In tkꞌoꞌn Kman tkanil cyiꞌj ke tiꞌxti acꞌaj
48
Cybintze jlu akeye tiyjil Jacob, toc cybiye aj Israel ex tiyjil Judá keye, in xi cytziyane jun yol axix toc tuj tbi Kman, in tzaj cynaꞌne tbi Cydios aj Israel, pero mya ax toc cyuꞌne ex mya tzꞌakl keye twitz. 2 In cymaꞌne cyjaꞌ: Teju tnam xjan koꞌye, che chiye, ex kꞌukl toc cycꞌuꞌje tiꞌj Cydios aj Israel, aju toc tbi Kman aju Tajaw Tcyakil. 3 Atxix t-xe tnejel xi nmaꞌne tkanil cyeye cyiꞌj ke tiꞌxti o che baj ex ax kine o chinx yecꞌunte cyeye. Jurat o nbinchaye ex ax toc o che bant. 4 Baꞌn wuꞌne cyuw cywiꞌye, cyuw keye ic tzaꞌn cꞌuxbil, ex ic tzaꞌn kꞌan cꞌuxbil mlay cub paktzꞌaj tiꞌj. 5 Xi nmaꞌne tkanil cyeye atxix ojtxi, xi nmaꞌne cyeye tej naꞌnxtok tuꞌn tul canun. Cyjaꞌtzun mlay bant tuꞌn t-xi cymaꞌne cyjaꞌ: Aju tilbilal kdiose tzeꞌ ex ke tilbilal cꞌuxbil cytxꞌotxꞌil, atzun keju ma che kꞌmante tuꞌn tbant icju. 6 O cybiye tcyakil jlu; cykꞌonque cwent tiꞌj ex cxel cynimane ka ax toc; atzun jaꞌlo cxel nmaꞌne acꞌaj tkanil cyeye cyiꞌj ke tiꞌxti ateꞌ tuj ewaj, akeju mintiꞌtok ojtzkiꞌn cyuꞌne, 7 akeju tiꞌxti lu ma che binchet jaꞌlo, mya ojtxi e bant ex naꞌnxtok cybinteye tkanil cyiꞌj, ex matzun jaꞌlo ma cybiye. Cyjaꞌtzun mlay bant txi cymaꞌne cyjaꞌ: Biꞌmaj jlu kuꞌne. 8 Naꞌnxtok cybinteye tkanil cyiꞌj ex mintiꞌtok ojtzkiꞌn cyuꞌne, porque tcyakil maj mintiꞌ in xi cybiꞌne, mer ic tzaꞌn lamoꞌn tuj cyẍcyine. Baꞌn wuꞌne, tcyakil aju in cymaꞌne mya ax toc, ex atxix tej cyitzꞌje toc cybiye te miban che nimane.9 Pero xi ncꞌuꞌne nkꞌoje, nok tuꞌn tjaw nimsaꞌn nbiye, ex weꞌ nkꞌoje; cyjaꞌtzun mintiꞌ e naje wuꞌne. 10 Akine in baj saksante cyeye, pero mya ic e tenbaye ic tzaꞌn in tenba sak pwak, nok oꞌcx e ocx nkꞌoꞌne tuj nim cꞌixbisabl, mer ic tzaꞌn tuj jun jorni. 11 Tuꞌn tlaj nbiye maꞌxix toclen ma nbinchaye jlu, porque mlay wakꞌe ambil tuꞌn tyolinjtz mya baꞌn wiꞌje. Mlay wakꞌe ambil tuꞌn tjaw nimsaꞌn tbi juntl te nxele, chi Dios.
Tuꞌn Kman ccletel aju tnam etzan tuꞌn
12 Chin cybintze akeye aj Israel tiyjil Jacob; o che txocliye wuꞌne, akine oꞌcxcu jun Dios, akine t-xe tnejel ex ax kine te bajsbil. 13 Tuꞌn nkꞌabe cub nkꞌoꞌne tkꞌukbil txꞌotxꞌ ex wuꞌnxe xi nlicꞌune cyaꞌj; oc cytzaj ntxcoꞌne in che ul lakꞌeꞌ. 14 Cychmon oc cyibe cycyakile ex cybintze: ¿Alcye jun cyxol ke tilbilal nnoꞌc cydiosin xjal o kꞌmante tkanil tiꞌj ju ctzajel? Aju xinak o jaw nscꞌoꞌne cbantel tuꞌn aju o cub nximane tuꞌn tbant tiꞌj Babilonia, ex cꞌoquel ten kꞌojlel cyiꞌj aj Caldey. 15 Akine inx kꞌmante te, wuꞌne tzaj ntxcoꞌne, wuꞌne tzaj wucꞌine, ex aju cbantel tuꞌn baꞌn cꞌelel. 16 Che lakꞌetze wucꞌile ex cybintze jlu: Atxix t-xe tnejel mintiꞌ in yoline tuj ewaj, ex tejtzun ttzaj tcyakil jlu, lu kine at, chi Dios. Ex atzun jaꞌlo ate Kman ma tzaj samante weye ex ma tzaj t-samaꞌn T-xew junx wucꞌile.
17 Atzun jlu in tmaꞌn Kman aju colpilte cyeye, aju Dios xjan cye aj Israel: Akine Dios aju Cymane, akine chin xel xnakꞌtzante ju baꞌn tuꞌn tajben te cyeye, akine chin xel ẍaklunte cyeye tuj be cxel cyiꞌne. 18 Nokwit xi cynimane aju xi nmaꞌne cyeye, mawtlo che tene tuj txubtxaj nimxix ic tzaꞌn jun nima nojni tuꞌn aꞌ, ex aju in cybinchaꞌne, baꞌnwtlo ma tzꞌel cyeye ic tzaꞌn ju aꞌ in jaw xtulkꞌin tibaj mar, 19 ke tiyjila mawtlo chmet nimxix cybaj ic tzaꞌn ttxa tzꞌaꞌn ttzi mar mlay bant tajlanjtz; mintiꞌwtlo ma che naje wuꞌne ex mintiꞌwtlo ma che el nlakꞌbaꞌne nwitze.
20 Cyetze tuj Babilonia, cyetz oke cywitz aj Caldey. Cykꞌmanxe tkanil lu, che schꞌine tuꞌn tzalajbil, cykꞌmanxe cye ke xjal ateꞌ max ttxaꞌnpun txꞌotxꞌ, cykꞌmanxe cyjaꞌ: Ate Kman ma colpinte cye tiyjil Jacob akeju tmajen. 21 Tej cyex tiꞌn tuj tzkij txꞌotxꞌ, mintiꞌ tzaj txketleꞌn cyiꞌj, jaw jlet jun twi aꞌ t-xe pic tuꞌn, el cꞌabchaj pic ex etz tilj nim aꞌ tuj. 22 Atzun cye xjal binchal mya baꞌn, mlay che ten tuj txubtxaj, chi Kman.