya nok oꞌcx tuꞌn toca te nmajene, ex mya nok oꞌcx tuꞌn toc juntl maj cyoclen ke tiyjil Jacob tuꞌna ex tuꞌn cyul meltzꞌaj aj Israel akeju e cyaj clet; ax icx cꞌoquela te spicꞌun wuꞌne cye mastl nasyon, tuꞌn t-xi tmaꞌna tuj tcyakil twitz txꞌotxꞌ aju colbil wuꞌne, chi Kman.
7 Ate Kman aju colpil ke, aju Dios Xjan cye aj Israel, in tmaꞌn teju tnam icꞌun cyuꞌn mastl tnam ex o txi tzyuꞌn tuꞌn toc te cymajen ke mastl rey: Oc cyqueꞌyinjtze cyuꞌn ke rey ex cyuꞌn ke nejenel, che jawil weꞌ ex che bel ẍmejeꞌ cywitze, porque akine Cymane aju Dios Xjan cye aj Israel o chin jaw scꞌonte cyeye, ex in japun ju nyole tziyimaj wuꞌne cyeye.
Aju tkanil tuꞌn tjaw binchet juntl maj tnam Jerusalén
8 Chi Kman cyjaꞌ: Tuj tkꞌijlalil xtalbil nbiye tyola: Tuj tkꞌijlalil colbil tzaj nkꞌoꞌne onbil teya. Cwentina wuꞌne tuꞌn tcyaj bant tiꞌj jun nyole cyucꞌil tnam nok tuꞌna, tuꞌn cyjaw binchet juntl maj ke cytanmi aj Israel, tuꞌntzun cyoc juntl maj te tajwil txꞌotxꞌ aju otok naj, 9 ex tuꞌn t-xi kꞌmet cye ke pres: Baꞌn tuꞌn cyetze; ex tuꞌn t-xi kꞌmet cye ke najl tuj klolj: Baꞌn tuꞌn cyetze tuj klolj tuꞌntzun cytene tuj spicꞌun. Tuj tcyakil part te cybe oc cyaj meltzꞌaj cnetel cywa, ex nok alcye part twi witz tzꞌlaꞌj cyiꞌj cnetel cywa, ic tzaꞌn in cnet cywa alumaj.
10 Mlay tzaj weꞌyaj cyiꞌj mi txketleꞌn, ex mlay che naj tuꞌn taꞌw kꞌij ex mi tuꞌn taꞌw cyak, porque cꞌujlaꞌn ke wuꞌne ex ẍakluꞌn ke, ex che xel wiꞌne jatum in jatz jlet cywi aꞌ. 11 Cjaketel jun be wuꞌne cyxol ke witz, ex che oquel ke be te chkꞌajlaj wuꞌne.
12 Cyqueꞌyinxe, lu ke che ul, najchak ma che tzaj, txkan ma che tzaj tuj txꞌotxꞌ tuj tbankꞌab kꞌij ex txkantl tuj telex kꞌij ex junjuntl ma che tzaj tuj txꞌotxꞌ Sinim. 13 Aya cyaꞌj, schꞌina tuꞌn tzalajbil. Aya txꞌotxꞌ, tzalajxa nim. Akeye witz, tjaw tkꞌajkꞌajel cywiꞌye cyuw wen tuꞌn tzalajbil. Porque tuꞌn Kman ma kꞌukbanjtz cycꞌuꞌj xjal etzan tuꞌn, ex ma tzaj tzꞌeꞌy tcꞌuꞌj cyiꞌj tuj ju yajbil cye.
14 Otok cyma aj Sión cyjaꞌ: Ma ko cyaj coline tuꞌn Kman, ma tzicꞌ knaꞌle tuꞌn, che chi. 15 Atzunte Dios in tmaꞌn cyjaꞌ: ¿Jacupe tzicꞌ tnaꞌl tuꞌn jun txuybaj tuꞌn miꞌn tcꞌujlante tal? Balo jacu tzicꞌ tnaꞌl tuꞌn, atzun weye, mlay tzicꞌ cynaꞌle wuꞌne. 16 Porque biꞌx tzꞌiban cybiye wuꞌne twitz nkꞌabe, ex cucx in chin ximane cyiꞌj ke muro tocsaꞌn tiꞌj cytanmiye. 17 Lu che ul naj ke xjal tuꞌn tjaw cybinchaꞌn cytanmiye juntl maj; atzun keju e baj xitun cytanmiye miꞌn che tentl. 18 Cyiꞌn jaw cywitze jawni ex cyqueꞌyinxe cyiꞌjele, niban tbaj cychmon cyib cycyakil xjal tuꞌn cypon juntl maj cyucꞌile.
