Cucx cꞌujlaꞌn ke aj Israel tuꞌn Kman, aju oꞌcxcu jun Dios
44
Chin cybintze jaꞌlo akeye aj Israel tiyjil Jacob, akeye nmajene scꞌoꞌmaj wuꞌne. 2 Akine Cymane aju binchal cyeye, aju binchante cyeye tej naꞌnxtok cyul itzꞌje ex onin keye wuꞌne. Akeye aj Israel tiyjil Jacob, miꞌn che xobe, akeye nmajene scꞌoꞌmaj wuꞌne, 3 porque cxel nkꞌoꞌne aꞌ tuj lugar mintiꞌ cynajbil xjal tuj ex che jawil jlet ke nima wuꞌne tuj tzkij txꞌotxꞌ. Ctzajel nkꞌoꞌne Nxewe tuꞌn tten cyucꞌil ke cyiyjile ex ctzajel nkꞌoꞌne ncyꞌiwbile cyibaj cycꞌwaꞌle. 4 Che chꞌiyel ic tzaꞌn chaꞌx cꞌul aꞌlin wen ex ic che oquel ic tzaꞌn ke tzeꞌ chjaj ateꞌ ttzi nima. 5 Oc tma jun cyjaꞌ: Te Kman we kin, ex juntl cꞌoquel tkꞌoꞌn tbi tiyjil Jacob, ex juntl cbel ttzꞌiban tibaj tkꞌab: Tetzbil Kman we kin, ex cꞌoquel tkꞌoꞌntl Israel te juntl tbi.6 Ate Kman, cyrey aj Israel ex colpil cye ex Tajaw Tcyakil, chi cyjaꞌ: Akine t-xe tnejel ex ax kine te bajsbil; oꞌcx akine Dios, mintiꞌ juntl. 7 ¿Atpe jun jacu pon ic tzaꞌn kine? Baꞌn tuꞌn tyolin ex tuꞌn ttzaj ttxꞌolbaꞌn weye. ¿Atpe jun jacu tzaj tkꞌoꞌn jun tkanil tiꞌj ju cyjaꞌ ttzaj te tibajxi, ex tuꞌn tmante alcyeju chꞌix tjapun? 8 Miꞌn che secꞌpaje ex miꞌn che xobe. Bay weye o nmaye jlu ex xi nmaꞌne atxix ojtxi, akeye testiw tiꞌj jlu. ¿Atpe juntl Dios? Mintiꞌ, oꞌcx kine. Mintiꞌ juntl colol cyiꞌje, mintiꞌ jun ojtzkiꞌn wuꞌne.
Nokx gan ke tilbilal
9 Cycyakil keju baꞌn che binchan tilbilal nokx gan ke, ex keju tilbilal akeju cꞌujlaꞌnxix cyuꞌn, mintiꞌ cyajben. Akeju in che cꞌulun cywitz, moẍ ke ex mintiꞌ nneꞌl cynicꞌ tiꞌj, cyjaꞌtzun cbel cychꞌixwi. 10 Aju xjal in cub binchante jun tilbilal tuꞌn toc te tdios ex tuꞌn tcꞌulun twitz, nokx gan in naj tkꞌij tiꞌj. 11 Cycyakil keju in che cꞌulun cywitz ke tilbilal cbel cychꞌixwi. Akeju binchal ke tilbilal, xjal ke. Nokwit junx che ul yecꞌul cyib tuꞌn cyoc tuj xjel, jaculo cub cychꞌixwi ex jacu tzaj nim cyxobil.
12 Baꞌn kuꞌn ti in tbinchaꞌn jun txꞌinol cꞌuxbil: In tzaj tiꞌn ju tzꞌkab, ex tbajlenxi cyakix ju cꞌuxbil tuꞌn kꞌakꞌ, in baj ttxꞌinoꞌn ju cꞌuxbil tuꞌn martiy tuꞌntzun tbant aju taj tuꞌn tcub tbinchaꞌn. In akꞌnan tiꞌj tucꞌil tipun tkꞌab, pero ka mintiꞌ ma waꞌn, in baj tipun, ex ka mintiꞌ ma cꞌan, in sict.
13 Baꞌn kuꞌn alcye in tbinchaꞌn jun calpinter: In baj techan ju tzeꞌ tuꞌn metro, in baj tkꞌoꞌn techal tuꞌn lapis tucꞌix compás ex nnoꞌc ten akꞌnal tiꞌj tuꞌn tzꞌkab. Cyjaꞌtzun tten in bant jun tilbilal tuꞌn, ex in cyaj tkꞌoꞌn tilbilal mer ic tzaꞌn tilbilal xjal ex mejor nnoꞌc tuꞌn. Octzun tbant, nnoꞌcx tkꞌoꞌn tuj tja.
14 In jaw ttxꞌemin xjal jun tzeꞌ wiꞌten, ex ka tzis, ex ka jun wiꞌ cꞌol, akeju in che chꞌiy cyxol mastl tzeꞌ tuj chcꞌul. Ex ka in cuꞌx tawaꞌn jun wiꞌ tzaj aju in chꞌiy tuꞌn jbal. 15 Tiꞌj tzeꞌ lu nneꞌl cysiꞌ xjal, in xi cyiꞌn junjun piẍ tuꞌn tocx tuj kꞌakꞌ tuꞌn cymekꞌt tuꞌn, ex junjuntl piẍ in che ajben tuꞌn ttzkꞌaj pan, atzun junjuntl in ajben cyuꞌn tuꞌn tbant jun tilbilal tuꞌn toc te cydios, ex in che cub ẍmejeꞌ twitz tuꞌn cycꞌulun te.
