3 Chin cybintze akeye tiyjil Jacob, cycyakile cyiyjil aj Israel, akeye o che cyaj ankꞌine, cycyakil keju ateꞌx tuj tnam Israel. Tej naꞌnxtok cyul itzꞌje, tuj ncwente ateꞌye, ex paloꞌn keye wuꞌne tej matok neꞌx keye. 4 Ex axwe kin oc cyoque te tij xjal; oc t-sakix cywiꞌye, cucx tzyuꞌn keye wuꞌne tuꞌn tten cyipune. Akine in binchante cyeye ex cucx che jawil wikane, cucx cxel nkꞌoꞌne cyipune ex che cletele wuꞌne.

5 ¿Alcye juntl jacu che yoline tiꞌj ka icx ic tzaꞌn kine? ¿Alcye jun jacu pon ic tzaꞌn kine tuj cywitze? 6 At xjal in jatz cyiꞌn nim kꞌan pwak tuj cychꞌuꞌẍ ex nnoꞌcx cymaloꞌn sak pwak tuj balans; te tibajxi in bant jun cytrat tucꞌil jun xjal at nim tnabl tuꞌn takꞌnan tiꞌj sak pwak, tuꞌn tcub tbinchaꞌn jun dios ex tuꞌn cycub ẍmejeꞌ cꞌulul twitz. 7 In jax cykꞌoꞌn twi cysemil tuꞌn t-xi cyikan ex in cub cykꞌoꞌn tuj jun lugar cyuw tten, ex axtzun in cyaj ten tuj tlugar, mintiꞌ in yucch. Masque ma che jaw schꞌin tuꞌn cykanin onbil te, mintiꞌ in tzaj ttzakꞌweꞌn ex mlay che clet tuꞌn oc ttzaj yajbil cyiꞌj.

8 Cynaꞌntze jlu, akeye miban che nimane, cheba che ximane tiꞌj ju o nbinchaye. 9 Cynaꞌntze aju o baj tuj tkꞌijlalil ojtxi. Oꞌcx akine Dios ex mintiꞌ juntl. Akine Dios ex mintiꞌ juntl ic tzaꞌn kine. 10 In nkꞌoꞌne tkanil atxix t-xe tnejel tiꞌj ju tzul te bajsbil; in nkꞌoꞌne tkanil atxix ojtxi tiꞌj ju cbajel tuj tkꞌijlalil tzul. In xi nmaꞌne cyjaꞌ: Aju o cub nximane tuꞌn tbant, wuꞌne cbantel; cbantel wuꞌne tcyakilju wajbile. 11 Ma tzaj ntxcoꞌne jun xjal tuj tjawitz kꞌij, tzul te najchak ic tzaꞌn jun kꞌanjan ex cjapunel nximbetze tuꞌn. O nmaye, ex ictzun cbantel wuꞌne; o cub nximane alcye tuꞌn tbant wuꞌne, ex cjapunelx. 12 Chin cybintze akeye xjal cyuw cyanmi, tuj cywitze ka najchak taꞌ colbil cyeye: 13 wuꞌne tzul lakꞌeꞌ aju colpibl cye xjal, aju colbil wuꞌne mlay weꞌ, lu chꞌix tul canun. Che cletel aj Sión wuꞌne ex cxel nkꞌoꞌne cyajwalil aj Israel, ic tzaꞌn weye.