Akine Dios in xi nmaꞌne jun nyole axix toc: Cycyakil jlu ic che oquel ic tzaꞌn jun tbanil uwj tuꞌn tcub cykꞌoꞌne cykule, ic tzaꞌn uwj in cub tkꞌoꞌn jun kꞌapoj tkul te tachbil oc tmojeꞌ. 19 Aju cytanmiye tucꞌix cytxꞌotxꞌe o che cub xitj ex o che naj, atzun jaꞌlo mlay canun cytxꞌotxꞌe tuꞌn cynajan xjal tuj, tuꞌnju tal chꞌin. Keju e cub xitunte cytanmiye che elel lakꞌeꞌ najchak cyiꞌje. 20 Ke cycꞌwaꞌle otok che naj tuj cywitze, ctzajel cymaꞌn cyeye cyjaꞌ: Aju txꞌotxꞌ mlay canun te keye, cykꞌontze mastl lugar tuꞌn knajane twitz. 21 Atzun cyeye oc cymaꞌye tuj cyanmiye cyjaꞌ: ¿Alcye ma tzul alinte ke kcꞌwaꞌl lu? Mintiꞌtok kcꞌwaꞌl nej ex mintiꞌtok tuꞌn cytzaj tuꞌnju otok koꞌx kꞌiꞌn pres ex otok ko ex lajoꞌn. ¿Alcye xchꞌisan cye? Otok ko cyaj colin kjunalx, ¿jatum ma che tzaj ke cꞌwaꞌl lu? Che chiloye.
22 Chi Kman Dios cyjaꞌ: Che tzajel ntxcoꞌne ke nasyon tuꞌn nkꞌabe ex cbel nwabane jun bander te jun techal cye tnam, tuꞌn tzaj cypaloꞌn ke cycꞌwaꞌle xinak tuj cykꞌab ex ke cycꞌwaꞌle xuꞌj twi cysemil. 23 Ke rey che oquel te cymambile ex ke cymeꞌjel rey che oquel te cytxuꞌble. Che bel ẍmejeꞌ cywitze, max cpol tacl tibaj cywitz twitz txꞌotxꞌ, cbel cymansin cyib cywitze ex che ajbel cyeye. Atzun cꞌelel cynicꞌe wiꞌje ka akine Dios aju Cymane, ex ke xjal kꞌukl cycꞌuꞌj wiꞌje mlay cub cychꞌixwi.
24 ¿Jacupe tzꞌel kꞌiꞌn tuj tkꞌab jun xjal at nim tipun aju otok tcamba tuj kꞌoj? ¿Jacupe tzokpaj jun pres tuj tkꞌab ju xjal cyuwxix cawin? 25 Chi Kman cyjaꞌ: Jacu tzꞌel kꞌiꞌn te jun xjal at tipun tuꞌn tkꞌojin akeju pres otok che tzyet tuꞌn tuj kꞌoj, ex jacu tzꞌel kꞌiꞌn te jun xjal cyuwxix cawin aju otok tcamba tuj kꞌoj. Akine chin kꞌojlel cyucꞌil ke xjal in che jyon kꞌoj cyiꞌje ex ax kine chin clol cye ke cycꞌwaꞌle. 26 Oc che oquel njwersine keju yajlal teya tuꞌn tcub cybyon cyib cyxolx, ex cchyoꞌl cywiꞌ tuꞌnx cychcꞌel ic tzaꞌn in chyoꞌn cywiꞌ tuꞌn cycꞌa vin. Atzun cꞌelel cynicꞌ cycyakil xjal wiꞌje ka akine Dios aju Clol cyeye, akine Tdios Jacob at wipumale ex ax kine colpil cyeye.