Tzaj tmaꞌn Kman tuꞌn tjapun jun akꞌuntl tuꞌn rey Ciro
45
Oc tkꞌoꞌn Kman toclen Ciro tuꞌn toc te rey, tzaj ttzyuꞌn tkꞌab tuꞌn tten tipumal, tuꞌntzun tcub cyiꞌj ke nasyon tuꞌn ex tuꞌn tel baj tiꞌn cymacbil rey, akeju in che ajben tuj kꞌoj. Che jaketel ke tpwertil tnam tuꞌn Kman twitz rey Ciro ex mi aꞌl jun jacu tzꞌetz lamonte cye. Ex jaꞌlo in xi tmaꞌn te cyjaꞌ: 2 Chin bel neje twitza, che bel ntiꞌline ke witz, cꞌoquex npaꞌne ke tpwertil tnam kꞌan cꞌuxbil ex che bajel ntokine ke cꞌuxbil toc ttzi tpwertil tnam. 3 Cxel nkꞌoꞌne ke tiꞌxti tbanil ex wiꞌyil teya, akeju ewan ex ju kꞌinumabl cꞌuꞌn cyuj ke lugar tuj tewan, tuꞌntzun tel tnicꞌa tiꞌj akine Cydios aj Israel ex akine in chin txocone tiꞌja tiꞌj tbiya. 4 Txqueta wuꞌne tiꞌj tbiya nok tuꞌn cylaj scꞌoꞌmaj wuꞌne ke nmajene, akeju aj Israel tiyjil Jacob, ex ma txi nkꞌoꞌne juntl tbiya maꞌ toclen masque mintiꞌ nneꞌl tnicꞌa wiꞌje. 5 Akine Dios ex mintiꞌ juntl, mintiꞌ juntl Dios oꞌcx kine. Cxel nkꞌoꞌne tipuna tuꞌn tcub cyiꞌj tnam tuꞌna masque mintiꞌ nneꞌl tnicꞌa wiꞌje. 6 Oc nbinchaꞌye jlu tuꞌn tel cynicꞌ cycyakil xjal tuj tjawitz kꞌij ex tuj telex kꞌij mintiꞌ juntl ic tzaꞌn kine. Akine Dios aju Cymane ex mintiꞌ juntl. 7 Wuꞌne in bant spicꞌun ex klolj, in che ten xjal tuj txubtxaj wuꞌne, ex in tzaj nkꞌoꞌne yajbil cyiꞌj. Akine Dios aju in binchante tcyakil jlu.Aju tipumal Dios maꞌ t-xilen
8 Max tuj cyaꞌj ctzajel nsamaꞌne aju cambabl ic tzaꞌn tkꞌab cheꞌw in tzaj twitz cyaꞌj, ex ic tzaꞌn jbal in tzaj tuj muj in tcꞌmoꞌn txꞌotxꞌ, aju ctzajel tkꞌoꞌn ic tzaꞌn twitz atzunju colbil ex oc cybinchaꞌ xjal ju tzꞌaklxix.
9 Ay becꞌbil twitz ju xjal nnoꞌc ten kꞌojel tucꞌil ju binchalte te. Ic tten ic tzaꞌn jun piẍ ttxꞌakan cꞌil cyxol txkantl piẍ ttxꞌakan cꞌil. ¿Jacupe txi tmaꞌn aju xcab txꞌotxꞌ te binchal xar: ¿Ti nbaj teya? chiwt, ex ¿jacupe txi tmaꞌn jun cꞌil teju binchalte te: Miban tzꞌakꞌnana, chiwt? 10 Ay becꞌbil twitz ju xjal in xi tman te tman cyjaꞌ: ¿Tikuꞌn ma chin oc tpokꞌsaꞌna? ka chi, ex ka in xi tmaꞌn te ttxuꞌ cyjaꞌ: ¿Tikuꞌn ma chin ul talina? ka chi. 11 Ate Kman aju Dios Xjan cye aj Israel, aju binchante cye, in tmaꞌn cyjaꞌ: ¿Jacupelo tzaj cykanine weye alcye cbantel wuꞌne cyiꞌj ke ncꞌwaꞌle ex ka tuꞌn ttzaj cykꞌmaꞌn weye alcye tuꞌn tbant wuꞌne? 12 Wuꞌne o bant twitz txꞌotxꞌ cyucꞌix ke xjal najl twitz; tuꞌn nkꞌabe xi nlicꞌpuꞌne cyaꞌj ex xi nmaꞌne tuꞌn cyjaw jlet cycyakil cheꞌw ateꞌ twitz cyaꞌj. 13 Wuꞌne jaw jlet ju rey Ciro tuꞌn tcub cyiꞌj ke mastl rey tuꞌn, ex mya cyuw cꞌelel tbe wuꞌne, tuꞌn cjawil tbinchaꞌn juntl maj tnam etzan wuꞌne, ex tuꞌn che tzokpetel ke xjal e jeꞌx kꞌiꞌn pres, ex mlay tzꞌel tkanin twi tcꞌuꞌj ex chojbilte tiꞌj takꞌunben. A Kman aju Tajaw Tcyakil in kꞌmante jlu.
