Tej tcub xitj tnam Babilonia
47
Tcuꞌtza ex kecuya tuj kuk aya tnam Babilonia; ic ttena ic tzaꞌn jun tal kꞌapoj naꞌnx tcnet tchmil; tcuꞌtza tuj tkꞌukbila ex kecuya twitz txꞌotxꞌ aya tnam Caldey; ic ttena ic tzaꞌn jun tal kꞌapoj, porque mlaytl cyma xjal tiꞌja ka neꞌx taꞌya ex ka tcwentin tiba wen. 2 Tzyuma tal cyaꞌ ex cheꞌnctza triw, kꞌin ela xbalun aju toc te txaybil twitza, jaloꞌn jawa tchuya, e tcyaj sbajeꞌ tcuxa, ticꞌx beta cyuj ke nima; 3 e tcyaj kꞌanchaꞌl tcyakil t-ximlala skiꞌt tiꞌj, tuꞌn ttzaj tchꞌixwiya. Cbel tcastiwoya wuꞌne tiꞌj tbinchbena mya baꞌn, ex mi jun jacu mayonte weye.4 Aju colpil ke, atzunju Dios Xjan cye aj Israel, aju toc tbi Kman Tajaw Tcyakil. 5 Chi Kman cyjaꞌ: Kecuya ex miꞌn kꞌajta aya tnam Babilonia, tocxa tuj klolj porque mlay tzꞌoc kꞌmaꞌntl tbiya xuꞌj rey cawil cyibaj nasyon. 6 Tej ttzaj nkꞌoje tiꞌj ju tnam scꞌoꞌmaj wuꞌne, e el wicꞌune ke xjal ateꞌ tuj, akeju etzan wuꞌne, ex e jeꞌx nkꞌoꞌne tuj tkꞌaba tuꞌn tcub cyiꞌj tuꞌna; atzun teya mintiꞌ tzaj tzꞌeꞌy tcꞌuꞌja cyiꞌj, nok oꞌcx e baj tyajlaꞌna ke tij xjal ateꞌ cyxol. 7 O tmaya cyjaꞌ: Cucx chin cawile te jumajx akine xuꞌj rey, chiya. Mintiꞌ cub tena ximal tiꞌj jlu ex mintiꞌ cub tena ximal tiꞌj tzaꞌn tten tuꞌn tpon baj bajsbil teya. 8 Cyjaꞌtzun bintza jlu jaꞌlo, aya xuꞌj nimxix tganiya tuꞌn tachina; tuj twitza segurxix taꞌya tuj tcawbila ex in baj t-ximana tuj tanmiya cyjaꞌ: Oꞌcxcu akine ex mintiꞌ juntl ic tzaꞌn weye; mlay chin oque te meba xuꞌj ex mlay chin cyaj tene mintiꞌ wale, chiya. 9 Pero minaben, te junx kꞌij che tzajel keju cabe mya baꞌn lu tiꞌja: Cyjel tena meba xuꞌj ex cyjel tena mintiꞌ tala, biꞌx cnajela, masque baꞌn kꞌijina ex masque baꞌn nim mañ tuꞌna. 10 Tuj twitza segurxix taꞌya tuj tbinchbena mya baꞌn ex cub t-ximana cyjaꞌ: Mintiꞌ jun in queꞌyin wiꞌje, chiya. Aju tnabla ex tojtzkibla ma che cub sbunte teya. Cub t-ximana tuj tanmiya cyjaꞌ: Oꞌcxcu akine ex mintiꞌ juntl ic tzaꞌn weye, chiya. 11 Pero tzul jun mya baꞌn tibaja ex mlay mayet tuꞌna tuꞌnju mañ baꞌn tuꞌna; ctzajel jun xitbil tiꞌja ex mlay bant tmayonjtz tuꞌna; ctzajel jun cꞌixbisabl tiꞌja aju mintiꞌtok in ayona tiꞌj, nok minaben tzul tiꞌja. 12 Cucx cyꞌaꞌna ex cucx kꞌijina, ic tzaꞌn o bant tuꞌna tej kꞌapojxtok taꞌya; mya yajcu jacu tzꞌajben teya, mya yajcu tuꞌn jlu jacu che xob xjal twitza. 13 Ma che tzaj tiꞌna nim xjal kꞌol consej teya ex ma sicta tuꞌn jlu. 14 Pero bintza, ke xjal lu ic cyten ic tzaꞌn tzkij chꞌim in baj tzꞌeꞌy tuꞌn kꞌakꞌ, mlay bant cyclonte cyib tuj kꞌakꞌ. Porque mya ic tten kꞌakꞌ lu ic tzaꞌn ttxꞌan xkꞌaꞌl tuꞌn kcub keꞌ tiꞌj ex tuꞌn kmekꞌt tuꞌn. 15 Cyjaꞌtzun cbajel cyiꞌj ke kꞌol consej teya, akeju ma sicta cyuꞌn atxix ttzajlena tuj tkꞌapojila. Teylex te junjun cꞌelel tzpet tiꞌj tbe ex mi aꞌl jun jacu cleta tuꞌn.