16 Junjun piẍ tzeꞌ nnoꞌcx cykꞌoꞌn tuj kꞌakꞌ tuꞌn tocx txoꞌt chibj tibaj; octzun tbaj chibj txoꞌmaj cyuꞌn, biꞌx in che noj tuꞌn. Ax icx in che mekꞌt tuꞌn kꞌakꞌ ex in cymaꞌn cyjaꞌ: Baꞌn ju kꞌakꞌ, chꞌix kmekꞌt tuꞌn. 17 Ex tiꞌj ttxꞌakan tzeꞌ in baj cybinchaꞌn jun tilbilal tuꞌn toc te cydios, in che cub ẍmejeꞌ tuꞌn cycꞌulun twitz, ex in che cubsan twitz, che chi cyjaꞌ: Ko tcloma porque aya kdiose.
18 Ke xjal lu mintiꞌ chꞌin baꞌn cyuꞌn ex mintiꞌ nneꞌl cynicꞌ tiꞌj, moẍ taꞌ cywitz, mintiꞌ in che queꞌyin ex lamoꞌn tuj cynabl, mintiꞌ nneꞌl cynicꞌ tiꞌj. 19 Mintiꞌ in che cub ten ximal tiꞌj, atx taj tuꞌn toc cynabl tuꞌn tel cynicꞌ tiꞌj ex tuꞌn t-xi cymaꞌn: Mij tzeꞌ ma tzꞌocx kkꞌoꞌn tuj kꞌakꞌ ex tuꞌn t-xkꞌaꞌlil ma tzkꞌaj kwa pan, ma baj ktxoꞌn kchiꞌ ex ma baj kuꞌn. ¿Baꞌnpetzun tuꞌn tbant kuꞌn jun tilbilal icꞌbil tiꞌjx ttxꞌakan tzeꞌ lu? ¿Baꞌnpetzun tuꞌn kcꞌulun twitz jun piẍ tzeꞌ? Che chiwt. 20 A jlu axix toc nokx gan, junx taꞌ ic tzaꞌn tuꞌn t-xi kloꞌn tzaꞌj. Axju cynabl xjal in sbunte cye ex tuꞌntzun jlu mlayx che clet. Mlayx tzꞌel cynicꞌ tiꞌj nok tten ju tilbilal tzyuꞌn cyuꞌn ex mya dios.
Cub tnajsaꞌn Kman aju cyil aj Israel ex e clet tuꞌn
21 Akeye aj Israel tiyjil Jacob, cynaꞌntze ka akeye nmajene; akeye nmajene ex akine in binchan cyeye. Akeye aj Israel, miꞌn tzicꞌ nnaꞌnjtze cyuꞌne. 22 Ma cub naj cypaltile ex cyile wuꞌne, ic tzaꞌn in cub naj muj. Cyajtz meltzꞌaje wucꞌile porque wuꞌne ma che colpete.
23 Aya cyaꞌj, tjaw schꞌina tuꞌn tzalajbil tiꞌj ju ma tbincha Kman, ex akeye lugar t-xeꞌpun txꞌotxꞌ, che schꞌine tuꞌn tzalajbil. Akeye witz ex tal witz ex cycyakil ke tzeꞌ ateꞌ cywiꞌye, che schꞌine tuꞌn nim tzalajbil porque ma tzaj tyecꞌun Kman tajwalil tuꞌnju ma che colpet ke aj Israel tuꞌn, akeju tiyjil Jacob.
24 Atzun jlu in tmaꞌn Kman aju colpil cyeye, aju pokꞌsante cyeye tej naꞌnxtok cyul itzꞌje: Akine Dios aju cymane, aju binchal tcyakil, wuꞌne xi nlicꞌpuꞌne cyaꞌj ex cub nkꞌukbaꞌne txꞌotxꞌ ex mi jun o oninte weye. 25 Mlayx wakꞌe ambil tuꞌn tjapun cyyol ke pacbal nicꞌal yol; cbajel tzact cynabl ke xjal aj kꞌij wuꞌne. Che oquel meltzꞌaj ke aj nabl tiꞌjx cyyol ex aju cyojtzkibl cꞌoquel te nokx gan. 26 Pero wuꞌne in japun cyyol ke nmajene, ex wuꞌne nneꞌl baꞌn aju cyximbetz keju samaꞌn wuꞌne. Cxel nmaꞌne tuꞌn cynajan juntl maj ke xjal tuj Jerusalén, ex ke tnam tuj txꞌotxꞌ Judá che jawil binchet, ex ke tnam otok che cub xitj che jawil binchet juntl maj. 27 Jacu txi nmaꞌne te nintz mar tuꞌn taj tzkij, ex cye ke nima tuꞌn taj tzkij aꞌ cyuj. 28 Cxel nmaꞌne te rey Ciro cyjaꞌ: Ma tzꞌoc nkꞌoꞌne te cwentil ke xjal etzan wuꞌne. Oc tbinchaꞌya tcyakilju wajbile ex cxel tmaꞌna te tnam Jerusalén cyjaꞌ: Cjawil binchaꞌna juntl maj, ex cxel tmaꞌna te njaye: Che bel keꞌ t-simyentila, chiloya.