14 Chi Kman cye aj Israel cyjaꞌ: Aju cykꞌinumabl ke aj Ejipt ex aju cycꞌaꞌẍ aj Etiopía cꞌoquel te cyeye; ex ke aj Seba maꞌ cywaꞌl tzul cykꞌon cyib tuj cycwente ex che oquel te cymajene, che oquel lpeꞌ cyiꞌje cꞌaloꞌn ke tuꞌn caden ex che bel ẍmejeꞌ cywitze tuꞌn cycubsan cyeye, ex ctzajel cymaꞌn cyeye cyjaꞌ: Ax toc a Dios at cyucꞌile, oꞌcx te ex mintiꞌ juntl Dios, che chilo, chi Dios.
15 Axix toc aya jun Dios taꞌya tuj ewaj, aya Cydios aj Israel ex aya colol.
16 Cycyakil keju binchal ke tilbilal cbel cychꞌixwi ex cꞌelel cynicꞌ xjal cyiꞌj nokx gan ju in bant cyuꞌn. 17 Atzun cye aj Israel che cletel tuꞌn Kman, te jumajx aju colbil cye, mlay cub cychꞌixwi ex mlay naj cynabl.
18 Ate Kman o binchante cyaꞌj, atzun Diosju, aju binchante txꞌotxꞌ ex cub tkꞌukbaꞌn, ex mya o bant tuꞌn tuꞌn tten nok cucx, nok oꞌcx o tbincha tuꞌn cyten xjal twitz, atzunju in kꞌmante cyjaꞌ: Akine Dios ex mintiꞌ juntl. 19 Mintiꞌ ma chin yoline tuj ewaj ex mi tuj jun lugar tuj tewan twitz txꞌotxꞌ. Mintiꞌ xi nmaꞌne cye ke tiyjil Jacob: Chin cyjyome nokx gan, nchiwte. Akine Dios in chin yoline axix toc ex in xi nmaꞌne aju tzꞌaklxix.
In yolin Kman cyiꞌj ke tilbilal tuꞌnju nokx gan ke
20 Akeye xjal, cychmon oc cyibe ex cytzaje, che lakꞌetze cycyakile akeye e cyaj clet cyuj ke tnam. Mintiꞌ cynabl ke xjal ikan ke tilbilal cyuꞌn oc cyex tuj cay, porque ke tilbilal, tzeꞌ ke, ex in che cub ten xjal cubsal twitz cydios aju mlay che clet tuꞌn. 21 Baꞌn tuꞌn cyyoline ex cymantze jun yol te colbil cyibe, ex baꞌn tuꞌn tbaj cykanine cyxolxe: ¿Alcye o kꞌmante jlu atxix ojtxi tej naꞌnxtok tbant? ¿Alcye o kꞌonte tkanil jlu ojtxi? ¿Myapetzun akine in kꞌonte tkanil? Akine Dios ex mintiꞌ juntl. Oꞌcx akine tzꞌaklxix ex colol, mintiꞌ juntl.
22 Cytzaje wucꞌile tuꞌn cyclete wuꞌne, akeye tnam ateꞌye max ttxaꞌnpun txꞌotxꞌ, porque akine Dios ex mintiꞌ juntl. 23 Xi nmaꞌne jun nyole axix toc wuꞌnx wibe, xi ntziyane jun nyole axix toc, ex aju yol lu mlay chꞌexpet; cycyakil xjal che cbel ẍmejeꞌ nwitze, ex cycyakil ctzajel cytziyan tuꞌn cynimante weye. 24 Oꞌcx tucꞌil Kman at ipumalj tuꞌn tcub tiꞌj tcyakil, che chilo wiꞌje. Cycyakil keju in che kꞌojin wiꞌje cbel cychꞌixwi. 25 Nok wuꞌne che oquel te tzꞌaklxix cycyakil cyiyjil aj Israel, ex che tzalajel wiꞌje.